2010年7月12日 星期一

懷孕旅程正式完結﹗返工啦﹗

我10個星期的產假終於完結啦﹗產假期間真是發生了太多太多事,放盤賣樓﹑賣樓再租樓再買樓﹑為照顧大頭妹的安排煩惱﹑決定請工 人﹑第一次收到惡意留言......真是是時候整理一下自己的心情,今日就返工,希望一切順順利利﹗今朝早起身到出門口,都唔敢抱下同惜下大頭妹...怕 自己會唔捨得佢呀﹗唔知大頭妹會唔會都掛住媽咪呢?﹗
早一陣子在網上看了一篇有關孕婦公主病的文章,有少少不吐不快﹗不知道寫的人是男是女,是女的又是否試過懷孕﹗為什麼會覺得遷就孕婦會令孕婦有孕婦公主病?﹗
我想說懷孕的時候其實真是好大壓力,第一,我們負責的不只是自己的生命,仲有肚入面的 "小生命"﹗我不只一次在診所聽到有奶奶 (heheh...都可能是孕婦的媽媽)用怪責的語氣話個孕婦不小心跌倒/ 碰撞到﹗我當時心想...她自己想的嗎?又不是故意﹗你不關心她,還要責怪她?﹗懷孕時的壓力真的不容忽視﹗
第二,年紀加工作壓力﹗現在的香港人大多遲婚,遲婚就自然遲生育,我在醫院/產前運動班所見...大部份的孕婦的年紀都好似比我大﹗我已經只是剛好 趕在自己定下的DEADLINE前生,雖然人人的DEADLINE都不同,不過高齡產婦都的確不少﹗而且現在大部女性都有自己的 "事業" ,我在醫院都聽到有病人致電公司講工事﹗我老闆都給我打過2次電話問公司的事﹗老實說,我初初知道自己懷孕,都怕老闆會不高興﹗之後又怕會不會丟掉工作﹗ 相比我媽媽的年代,我妹妹出世的時候已經不用工作,做個全職家庭主婦,30來歲的時候我已經上中學啦﹗
仲有很多很多其他的壓力﹗就好似我呢個產假,我已經經歷了賣樓﹑租樓﹑再買樓...生活上的重大轉變。再加上家中加添小成員,帶來的 "婆媳關係",本身都不用和老爺奶奶有太多的接觸相處,生了小寶寶就變得十分不一樣﹗我現在才明白,為什麼我媽咪不能和我的嫲嫲好好相處﹗當男士們以為自 己是老婆與奶奶的"夾心人",其實我們女人同樣是老公與奶奶中間的"夾心人" ﹗所以奉勸各位,如果有能力請工人的,記得一定要請工人,請完工人再請奶奶照顧寶寶,大家都會好過一點﹗
                    
提防!孕婦公主病
俗語有云「大肚婆大晒」,尤其香港女人出名矜貴,當有BB之後身邊的親人朋友就更加百般遷就呵護有加,不知不覺就可能會形成「孕婦公主病」,潮媽記住小心不要成為其公主一員,以免形象插水。(全文: http://trendymom.com.hk/family/family1.php?cmp=sr&src=frontpage)
何謂「孕婦公主病」?根據網上各大小討論區有關於大肚婆行為的分享,可綜合以下病癥:

1. 事無大小都要人伺候
2.要身邊所有人百般遷就
3.常以懷孕作藉口推諉工作
4.態度差和任意發脾氣
5.專挑名貴的吃和買
6.擺出一副「我最偉大」的姿態
7.強迫別人收聽懷孕話題

