2009年12月30日 星期三

第20週﹗懷孕旅程的一半

今個星期就去到 20週啦﹗代表我的懷孕旅程已經去到一半啦﹗而家個肚都唔算好大﹗仲係阿旺個肚大少少...咁...即是佢有咗成5個幾月6個月啦...HHEHHEHE﹗
自16週第一次感覺到寶寶係肚入面郁﹗到今個星期...佢好似無時無刻都係咁郁﹗我仲發現咗有一個方法可以同佢玩﹗就係放 3隻手指係肚臍對下的位,就可以感覺到寶寶的心跳/ 郁動﹗有時唔知係唔係按中寶寶,寶寶會跳一跳﹗阿旺已經無再話我騷擾BB啦﹗因為佢知我都話唔聽架啦﹗
有一次我打側身瞓,感覺到寶寶係肚面郁﹗我輕輕力拉起件衫...真係比我見到個肚跳咗一下﹗好搞笑﹗好想知寶寶係肚入面做緊咩﹗不過有時都會有少少痛﹗
大家唔好比我個素顏樣嚇親﹗係我嚟的﹗而家個肚就係咁大啦﹗不過我次次影相都好不自覺咁拮起個肚...其實未有咁大的﹗
上面呢張就係我老爺幫我寶寶改名的NAME LIST 紙﹗我地一睇的時間仲以為揀其中一個,心諗都可以順下老人家意﹗點知原來係全名﹗"興" 係中間,佢話想全部孫都用興字做中間,我老公三兄弟全部係 "家" 字,佢話 "家和萬事興" ﹗
咁多個名...好似冇一個岩女仔用﹗陳興潤﹑陳興澤﹑陳興中﹑陳興正﹑陳興順﹑陳興才﹑陳興善 (係呢個比較女仔)﹑陳興明﹑陳興華﹑陳興南...10個入面無一個我覺得過到自己的﹗我好想知我當時係咩表情﹗我奶奶即刻好醒咁話 "唔一定要用的,比你地睇下啫﹗不過你老公三兄弟個名都係老爺改架﹗都幾好吖﹗" ,我心諗我老公的中文全名,都係我聽過最老套之一,應該冇咩佢呢個年紀的人用啦﹗我只係答 "我地諗住比師傅改,到時比師傅睇下啲名岩唔岩用啦﹗" 。反而我老公...為咗寶寶第一次比我見佢唔讚成佢阿爸的建議,佢話 "全部男仔名嚟嘅﹗唔岩用喎﹗",我心諗...好彩佢今次同我同一陣線﹗
P.S. 大家而家明白點解我話生女會有壓力未﹗

2009年12月25日 星期五

期待已久的City Super烹飪班

期待已久的City Super烹飪班,果然冇令我失望,

用料同環境都一流...

學到好多來自世界各地的食材,

個青咖哩鴨用上法國鴨胸,認真高級

 

Menu: 冬陰公,青咖哩鴨,泰式炒河

 

1. 冬陰公



2. 青咖哩鴨



3. 泰式炒河

2009年12月23日 星期三

第19週﹗第一次母嬰健康院CHECK UP

2009年12月22日
我失蹤咗兩日﹗因為放假﹗
一早去咗母嬰健康院登記,我同阿旺都請定假,其實冬至應該有得早放,不過唔通請上午半日咁老套咩﹗我次次覆診佢都有陪我去,我奶奶同阿媽都話 唉﹗你地呢代真幸福﹗我地以前咩都自己搞掂架咋﹗,句對白完全一樣﹗﹗﹗hehehehe...好神奇﹗
今次磅重...49.5KG,上次係47KG,重咗2.5KG﹗護士話 "哦﹗你食野應該幾好喎﹗" (滴汗中)...之後等見醫生,又係聽下心跳。睇埋之前的驗血報告,一切正常﹗而家19WEEK,我已經成日感覺到寶寶郁﹗我同阿旺講 "慘啦﹗寶寶會唔會好百厭",阿旺即刻話 "寶寶活潑啲啫﹗" 我諗...佢呢個老豆...將來一定會好種小朋友﹗咁...我未要做惡媽﹗﹗﹗
去完健康院之後呢,我地去咗睇樓啦﹗睇咗blog友介紹的康山花園,覺得都唔錯﹗不過叫價好高,超過我地的budget,我地的budget係如果裝修好舊,只可以$260萬,如果新...就可以高啲 (都係參考最近的成交價咋)﹗不過我地去睇個單位,我唔知應該話佢舊到全屋冇野可以用得返,定應該話佢係連全屋古董﹗都開價$285萬﹗今次都係第一次睇,要睇多幾次先可以比較下﹗
不過而家仲有一個問題係...我究竟應該而家搬咗先...定等埋寶寶出世先﹗好頭痛...仲要如果我地睇岩,就要放而家層樓﹗啲時候要較得好岩先得﹗咁中間可以慳返啲租樓錢﹗有冇人有經驗?可以比下意見﹗
                                            

