2009年5月29日 星期五

不脫色唇膏的故事

老公出 business trip 又令我諗返我以前都成日出 business trip (我以前同我老公同一間公司),有一次同一個女上司一齊出 trip training, 坐飛機的時候兩個女仔實雞啄唔斷,佢講咗個故事比我聽...令我覺得好感動,之後我有試過上網 search 下個故事,不過找不到...咁而家唯有自己打...
個故事係關於一對年輕的夫婦的,同好多香港的年輕夫婦一樣,佢地生活唔算好有錢,但又唔至於要捱窮,男的係普通文職,女的係大公司大老闆的秘書,本來生活都好唔錯...
有一日女的如常工作啦,老闆們要開會,秘書們都一齊出席,係 break 的時候大家都去洗手間鬆下補下妝,當佢入咗洗手間的時候,其餘 2 個秘書唔為意就係出面講下人閒話,其中一個就話 " 你見唔見到阿大秘書個杯呀...成大個唇膏印" ,另一個 " 係啦...做得大秘書人工都唔少啦... 咁cheap連不脫色唇膏都買唔起" ,當佢係洗手間行出來的時候表面就若無其事,其實個心就好介意...
之後有一日佢同老公行百貨公司,佢想買支不脫色唇膏,一睇個價錢,差唔多成 $300,佢個心好想要但都係叫自己放低,佢老公當然叫佢唔好買啦...其實每個月供完樓都係剛剛好...不脫色唇膏又唔係必需品,佢最終都冇買到...
不過個女人自始之後成日都好唔開心,成日為好小事同個老公嗌交,覺得個老公冇出色...最後佢地真係離咗婚,個女人之後嫁咗比個有錢人。結婚當日個女人的前夫都有出席放低咗一份小禮物恭喜佢一聲就走咗,個女人嫁咗有錢人要咩有咩,前夫份禮物眼尾都冇望一眼...
結婚初時都好好的...老公又鍚佢,佢想買咩都唔洗睇價錢牌,但過咗一段時間,佢就發現個老公花天酒地...有一次佢見到老公的恤衫有個唇膏印,就忍唔住問個老公...點知佢老公同佢講 " 而家係我出去賺錢養你的,有錢你就用,其他的事都唔到你過問" ,個女人好傷心,佢諗返起其實佢前夫對佢真係好好...不過佢當年冇好好珍惜,佢忽然醒起佢前夫送比佢的結婚禮物到而家都未開,就開嚟睇下 (聰明的你地當然已經估到)...就係個女人當年想買的不脫色唇膏...(通常我講的時候個個都爭住講呢句的,不過個故事仲未完的...)
之後有一日,個女人睇雜誌的時候見到一篇佢前夫的訪問,原來佢前夫而家已經係一個出色的生意人,佢開咗一間工廠,專門生產平價的不脫色唇膏,佢係篇訪問的最後話..." 我希望所有女人都可以以低廉的價錢買到不脫色唇膏"。
 
唔知大家覺得個故事點呢?我當時喊到收唔到聲...之後每講一次比人聽的時候都喊一次...到而家都係一邊抹眼淚一邊打的...但我同事同我講...佢講咗比 3個人聽...得我有呢個反應,其餘的人都覺得無聊,覺得兩夫妻唔會為咗咁小事離婚...其實我都唔知點解我咁感動的...嗰次喊到我以後上機都唔敢帶隱形眼鏡...heheheh...
其實我個心係知道我點解咁感動的...因為我好驚我會好似個女人咁,唔識珍惜我老公( 好幾年前聽的...當時未結婚),我知道我老公好鍚我,雖然佢唔細心,不過佢一定係個賺十蚊比八蚊我洗的老公...我地初初買樓的時候,佢真係好慳,連新年叫佢買新衫佢都唔肯,但係佢從來都冇要求我慳啲 (可能佢知冇咩可能...hehehe),其實我真係好幸福......(笑)

2009年5月13日 星期三

HONEYMOON 之旅 - DAY 6 白濱 (有驚無險之日)