2010年7月6日 星期二

走佬袋攻略

之前講過生完之後寫返一篇關於走佬袋的BLOG,一直都忘記了,襯現在還有少少記憶,快快寫完這一篇BLOG﹗
我是在瑪麗醫院生產的,因為每一間醫院的要求都有少少不同,其實可以問醫院拿一張走佬袋的清單再自行決定帶什麼﹗住私家醫院的話,要帶的東西其實很少,大部份用品醫院已經有提供﹗
以下是我用完之後覺得有需要的用品:
1. 入院信,自己的身份證及丈夫身份證副本 (必須)
2. 紙巾1-2盒,TEMPO盒裝紙巾比較厚身,去洗手間用都可以﹗
3. 產婦衛生巾 (扣裝同黏貼型各1包),瑪麗醫院的產房要求要用扣裝﹗
4. 網褲 5-6 條﹑護康瓶 (沖洗瓶),這個對自然分娩的十分重要,預防傷口發炎﹗水泡 (有人話十分重要,我有帶去,不過又沒有用)
5. 床墊 1包 (瑪麗醫院要求厚身)
6. 胸圍 2-3個,打算餵媽媽奶的媽咪就記得帶餵母乳的胸圍,會比較方便﹗
7. 乳墊 1-2對,雖然通常不會頭幾日就上奶,不過帶定一對出院用,以備不時之需﹗
8. 初生嬰兒紙尿片一包
9. 嬰兒用濕紙巾 (有盒會方便一些),嬰兒用綿花 (可以清潔寶寶面/眼,同清潔自己的乳頭for餵媽媽奶媽咪)
10. 紗巾數條
11. 個人用品 : 面巾﹑牙膏牙刷﹑潔面用品﹑TONER﹑CREAM﹑UV MILK﹑HANDCREAM (照顧BB要成日洗手,HANDCREAM十分重要)﹑梳﹑髮夾﹑保溫杯﹑拖鞋﹑SOCKS (生產之後會比較怕冷,暖住腳仔比較好)。如打算洗澡的,就要帶大毛巾﹑沖涼液﹑洗頭水﹑護髮素 (不過以我所見,中國人都好少住院期間就洗澡)﹗

12. 飽肚的零食
13. 鎖,床邊的LOCKER可以上鎖 (不過我當時都沒有用)

出院用品:

1. 寶寶出院著的衫 (和尚袍/ 夾衣和包被)
2. 自己出院著的衫,頸巾/ 披肩 (以防冷親條頸)

2010年5月19日 星期三

我的4日3夜生產旅程 下: 學做媽媽

2010年5月9日 (星期日)
我之前一直幻想究竟我會過一個怎樣的母親節呢?母親節大頭妹出世未呢?想不到大頭妹真是提早一星期出世同我慶祝母親節﹗HEHEHE...不過就是 因為大頭妹提早出世...我媽咪同奶奶都未慶祝母親節 ,大家都在醫院中渡過﹗我仲有幻想過阿旺會買一束康乃馨去醫院比我...不過...阿旺當然無咁做啦﹗如果佢是一個咁浪漫細心的人...就唔係阿旺啦﹗
因為我選擇餵媽媽奶,一生完護士替大頭妹完洗白白就比返大頭妹我,要我即刻餵奶奶啦﹗在護士的幫忙下都總算成功﹗食媽媽奶的寶寶要每2小時食一次,每次食半小時,中間又要換尿片,真是完全沒有時間休息﹗我最初都不是太明白,坐月期間不是要多休息嗎?﹗返到屋企就完全明白啦﹗在4日3夜的住院時間,因為要自己照顧寶寶,所以會非常快上手﹗換片唔可以太慢,唔係大頭妹就會喊...喊就會嘈到其他媽媽啦﹗
照顧寶寶期間有問題的時候可以問護士,她們可以個別指導餵媽媽奶的技巧,第2晚有一護士教我之後,我就次次都成功餵到媽媽奶啦﹗我覺得瑪麗醫院雖然 是政府醫院,不過護士都好好人呀﹗又好幫得手﹗我見有寶寶喊了差不多半小時,護士一埋去不用3分鐘,寶寶就完全收聲﹗而且一樣有好多班上,母乳班﹑嬰兒洗 澡班﹑產後運動班同出院講座﹗
至於伙食方面呢...大家可以睇下﹗
每日的早餐: 肉碎粥

