2007年1月20日 星期六

日本東京超開心﹑超疲倦之旅 Day 4

2007年1月10日DAY 4: 淺草 -> 上野 -> hotel -> 池袋 -> 六本木
行程已經來到尾聲,終於來到我成個行程最期待的淺草。其實今次日本之旅的一大目的係買日式碗碟...淺草附近的合羽橋就好似香港的上海街,所以一定要睇睇。但係估唔到,我地兩個竟然係觀音寺參觀咗好耐...係第一次超時。
                                                                         
可能因為一月係日本新年,所以都好多日本人來參拜,我地就有樣學樣照做,又上香﹑又求籤﹑仲買咗平安符。我求籤仲求到『大吉』,好開心。男朋友都求到『吉』。
由於超時,之後就急急腳行去合羽橋-道具街。真係好多嘢睇...但由於我係有目標咁睇,最後竟然一隻碗都買唔到...因為冇我想要的,我想要的其實只係菊花碗。加上男朋友又冇興趣,我都唔係幾好意思慢慢睇。      
跟 住我地就向午餐進發,係有超過一百年歷史的天婦羅餐廳『三定』。係十分傳統的老店,仲係坐tatami,好得意。平時男朋友唔鍾意食醃菜...今次竟然話 好好味,係咁叫我食。我就問佢平時點解唔食,而佢亦好直接咁話,果啲好食過我平時醃的十倍。啍﹗我話緊係啦...人地果啲醃咗一百年架啦﹗


食飽飽又休息咗,就開始出發去下一站: 上野。今次係我第一次自己去日本,唔係睇旅遊書都唔識得上野。因為我想信冇旅行團會帶團友去,如果唔係仲有邊個會幫襯佢。我同我男朋友都咁為食...淨係買零食都買咗HK$2000。
好彩我早有準備...已經預咗要返酒店。
放 咗啲手信返酒店,我地又出發啦,目的地係池袋。其實見好多人話新宿同池袋差唔多,如果住係新宿就行新宿,住係池袋就行池袋,唔洗重複。但係我行完又唔係咁 覺得喎。池袋係我買得最多野的地方...我買咗日本傳統和服。仲有我係涉谷冇去到Tokyo Hands,所以係池袋補番,又買咗啲刀叉同匙。
係池袋試和服試到超時...超時的意思係比自己預定的時間行耐咗。去到六本木,原先想參觀多啦A夢的部屋...已經Closed。 咁我緊係第一時間去Vanlily介紹的朱古力店,我仲食埋蛋糕,好滿足。                                                                                                 
要做的事做完啦,咁就開始四圍影。由於天氣凍,加上又懶...最終放棄咗去東京鐡塔。                                                                                                                                                                 
走之前去咗『古奈屋』食咖哩烏龍麵。個咖哩真係好香好濃,又係超級好味呀
      
                                                                                             

日本東京超開心﹑超疲倦之旅 Day 3

           
2007年1月8日Day 3: 築地-> 銀座-> 秋葉原-> Tokyo Dome City-> 新宿

完全基於好奇心,特意去築地食壽司,順便行吓築地市場。其實築地市場都有好多嘢賣,我覺得都算值得行。十點去到築地,竟然已經要排隊。哈哈...咁男朋友負責就排隊,我就負責四圍八。其實原來唔洗睇書都可以知道邊間出名...因為淨係得兩間有人排隊。我地去咗其中一間:大和。
比起Day2的美登利,在築地食壽司其實係貴啲,在心理作用下,亦覺得係新鮮啲。我地點咗一個一人餐,再叫咗幾款食咗覺得正的,埋單要7900yen。當然以食壽司計,其實唔算貴。



食飽咗就向銀座出發,本來唔想去銀座...對名店無咩興趣。不過,呢個係男朋友東京體驗之旅,我又想睇吓玩具博物館,所以都係去咗。如果唔係因為自己懶,遲咗起身,都可以係銀座食午餐...無法啦﹗我係玩具博物館買咗阿笨阿占公仔,好開心。
之後去咗男朋友唯一話想去的地方:秋葉原。咁就出事啦﹗出咩事?...咪就係迷路囉﹗我出發前已經睇熟晒本旅遊書,一直去邊,加人人都話複雜的鐡路都考唔到我。但係我完全對秋葉原實在冇咩興趣,就叫男朋友自己搞掂,哈哈...真係唔方唔搞掂,搞掂我對腳呀嘛﹗

由於行程無去迪士尼同箱根,所以就去比較方便的Tokyo Dome City,有機動遊戲﹑又有溫泉Spa。如果要去迪士尼同箱根,起碼要預測7天。
哈哈哈...我地去到最後係無玩機動遊戲嘅。就去咗食晚餐先,食飽飽再去浸Spa。去咗母明谷主題餐廳,講真...啲食物嘛嘛地,不過就真係幾有特色。
      