上個星期突然轉寒...我地又再打邊爐﹗今次第一次用濃湯寶﹗味道真係幾OK喎﹗咁健唔健康就...唔知﹗不過點都好過出街食嘅﹗蕃茄薯仔豆腐魚湯﹗本身想買魚煲架﹗不過老公叫我唔好搞咁多野﹗
今次出事啦﹗阿旺話啲牛唔好食﹗唔夠滑又唔夠牛味﹗佢的味蕾記住咗上次CITY SUPER的牛牛呀 (唉吔...SUKIYAKI個篇未出)﹗食返凍肉檔的就話唔好食﹗真係唔好比咁多好野佢食﹗唔係好易破產...
老公打邊邊一定要有的 "波波"...上次SUKIYAKI...佢都想要架﹗我唔比咋﹗
蠔...佢自己一個食晒4隻﹗
花甲...我忍唔住食咗幾隻...好鮮甜﹗
金菇蘿蔔
菜 (上次食淨的)
全部野比我地清晒﹗一啲都冇浪費...不過唔知係唔係因為有海鮮,我又狂飲湯...之後我對手有少少發發地﹗好彩之後又冇咩野咁﹗

2009年12月19日 星期六

日本年節料理

日本年節料理- 12月19日 Luscious Delicious
今日請咗一日假,去學日本年節料理。 (
http://www.gerbera.com.hk)其實心思思咗三年,今年係第一次學。
不過今年形式有變,之前兩年都係做'二重',今年則做宴會形式。
真係不得不佩服日本人的食物擺設,全程我覺得我好似做勞作,多過煮嘢食。

新春之宴:
1. 海老黃金煮 (長壽)
2. 数之子 (多子)
3. 黑豆 (健康)
4. 煮鴨肉
5. 伊達卷 (美麗)
6. 蕃薯加甘栗
7. 祐庵燒甘鯛
8. 紅白酢蘿蔔 (喜慶)
9. 蟹文化揚
10. 鷄肉芝士卷
11. 鯛魚刺身
12. 鯛飯
13. 雑煮
14. 牛奶布丁



2009年12月15日 星期二

第18週﹗第4次超聲波@DR. LUK (我的寶寶是男仔定女仔?)

2009年12月15日   第4次照超聲波
上星期六唔記得約醫生﹗終於我約咗星期二去啦﹗而家18週...如無意外都應該可以照到男仔定女仔﹗好﹗比少少時間大家估下,BLOG的結尾就開估啦﹗先比張相大家睇下先﹗
而家寶寶已經有10.48CM啦﹗有一把短間尺咁長﹗而我而家都有110LBS,好似重得快咗少少﹗不過醫生話我本身瘦﹗重多少少都好,只要血糖 OK就可以啦﹗但要開始少食糖同澱粉質,不過我是糖做架喎﹗戒糖...唔係嘛﹗?之後睇返之前OSCAR的報告﹗一切正常﹗計出嚟係幾千同幾萬份之一﹗醫 生今次仲開咗一個月的維他命比我食﹗都係比平時多收$40! 真係好...之前已經心思思想買架啦﹗

好啦﹗我開估啦﹗
1...
2...
3...
大家可能睇完都唔知是咩 (如果冇經驗嘅),因為我睇完都唔知﹗HHEHEHE...上圖黑色一粒腰果咁的是胎盤﹗中間的就是寶寶的兩條大腿﹗大腿中間呢...冇野﹗即是囡囡啦﹗ 唔知大家鍾意仔定女呢?我比較傳統,我想生個仔先架﹗咁無咁大壓力嘛﹗我老公都係鍾意仔﹗我咁講完之後比人鬧...話好似意思女就好過無﹗絕對唔係架﹗老 套都係咁話...最緊要健康﹗第時大個做個有用的人(唔知邊套戲的對白)﹗
HEHEH...我同我老公成日玩家庭遊戲 (係...雖然我地有一個真的家庭...我地仲有玩家庭遊戲)﹗我地其中個仔女就是叫 "老虎晴"﹗估唔到而家真是有咗"老虎晴" (虎年出世)﹗HEHEHE...咁我地要改過2個仔個名啦﹗而家一個叫 "超仔",一個叫 "TATSU" (日文= 達) 。咁﹗可能要改做 "龍超" 同 "龍達"﹗等過2年生返個 "龍仔"﹗

2009年12月10日 星期四

第17週﹗滋擾性行為

噚日出咗個咁沉重的BLOG,今日出返個輕鬆啲﹗HEHEH...自從第一次摸到寶寶之後,我得閒無事就摸下個肚﹗
上星期六呢,我又試下走入房瞓係度,睇下寶寶會唔會浮上肚皮面。佢真係走出嚟喎﹗又係上次個位 (肚臍的左下方),我好開心又叫我老公摸下啦﹗點知今次老公話摸唔到,我叫佢再大力啲摸落去,終於都摸到啦﹗不過見佢無咩反應咁﹗我就問佢啦﹗
我: 點解你好似唔開心咁嘅﹗
JOE: 我開心﹗
我: 咁你又唔摸耐啲﹗
JOE: 我怕整親BB嘛﹗其實呢...你覺唔覺得咁樣好滋擾
我: 點解呀﹗
JOE: 你諗下你瞓瞓下好地地,有人係咁拑你個頭﹗ (同時拑我個頭)...你話啦﹗係唔係好滋擾先﹗(然後自己係度扮好舒服,再突然比人拑的樣)
我: (無語中)......又好似係﹗死啦﹗咁我而家會唔會已經拑親佢架﹗

                                   
呢餐係上星期架啦﹗阿旺鍾意食雞翼﹗上次話學整...結果...黑黑地﹗heheh...
呢煲湯係奶奶煲完分2壺拎嚟灣仔﹗蕃茄薯仔魚湯...我鍾意呀﹗不過我真係唔係幾好意思...辛苦晒奶奶啦﹗
連啲菜都係奶奶拎嚟的﹗不過係阿旺炒的﹗
嘻嘻...又唔洗我煮...可以休息下﹗
Related Posts Plugin for WordPress, Blogger...