大同小異的午餐: 炒肉片﹑烚菜﹑白飯﹑魚湯和橙﹗
下午茶: 牛奶一杯
大同小異的晚餐: 炒肉片/雞 ﹑烚菜﹑白飯
第一晚的晚餐由媽咪負責,她帶了一個 "古懂" 來﹗HEHEHE...我問媽咪呢個飯壺是不是她生我的時候用...可能是家傳之寶﹗
最最最重要是埋單只需要$350﹗$100一日另$50手續費/ 登記費﹗去私家最少都要$4萬﹗heheh...學做媽媽最重要就是學識慳嘛﹗

2010年5月18日 星期二

我的4日3夜生產旅程 中: 勇敢的爸爸

2010年5月8日 (第一日下午)
6:00我終於可以轉去產房,經過大堂的時候我就忍住度氣,我唔想嚇親阿旺,亦唔想家人膽心﹗
入到產房其實都不大差別,只是心理上好少少,因為覺得真是去到陣痛的尾聲﹗護士/ 醫生比笑氣我吸﹗護士再檢查,我已經開到4度﹗不過...其實我已經痛到唔覺得有分別,我個心只是想快一點見到阿旺﹗等了差不多30分鐘,終於見到阿 旺...我第一句同佢講的說話是 "我依家好痛,會叫得好大聲﹗你千祈唔好驚,同我講啲鼓勵的說話﹗" ,阿旺捉實我隻手,用好堅定的眼神望實我,同我講...(我唔記得咗佢講咩啦﹗類似是 "妳得架! BB好快出就世啦﹗)。之後,我一直望實阿旺,佢不斷提我深呼吸,又不斷鼓勵我﹗呢一刻...我真真正正覺得我個老公好正﹗我知道一定無嫁錯人﹗阿旺的眼神好堅定,令我有返信心﹗唔知點解...我覺得我可以信任佢﹗之後護士再同我打止痛針,要20分鐘後藥力才會發揮,不過...我都是覺得同之前沒有分別﹗
去到8:00幾,我終於開到10度啦﹗其實只要我識用力,大頭妹就隨時出世啦﹗不過......我完全唔識用力﹗阿旺在旁邊不斷幫我打氣,仲教我呼吸同用力(我從來都無便秘...原來無便秘都唔一定是一件好事...到生的時候就出事啦)當時我只是聽到阿旺把聲,我記得好似有4個醫護人員,佢地都不斷提我呼吸同用力,不過我就什麼都聽不進耳﹗我的視線一直都沒有離開過阿旺...如果佢唔係我身邊...我真是不知怎麼辦﹗最 後我總做了超過6-7次4下的呼吸同用力先生得出大頭妹 (我返到產房之後聽到有孕婦講佢只是用了4下的力...即是一次就生咗)﹗到尾的一兩次...我隱約聽到醫生話我再生唔出,就要用吸盤吸,如果唔係寶寶就 會有危險﹗如果用吸盤/ 鉗,大頭妹個頭就會唔靚架啦﹗女人 "要靚唔要命" ...當時我真是用盡我可以用的力,我唔比我大頭妹用吸盤/ 鉗架﹗最後...我當以為我唔得的時候,大頭妹就出世啦﹗
今次我真是好多謝阿旺,我估唔到佢可以咁勇敢﹗大頭妹出世的時候,佢仲夠膽望實﹗佢話大頭妹出世的時候是面向佢的 (即是打側咗)﹗以前我唔覺意切親手流血,阿旺都會嚇到面青青﹗為咗個女...佢真係做到一個勇敢的爸爸﹗
不過阿旺始終都是阿旺...我生完之後...佢同我講...佢一邊教我運氣的時候,佢自已又一邊做...搞到自己都 "急便便"﹗HEHEH...邊個人會係個老婆一生完就講呢啲野架﹗HEHE...佢應該講下啲肉麻野嘛﹗
在產房的時候唔記得影相,到臨入病房先記得,護士話其實唔可以影相,不過護士好好人都比我地影一幅相先﹗我地唔好意思影全家幅啦﹗
HEHEH...平時我就擺得阿旺上枱多...今次比阿旺擺返上枱﹗放我的超級殘樣上BLOG﹗
第二日阿旺來探我地的時候補返幅全家福﹗