  
2009年4月29日 星期三
Day 6: 大阪 -> 白濱
今日一早就 CHECK OUT 大阪的酒店...然後去攞車,今個行程我做咗最傻的事不是去咗 "和民",而是叫我老公玩 "自駕遊",叫一個考完車 7 - 8年,從未揸過車的人在一個人生路不熟的地方揸車...
一攞車的時候已經發現問題...我老公是考棍波的,佢竟然唔識自動波的入波,要個 STAFF 提佢,OK...棍波同自動波有唔同...我明的。
咁我地開車返大阪的酒店攞行李先啦...又唔識睇個GPS...冇入條內線...咁點泊架車係酒店門口呢?最慘係我地一PASS過酒店...個GPS就當我地到咗...自動指示下一個目的地...咁我地唯有停車 SET 過個 GPS 啦﹗
終於返到酒店啦...我老公再發現佢是唔識開車尾箱的?﹗我想鬧佢的時候...又心諗係喎...教車師傅又真是不會教開 車尾箱的......(我諗呢樣野要加入教車/ 考試內容﹗),我叫我老公咩 BUTTON 都試下啦...聽到 "撻"一聲以為開咗啦...原來開咗車頭蓋 (我而家都忍唔住笑咗出嚟),OK...終於都開到車尾箱啦...我地就出發啦...

事情是唔會咁順利的...因為未識睇個 GPS...我老公試過 1) 一口氣 CUT 四條線,2) 轉彎之後行咗人地條線,差啲撞到人地架車,3) 同一條高速公路入咗3次,比多咗2次 700YEN...仲有,除咗車尾箱唔識開之外,佢連窗都唔識開,去到收費亭的時候落車比錢 (我又忍唔住笑啦...不過我當時真係笑唔出),我不斷安慰佢同佢講人人開始楂車都係咁的...我見人地啲 BLOG,佢地都會行錯路的...LELELALALA.....叫佢最緊要唔好咁緊張...最緊要安全...

好彩大阪去白濱條路之後一直都係高速公路...冇咁多野要顧...幾經辛苦...我地 1:30 終於都到咗白濱的 TORE TORE市場...仲要係比PLAN的時間遲咗好少 (我想 1:00 前到,因為有擋吞拿魚表現)。

冇表現睇就食野醫肚啦...唔知係唔係太驚...老公食唔落野...我就好肚餓,叫咗個雜錦魚生飯食。                                      

食完野行完 TORE TORE...就出發去三段壁啦,不過我覺得個三段壁好恐怖的...個懸崖唔知點解可以冇橌杆的...仲有好多日本人行去懸崖邊...我驚到腳都震晒呀...

原來有另一面比遊客離遠望返過去三段壁的﹗是我地傻傻地去咗三段壁嗰邊咋

之後再去千疊敷,好彩著咗波鞋,要 "琴上琴落" 的...我老公自己走去遠啲睇下野...

時間差唔多可以去溫泉旅館 CHECK IN 啦...我地住白濱館,當然唔係好豪華啦 (HK$1900 一晚包早&晚餐),不過房間有浸腳的地方...LOCATION 又唔錯...樣樣野都幾好﹗                                          

SETTLE DOWN 就出去四圍行下...白良濱沙灘就係出面

去圓月島睇日落都係行 10分鐘。今日去的地方好似以前上地理去 FIELD TRIP咁。

係房間食晚餐...不過可能真係未驚完...我同老公都食得唔多...而家定落嚟我問老公其實佢驚唔驚...佢同我講 "有你係我身邊我唔驚..." OH...冧死我啦...不過呢句說話唔係應該係女人同男人講嘅咩?﹗                                                            

食完晚飯呢我地就去浸溫泉,浸完溫泉就出去玩下啦,我地去咗白良濱玩 "花火" ,燒晒先知原來我地玩錯咗方法...                        