浸 Spa的地方唔可以影相,但我都想講吓。幾正嫁﹗設置又齊,有室內,又有露天的溫泉﹑桑拿﹑按摩池...仲有仲有就係三大牌子的化妝品,等你浸完之後可以 用。。因為唔可以著衫,男女係分開的,不過有男女共用的休息室同餐廳,我同男朋友約咗個半鍾之後在休息室等。個露天溫泉就係個過山車下面,不過我相信冇可 能睇到...係下面浸的時候真係幾得意。
因為冇玩機動,所以早咗走。一心諗住返新宿食ShabuShabu,點知...因為浸溫泉的時候除咗隱形眼鏡,咁就出事啦﹗我稱呢段經歷為『當盲公竹變成肓人』,我地又迷路啦
仲 要係我已經提咗男朋友,間餐廳好大機會係嗰棟大厦的情況下,佢都話冇。咁,我地又續向前行...行行下,覺得唔對路,無可能旅遊書會介紹啲咁偏僻的地方。 咁我地就返轉頭,間餐廳果然係喺頭先棟大厦,點知間餐廳已經過咗Last Order,真係估唔到新宿的餐廳會咁早收,跟住就去咗食拉麵- 博多天神。


2007年1月13日 星期六

日本東京超開心﹑超疲倦之旅DAY 2


       

2007年1月8日
Day 2: 明治神宮-> 原宿-> 表參道-> 涉谷-> 自由之丘-> 新宿
今日的第一站就係明治神宮,特意來看看著和服的女孩子,因為今日係成人之日。可能重係新年,都有好多人,不過著和服的女孩子唔多,婆婆就多啲。
 佢地有祭祀儀式,不過我就唔識佢做咩。


行完明治神宮,就食早餐啦﹗凍凍地就去食拉麵,10:00就已經有好多人。個侍應超醒目,見我地兩個傻瓜望住個日文餐牌,成個阿笨阿占咁,就攞咗個英文餐牌比我地,重比我地見到個中文餐牌。嘩﹗好好味呀﹗
食飽咗就開始血拼,又係咩都買唔到。
 我係咪得罪咗人呀﹗不過表參道都真係幾靚嘅…唔知點解反而比我係度見到好多著和服的女孩子,仲見到個好靚的…不過佢行得好快,我地唔好意思叫停佢影相。 
唔知點解原宿街頭勁多Pancake店,走的時候當然唔執書
。食咗士多啤梨雪糕味…超好味呀
﹗           
離開原宿去下一站…涉谷。其實我諗啲商場來來去去都係差唔多,去涉谷主要係食美登利。果然係要排隊,16:00都要排隊…男朋友排隊的時候,我就去八吓。嘩﹗真係平靚正。我地點咗壽司套餐2980yen,有12件壽司加1件手卷,仲有頭盤﹑蒸蛋﹑用魚腩煲的麵豉湯﹑甜品。另外點多個海膽2000yen,超鮮甜。好滿足的一餐。




今日的行程好似離唔開食,我地又食啦﹗去到自由之丘,主角當然係係甜品啦
。感覺上好似依度的地方最難搵,第一係無地標,因為係住宅區,全部樓都一樣高(應該話一樣矮),無大型商場做地標。第二,天黑啦﹗

去到Sweet Forest,第一時間去搵Vanlily個Blog提過的疏乎里。嘩!個疏乎里真係好高。
係Sweet Forest只食疏乎里,因為要留肚再食。再去Vanlily推介的另一間蛋糕店Mont St Clair,點知因為太遲先去到…竟然得番兩個同款蛋糕
。好彩,剩番嗰件都好好味。最外層係Mousse,中間有橙味朱古力,加一層薄蛋糕,加一層脆脆。食大啖啲之後,仲發現粒栗子。
我覺得賣HK$30都係物超所值。
完成咗一日的行程,比預期早咗少少,所以先返酒店放低啲戰利品先食晚餐(啲戰利品係我的男朋友嫁)。我後來先知點解會早咗
…因為去涉谷食嗰一餐,實在食得太開心啦,我竟然唔記得咗去Tokyo Hands
,唯有係之後去池袋的行程度加啦﹗
因為噚晚食太多肉,有啲膩,今餐就試吓日本地道的居酒屋,逐碟叫﹑細細碟﹑慢慢食。
神奇地,男朋友一坐低諗到飲咩。我就被考起…竟然全部都係酒,我見佢有一系列係甜品雞尾酒就叫啦,嘩﹗點知超細杯,心諗︰慘啦﹗酒精成份會唔會好高呢?男朋友話同我交換,我就問佢叫咗咩。哈哈…佢叫咗日本燒酒。
 佢話見到個Sour字,以為係酸的Soda。好彩我嗰杯都唔勁,我平時真係連cocktail類都唔飲得,不過返到酒店,依然發現自己成身出一點點紅色。      



Related Posts Plugin for WordPress, Blogger...