2010年5月17日 星期一

我的4日3夜生產旅程 上: 難以形容的痛

大頭妹: 大家好﹗古的貓寧﹗(我爸爸係我仲係媽咪個肚入面的時候教我架﹗)

哈哈哈...出這篇BLOG的今日剛剛是我的預產期,不過依家大頭妹已經在我身邊啦﹗其實想早少少記下我的生產旅程,因為襯仲記憶猶新的時候寫會"到肉"些﹗依家只好靠我的記憶寫啦﹗
2010年5月8日   第一日
06:30 開始陣痛
08:30 出發去瑪麗
09:00 在瑪麗的CANTEEN食早餐
09:30 辦入院手續
10:30 已經開到2度
14:30 已經開到3度
15:30 穿手術袍等入手術室
18:00 入手術室

一早6:30開始第1次的陣痛,第2次在20分鐘之後,到第3次已經是5分鐘一次﹗因為我未 "見紅" 又未 "穿羊水" ,所以我就打算等多一會才叫醒阿旺。大約7點幾,我就自己先洗澡,再同阿旺講我好似作動啦﹗問佢要唔要梳洗,佢又話唔洗﹗到我打算出門口去瑪麗醫院啦﹗我再問佢一次洗唔洗頭,佢就即刻沖入浴室﹗我一早就估到佢唔洗頭唔會出門口...
8點幾就出發,去到瑪麗第1件事就是食早餐﹗
呢個時候其實都好痛...不過都要食﹗
9:00幾就去瑪麗的K9辦入院手續,之後我就要同阿旺分開啦﹗首先接駁儀器檢查,去到10:30護士話開到2度,我就出去同阿旺講可以通知家人啦﹗之前怕"食炸糊",唔想老人家白行一趟。後來開始越來越痛,不過護士話不是痛得密,子宮口就開得快...當時我已經心知不妙...護士叫我如果見紅﹑痛得再密少少﹑或者穿羊水再通知佢﹗去到1:00幾先見紅,當時已經痛到不能再痛,心諗...之後仲可以再痛啲,不是嘛﹗護士叫我行下會有幫助,我就一邊行一邊 "撼頭埋牆" (壁報板)﹗中間見到有孕婦參觀 ,我幾驚人地會以為自己來參觀瘋人院﹗即刻行埋一二邊,後來阿旺同我講有BLOG友見到佢...哈哈哈...可能個BLOG友都見到我...
到2:00幾,我開始痛到要叫出聲,我都知叫都無用,不過都是忍不住...護士見我痛的樣子,再替我檢查,已經開到3度 (差不多3度?),叫我換手術袍。之後一直等一直等,產房都沒有位置﹗同一時間有另外2個孕婦同一時間都開到3度,一個就是 "過期居留寶寶" ,另一個就孕婦就已經穿了羊水12小時...所以我就要排最後啦﹗護士話好多寶寶想在母親節前出世﹗之後另一個護士再同我檢查,佢話我其實未到3度,叫我 等下啦﹗不過我型住佢是呃我的...
到5:00幾,個護士提出幫我打止痛針 (話我未開到3度的一個),我當然話好啦﹗不過另一個護士就阻止佢 (話我開到3度的一個),話下一個就到我入產房啦﹗到6:00,我終於可以入產房啦﹗護士要我應承佢出到去唔好叫先推我出去﹗可想而知我叫得幾厲害﹗