之後再去行 SUPER,24小時的﹗仲要係酒店附近...真係好﹗

個 SUPER 好大下的﹗其實仲有 $10店,不過 8:00 CLOSE

酒店後面有條短短的食街,係幾靚的,仲有浸腳的地方...係我住的酒店提供的...營業至 12點                                                                            

2009年4月30日 星期四
DAY 7: 白濱-> 大阪 -> 香港
第 2日食完早餐就出發啦 (唔知係唔係已經驚完...個早餐好似好味過個晚餐呢﹗
                                    
我地揀咗係 RINKU TOWN還車,還完車之後租車的地方仲會車我地去車站,我地想去 RINKU PREMIUM OUTLETS...佢話冇問題...日本人的服務真係一流

係 RINKU PREMIUM OUTLETS 行得太開心...加上我睇錯咗 OUTLET 架 SHUTTLE BUS 的 TIME TABLE...我地最後要坐 TAXI 去機場...好彩同一時間有另外一 PAIR 香港人都睇錯咗 SHUTTLE BUS 的 TIME TABLE...我地一齊夾份坐車先冇咁貴...10分鐘的車程要成 3200 YEN...成 HK$240?好貴呀
P.S. 如果有親朋戚友睇咗我以上的 BLOG,千萬唔好將我地咁驚險的行程話比我老爺奶奶知...hehhehehe

2009年5月12日 星期二

HONEYMOON 之旅 DAY 5 - 奈良﹑大阪城 (傻佬與鹿)

2009年4月28日 星期二
DAY 5: 心齋橋 -> 奈良 -> 大阪城 -> 心齋橋
今日的行程係為我老公而設的...佢因為鍾意 "火影忍者" 裹面的奈良鹿丸,所以當我問佢去唔去奈良的時候,佢就即刻贊成﹗仲成日話自己返鄉下...hehehe...
一出車站已經見到好多鹿啦...佢地仲追住啲女學生
我老公急不及待要同佢的鹿朋友影相,啲鹿仲"食"咗我隻手一啖...我諗係因為我拿着地圖...佢地食地圖架﹗                          
呢個係奈良的鹿地藏...我老公話係電視見到話而家幫佢找女朋友
先去春日荷茶屋食早餐...多謝 COCO 的介紹...如果唔係我一定唔識去...旅遊書有咁好的地方都唔識介紹
我地叫咗最貴的一個 SET,咩都有啲...好好味的﹗
尤其是個粥...真是好正...                           
春日大社有好多大樹...好似呢棵...四個大人都圍唔晒呀﹗
十六世紀的停車場 & 車
幾多鹿同我影相....HEHEHEH....
唔知點解啲鹿唔係咁鍾意我老公...我老公一行過去...佢地就走啦...好多次都係咁...鹿仔,我老公好鍾意你地架...                  
又走啦....hheheheheh.....笑死我啦.....heheheheheh
最後...我叫我老公去買鹿餅...咁啲鹿一定唔會唔理佢
你地睇下啲鹿幾現實 (不過佢地又好乖...佢地唔會去鹿餅店搶的)
去到東大寺,見到隻鹿食咗個女學生的地圖,有個男同學去搶,好搞笑﹗我諗可能係一開始有啲遊客又唔買鹿餅比啲地圖佢地食...耐咗佢地以為係食得的
                                                               離開奈良向大阪城出發,其實大阪城應該係昨日的行程,但時間太趕...所以改咗今日...而原本的宇治就真係冇得去啦...     
去到都要食返個 tea...旅遊區來講已經好唔錯...亦冇開天殺價
我的蕎麥麵...因為成程都冇食到...個湯都OK的
老公的拉麵...佢又冇講啲咩...都OK呱
之後就係我地的 last shopping 啦﹗心齋橋已經行咗冇數次...今次轉行 0101...0101 真係好多野行...最重要是賣的野我老公都岩,仲有稅退﹗總之唔留係最後一站行啦﹗
晚餐去食 "自由軒",我叫咗 "名物咖哩",老公叫咗炸豬扒咖哩...原來2種咖喱係唔同的﹗名物咖哩好食好多...真係好好味...仲要唔貴的...又係超推介 (如果男仔怕食淨咖哩唔飽,可以叫名物咖哩再加炸物...因為個名物咖哩真係超好咪)
名物咖喱...加少少豉油係蛋度,然後MIX埋佢
個咖哩好濃味...
我地呢日都做咗好多傻野...係旅行先會做的...
 