2010年5月13日 星期四

我返嚟啦﹗

我返嚟啦﹗其實噚日就同大頭妹返咗屋企,不過實在太累,所以出BLOG的責任仍然交比阿旺負責﹗今日好好多啦﹗可以自己出一個短 BLOG,因為想比多少少時間阿旺陪下大頭妹 (他出一個BLOG要花2-3小時...)﹗在醫院我就陪足大 頭妹3日2夜,阿旺只可以見大頭妹2小時﹗
大頭妹: 我返屋企啦﹗大家覺唔覺我有啲黃呀?媽咪話自己好肉酸不上鏡啦﹗(實情是阿爺冇影媽咪﹗)
阿旺一直都唔敢抱大頭妹﹗不是有人"過手"比佢,佢不敢自己去抱大頭妹,見餵完奶奶,比阿旺抱一抱啦﹗其實沒有幾多時間比阿旺抱,大頭妹依家食媽媽 奶,一日24小時要餵8-12次﹗即是最少3小時一次,每次30分鐘﹗仲要最初最初的時候餵得越密越好,即是要餵足12次﹗每2小時一次﹗中間仲要換片 片...所以留到比阿旺的時候少之有少﹗
一開始抱的時候...完全硬晒﹗仲好似好驚 "大頭妹" 咁﹗
之後起碼識笑啦﹗
仲夠膽 "惜惜"﹗(因為大頭妹食飽奶熟睡中嘛﹗)
哈哈...我的4日3夜生產之旅要整理下﹗阿旺又叫我唔好出我的舊BLOG...(已經寫好架啦﹗不過阿旺想個BLOG UPDATE啲喎﹗),佢好似唔記得咗個BLOG是我的﹗我用咗傻夫婦個名咋﹗佢之前...寫過一篇BLOG咁大把...依家竟然想影響我個BLOG的編 輯主權﹗不過見大家都咁鍾意阿旺的幾篇BLOG...今次就聽佢講一次啦﹗

2010年5月12日 星期三

返屋企一家團聚^^!

好開心Athena同大頭妹返左屋企啦, 不過就好忙呀! 出院前醫生話大頭妹有d, 要做個test, 好在都冇超標但係指數都偏高, 聽日要去健康院再做檢查希望pass!

2010年5月11日 星期二

擺烏龍!

尋日個blogserious, 今日就出個輕鬆d架啦!!!
係前日(五月九日)有個護士同Athena講佢聽日(五月十日)可以出院架喇, 咁我地就諗咁快? 唔夠床位呀? 但係佢地咁安排都無辨法啦, 我同我呀媽就諗住尋日(五月十日)18:00左右上去接佢同BB出院啦, 因為佢有好幾個護理班要上最後果個要上到18:00點後, 點知….
朝頭早11:00左右Athena打比我佢話個護士同佢講今日原來只係佢一個可以出院, bb要留多一晚因為佢太夜出世所以觀察時間唔夠. 但係明明之前一日個護士都唔係咁講既!? 仲有我個b係食人奶架麻, 如果Athena出左院咁佢食咩呀同邊個照顧佢?? 我都知醫院有好多岩岩生完嘅太太但係人人都大方到咁程度架麻(講笑啫, Athena見到實打我都似..hehe), 個護士仲話妳可以帶bb走但係要簽個agreement 話我地同意冒提早帶走bb嘅風險喎?! 因為Athena隨即要上令一堂所以冇時間等醫生黎問清楚. 咁之後我就即刻請半日假同我呀媽一齊上去問清楚!
點知一上到去Athena話又有令一個護士同佢講佢都唔洗今日走, 仲咩要申請提早帶走bb??? (真係比醫院激死>_<#). 後來Athena無意間聽到原來佢地真係怕唔夠床位, 所以諗住安排佢尋日出院, 之後d床位又出奇地""所以都係比佢留多晚. 不過都好, 我早左到咁我就可以陪Athena一齊上出院班”, 仲終於可以影第一張全家福^_^
全家福 

响五月八日收到一份禮物後先發現, 有一份禮物一直都係我嘅身邊, 以前係, 而家係, 將來都會係….老婆我愛妳!!!

2010年5月10日 星期一

偉大的母親!

進入產房是生BB的尾聲, 但是它正是最痛苦的時候…..
五月八日18:00 Athena先進入產房, 護士同我講十分鐘後我先可以入去. 隨著興奮又緊張嘅心情十分鐘好快過去, 換上左陪產衫後我馬上入Athena嘅房間, 一入去只見到她訓係床上好辛苦嘅樣子咁聞緊止痛氣
當時我有d不知所操好擔心咁行埋佢身邊, 佢就同我講佢陣痛嘅時間痛到叫得好大聲我千其唔好驚, 同埋叫我同佢講多d支持佢嘅說話. 我即時係個心度喊左出黎, 但我只好強忍眼淚捉著佢隻手同佢講放心啦, 我唔會驚而我入黎唯一嘅原因就係支持妳之後每當痛黎嘅時候我只能夠做嘅就係叫佢放鬆身體, 要深呼吸, 有好幾次佢痛到崩潰, 佢話真係好痛, 我唔得啦….” 當時我個心好痛但我知道我一定要撐住因為我係佢唯一嘅支柱之後我同佢講 妳得架! 我知你一定得架! BB好快出就世啦, 我同佢係度支持妳, 妳要頂住呀!” 佢可能比我嘅說話感染到, 佢就用有返信心嘅眼望住我繼續頂住. 我係度諗Athena佢真係太辛苦啦不如唔好生啦, 又如果訓係度果個係我, 我諗我一定撐唔住, 果一刻我先深深咁感受到做母親嘅偉大
其後嘅搏鬥持續左幾小時最後一刻Athena用盡氣力將bb生左出黎, 當我第一眼見到bb嘅時候就覺得值得架, 果種喜悅係無野可以形容到, 能夠收到呢份禮物係一件好幸福嘅事.
母親節的禮物

祝母親節快樂!
做子女嘅一定要好好孝順父母. 做老公嘅都一定要好好愛錫你嘅太太.

2010年5月9日 星期日

號外! 號外! 大頭妹出左世啦!!!

好開心, 好開心, 好開心呀! 大頭妹响五月八日出左世啦! 重六磅一, 不個頭真係好大 hahaha.
Athena 係响早上6:30開始陣痛, 好快就變到每五分鐘一次, 但係冇見紅同穿羊水,其實只要呢三樣嘢中其中一樣就可以入院架啦. 佢就即刻沖涼洗頭準備入院啦.

出發前影返最後一張大頭妹仲係肚度嘅相先

8:30左右我地到左醫院, 但第一件事並唔係辨入院手續, 因為考慮到現時嘅痛仲係一個暫時忍到嘅階段(其實已經幾辛苦), 加上之後可能會痛到無晒胃口食嘢, 所以我地去食早餐先.

好緊張地買早餐


上到代產室檢查後, 護士話佢已經開到兩度如果上到三度就可以入產房等生. 我心諗咁咪會好快? 差一度啫. 因為探病時間係18:00 – 20:00, 所以如果要見佢只有叫護士叫佢出黎, 而入產房前我最後一次見佢係13:00, 但終於要成18:00先入到產房當時佢已經開到四度, 其間出唔到黎嘅原因係佢已經痛到行唔到, 加上護士同佢都怕Athena自己陣痛所帶來嘅慘叫會令我, 奶奶同外母擔心, 而未入到產房嘅原因係因為唔夠床位. 最後用左差唔多五個鍾先生到!

講住咁多先, 生嘅過程我想日後開新一篇blog. 待續

2010年5月7日 星期五

產假的第1﹑2﹑3日!

2010年5月3日- 產假的第1日
產假的第1日,我開始煲 "原來是美男",薑醋不用我自己煲,我就負責煲韓劇﹗"原來是美男" 都真是幾好笑,劇情就完全唔MAKE SENSE,不過有得笑就得啦﹗HEHEH...睇完韓劇就煮返個辛辣麵食﹗下午無無聊聊,睡了2小時,之後阿旺放工,我地就去贊育附近的嬰兒用品店作最 後衝刺啦﹗
買了MINIMOTO沖涼盤( $135),孤寒旺不肯買腳座,不過萬一之後真的覺得有用,都仲可以後加,所以就算貴少少都買了MINIMOTO﹗沒有牌子的大約$100留下﹗
買多一張床單,因為已經有一套HELLO KITTY,想要平平地純粉紅色的,最後找到MOOMIN的 ($49),不過沒有枕頭袋﹗
老板娘介紹我們多買一個枕頭 ($35),枕頭袋可以拆開洗,因為如果買PETER RABIT的枕頭袋都要 $45﹗而且如果買了PETER RABIT的枕頭袋,我就會想買PETER RABIT的床單 ($99)...之後又可能會想買埋被單...EHEHEH...即是沒完沒了﹗
見思詩樂的BB綿($25)好似平過MANNING'S,所以買多3包﹗
另外仲買了護康瓶和PIGEON奶瓶夾。個護康瓶成幾十蚊,返屋企打開看看,竟然好似小販檔的 "甜醬瓶"﹗哈哈哈...總之去十蚊店買一個醬瓶﹗