兩次附近行過的人都有笑我地...都唔係好好笑呀...我唔信得我地兩個會咁做﹗

2009年5月11日 星期一

HONEYMOON 之旅 DAY 4 - 神戶 (失敗之日)

2009年4月27日 星期一
DAY 4:  心齋橋 -> 神戶 -> 心齋橋
今日的行程是先去 "大阪城" 再去神戶的,一來因為我地住難波,都沒有直接車去神戶,二來覺得神戶應該唔係太多野玩,唔洗去足全日。
但因為之前帶錯咗變壓器,問極酒店佢地個變壓器都是借咗出去 (呢個係住細酒店的唔好處,我諗佢地應該得一個變壓器),我地唯有一早去咗千日前的 BIG CAMERA 買變壓器先...,但又要去神戶食 LUNCH...咁唯有放棄 "大阪城",再 SCHEDULE 過另一日去...
最後成 12:00 先出發去神戶...去到真係岩岩好食 LUNCH...點解一定要去神戶食 LUNCH 呢?因為我一早 PLAN 咗食神戶牛...而食 LUNCH 比食 DINNER 平好多...所以就算要放棄" 大阪城" 都要 LUNCH 之前去到神戶,我地揀咗 STEAKLAND,見 FORUM 好多正/ 負的COMMENT,不過因為價錢相宜,所以都係揀咗佢
我地叫咗一個神戶牛的 LUNCH SET (2980 YEN),同一個普通的肉眼扒 SET (細),價錢係神戶牛 SET 的 1/3 (980YEN)。
個廚師好好,問我地是不是 SHARE的,我地話是呢佢就自動將 2份牛分開一半先上碟 (仲要男的係多少少的﹗)
老實講 2 種都咁好味,但加上價錢的因素去計算呢...塊普通牛是抵食啲的﹗咁我明白點解 FORUM有咁多負面的 COMMENTS,如果你一心係食入口即溶的,呢度的神戶牛的確唔是 (我老公話有一次我係 CITY SUPER 買的和牛比呢度更入口即溶,因為我未煎晒啲油走)...不過要記住我地食的是 LUNCH SET,質素是及不上 DINNER SET的﹗DINNER SET 最平都要 5980YEN...
個 SET 仲有沙律﹑麵豉湯﹑飯同餐飲
好美味的一餐﹗
之後我地就出發去 "北野異人館" 啦,我揀咗行過去,其實又唔係好遠,不過都唔近。因為每一個館都要入場費,我地一個都沒有入...我老公問我咁我地來做咩?......我話四圍睇下囉...睇下外面都 OK 呀﹗
你同我老公一樣咁噪呀﹗                                                     
又食雪糕...真係好好味...個朱古力超濃
hehehe....又食...神戶的特產布丁...又係好好味...
離開的時候見到間 STARBUCKS...好靚呀﹗
之後我地又行去中華街...真係幾遠下的...去到再食豬肉包
90yen 一個,最少買 3個...好好味架
再食可樂餅...真係食咗幾多野...
其實仲有一檔香港小食...我當然冇食啦...我係香港都冇見過呢啲小食的...不過最多人排喎
之後再去 "花時計" ...都係行去...你睇下我老公個樣...幾唔滿意...
因為老公唔肯再行...我被迫要放棄神戶港的夜景......oh......咁就返去難波啦...之前一直去唔到道頓樂商店街...點知原來已經閉店?﹗
之後我做咗全程最傻的一件事之一...就係去和民食晚餐...(因為本身 SCHEDULE 咗係神戶食的嘛...老公打亂咗我的 SCHEDULE 就做咗啲傻野...)
再傻啲的事是...我地叫咗我地係香港成日食的牛油焗帶子...
呢個係 "櫻肉" ...唔知係咩...馬/ 牛???
因為今日要去的地方都去唔到...唔應該去的地方又去咗...所以我叫今日做失敗之日...
Related Posts Plugin for WordPress, Blogger...