2010年5月4日- 產假的第2日
今日一早又煲 "原來是美男"﹗下午就靠阿旺 "接濟",買午餐飯盒回家和我一起吃午飯﹗HEHEHE...平時阿旺放工返到屋企,我都會叫佢比橙 (去皮)我食,我話我放產假放到好似監獄的犯咁,等派飯同派橙﹗
晚上約了朋友到PIZZA EXPRESS吃晚餐,又一個朋友失戀﹗女人三十的戀愛關口,好似真的好難過﹗難怪到了29﹑30的時候,看麥玲玲﹑蘇民峰都話 "不結即分",中的機會率都好高﹗下年我都可以出本流年運情﹗

2010年5月5日- 產假的第3日
因為第一﹑二日下午都留在屋企看 "原來是美男",一心想出去行下和阿旺食午飯﹗一出街就出事啦﹗回家的時候竟然沒有電梯,我忘記了星期三是例行檢查﹗好彩我住低層,行樓梯返屋企都還可以 ﹗不過...我本來只是想做少少運動...是少少...依家就一點都不少啦﹗我決定下次都是等阿旺"派飯"﹗
我的走佬袋﹗前面是上年我生日阿旺送給我的CATH KIDSTON,就是因為這個袋,阿旺不批准我買個LESPORTSAC MAMA袋﹗後面的是惠氏送的走佬袋﹗
CATH KIDSTON袋入面的物品﹗
惠氏MAMA袋入面的物品﹗
見有BLOG友教要入產房的用品放一袋,所以再重新收拾一下。

2010年5月3日 星期一

第38週﹗開始放產假啦﹗

5月開始我就放產假啦﹗我的預產期是5月17日,本來都好想返埋5月第一個星期,不過都不想太勉強,我的工作經常都要四圍去﹑去銀行﹑去郵局...中環實在太多人啦﹗我個人又心急,有什麼碰撞就不好啦﹗
已經放了2日假,星期六都是預備下寶寶出世要用的物品,再收拾一下我的走佬袋,真是有很多東西要帶呀﹗床墊都要10張﹗孕婦衛生巾又要2包 (1包有扣加1包貼的),加埋寶寶的片片1包已經放滿2個大袋﹗加上其他濕碎個人用品,住三日醫院同去三日SHORT TRIP要帶的東西一樣多﹗不過呢個SHORT TRIP就可以帶大頭妹返屋企﹗
之前收到JOHNSON'S BABY的PROMOTION EMAIL,4月30日至5月3日柔濕巾有9折,60.9有3包,去到TASTE竟然沒有這個優惠...不過...有個更好的優惠,就是$79.9有4 包,即是不用$20就有1包,仲送2包細的﹗買滿$50再送1支100ML的護膚露﹗真是超級抵買呀﹗
我沒有買個家用盒,想問有沒有人用過?是不是真的比較方便呢?﹗
再開始洗衫,今次洗床舖﹗不過我們除了沒有洗衣機,其實連熨斗都沒有,洗再之後皺皺的﹗鳴鳴鳴﹗

星期日去AMC看 "葉問2",之後行PACIFIC PLACE,行過LESPORTSAC想買一個MAMA袋,有好多間隔方便放"濕碎"野,仲有換片片的墊 (兩眼發光中)﹗不過阿旺話不化算,$1280又不知我會用幾多次,所以不批准我買 (鳴鳴鳴)﹗男人同女人對袋的看法不同,我地女人去街要有去街的袋,返工要有返工的袋,去飲又要有去飲的袋嘛﹗又不是要買LV﹑GUCCI﹑CHANEL...算啦﹗慳得一蚊得一蚊嘛﹗
就是這個啦﹗男人一定覺得一個尼龍袋賣成千幾銀是 "好過去搶"﹗MARKETING嘛﹗有特別功能就賣貴一點囉﹗我覺得我最終心思思都是會去買...HHEHEHE﹗

之前見有BLOG友話5月入院的要自己帶奶粉,見有貨就即買啦﹗去到健康院比護士問我這麼快買奶粉,不試餵人奶嗎?﹗我試就一定會試﹗但是如果真的沒有,大頭妹都仲要食嘛﹗不過健康院的護士都不知道5月入院要自己帶奶粉喎﹗
朋友仔介紹的﹗見成日都缺貨,師奶心態下就選擇這一隻﹗

大家有沒有奇怪我好似好耐都沒有出鏡呢﹗其實......是因為我之前 (上上星期) 剪了一個 "小丸子" 冬菇頭﹗不過醜婦終需見家翁,我好耐沒有影肚肚相啦﹗我今個星期會影啦﹗我依家已經132磅﹗肚肚有38.5寸﹗終於衝破了130磅的大關﹗原本仲想在生 之前維持在130磅以下...哈哈哈...依家將目標定在135磅啦﹗如果最後真的有 135磅,我就總共重了40磅,都真的幾誇張,難怪次次見醫生護士都被 "鵝"...上次"鵝"到阿旺坐出面都聽到,一行出護士房就比阿旺笑,我要襯放假做下運動先得﹗加油﹗

2010年4月26日 星期一

第37週﹗足週數 & 產前檢查@瑪麗醫院

今個星期踏入第37週,代表寶寶已經足週數,依家出世就不算早產啦﹗我見網上的資料話37週的寶寶依家已經有頭髮,不知道我們的大頭妹有頭髮沒有呢?我和阿旺都是 "光頭寶寶" ,兩個都是到一歲才有頭髮﹗哈哈哈...大頭妹好可能都是光頭妹﹗
由第36週開始就可以飲白蓮鬚啦﹗不過成個星期都好忙,沒有在家開飯,星期五有時間就第一時間煲啦﹗到家留下的藥材店買了2包﹗
一包大約一兩,老板話5碗水煲成1碗,不過煲了45分鐘都仲有2碗。咁...算啦﹗我分2日飲﹗
加了一隻蛋﹗多吸收蛋白質,大頭妹就會變成大隻妹﹗
今次沒有加糖,只加了一粒蜜棗,少少苦苦地﹗飲完之後我對手的濕疹仲發到一發不可收拾﹗

上星期五的早上到了瑪麗醫院做產前驗查﹗因為前一晚阿旺寫BLOG寫到凌晨3:00﹗我倆都不願起床﹗去到瑪麗醫院,我是第20個,不過因為是婦產 門診部(應該有其他婦科病人),其實已經有很多人﹗一時醒不起可以先去食早餐,等到11:00的時候太肚餓,叫阿旺去看看有什麼可以吃啦﹗誰不知買完就到 我見醫生啦﹗
明知已經就快到,阿旺都買了2份三文治餐﹗
比媽媽鬧啦﹗個樣幾慘﹗

一如以往的政府產檢,等個幾鐘才見醫生5分鐘,不過就費用全免﹗由今個星期開始,就要每星期覆診,亦代表我的懷孕期進入最後直路啦﹗加油﹗


對腳仲未消腫﹗幾時先會消腫呢?如果真是要3消3腫先生得,我仲要腫多一次架喎﹗
奶奶都開始幫我洗BB衫啦﹗原本以為奶奶會用洗衣機洗,所以我將我未洗的都帶到奶奶家﹗誰不知奶奶都是手洗,真的有一點不好意思﹗
呢兩套衫仔都是阿旺的表哥送架﹗
洗完皺了少少,其實好靚架﹗
Related Posts Plugin for WordPress, Blogger...