2011年10月29日 星期六

我地今日帶大頭妹去宿營呀

哈哈,好耐無見﹗丟低個BLOG 2日﹗
因為我放假,大頭妹剛巧生病
每5分鐘就抹一次鼻水,
根本完全沒有時間。
事實証明,做全職媽媽其實會更加忙﹗

星期五一早同阿旺去睇 "那些年,我們一起追過的女孩",
有時間的話,都寫返篇BLOG講下﹗

今日好忙,一早起身梳洗下,
預備帶大頭妹上PLAYGROUP,
上完PLAYGROUP,
就要出發去我地第一次的宿營﹗
地點是鯉魚門渡假村﹗

HEHEHE...上次上的PLAYGROUP都未出2BLOG﹗
大家睇相吧﹗
上次好乖,好多INSTRUCTION都有跟住做﹗
希望今日都乖乖啦﹗

2011年10月25日 星期二

飲茶@鍾菜

星期六同大頭妹上完PLAYGROUP,
返屋企坐一坐,
等埋媽咪同細妹就去飲茶啦﹗
好幾個星期無飲茶啦﹗

大頭妹去飲茶的指定動作 - 畫畫﹗


轉個頭又丟支筆落地﹗百厭妹﹗


去飲茶之前,阿旺去GODIVA攞禮物﹗一粒要 $35架﹗


沙律蝦角,好耐沒有食啦﹗好好味﹗


蘿蔔糕 -好味﹗

蝦餃


叉燒包


馬粒卷 - 普普通通

 

鳳爪 - 好好味﹗


叫比大頭妹食的...點知佢轉個頭瞓咗﹗


燒賣 - 好味﹗


雪菜火鴨絲炆米 - 3個人睇完張MENU,都以為是湯米﹗
一上枱大家都O咀﹗



灌湯餃

2011年10月24日 星期一

超蠔豆腐麵豉湯

我超級鍾意飲麵豉湯﹗
雖然未至於好似日本人,一日飲3碗﹗
不過間中都會自己煲,然後飲個痛快﹗
尤其是自己煮咖哩的時候﹗
食日式咖哩,無麵豉湯的話,成件事就唔完美啦﹗

最近要清雪櫃的廣島蠔,
阿旺之前扭計要買,
買完又唔煮﹗雪到顏色都變埋﹗
佢個痴線佬,之前用雞粉開水白灼來吃﹗
我真是無眼睇﹗

之後我見煲開麵豉湯,
就問佢放幾隻一齊煲好不好﹗
佢...竟然放了 7隻﹗
4碗水的麵豉湯放 7隻蠔...
真是 "超蠔" ﹗
如果不是放了冰箱整整大半年,
應該會是 "超超超超超蠔" 囉﹗

原來我之前麵豉湯的食譜是無影過食材,
之前有朋友問起,
今次放埋食材相﹗

高湯粉: 這個牌子是 "無添加" 的,
而且有木魚﹑昆布﹑同魚干仔3種味道﹗
個人推介魚干仔﹗好香﹗



無添加的麵豉之中,這個牌子是最平的﹗
以前都是 $20 (SOGO THANKFUL WEEK),現在大約 $30﹗



廣島蠔,本身應該是好似左手邊的一隻,好靚的﹗
但雪得太耐就變成下面一隻...

 

2011年10月21日 星期五

同姨姨上第4次PLAYGROUP

唉﹗一轉季工人姐姐就病,仲傳染埋大頭妹﹗已經帶咗佢去打流感預防針,都無用嘅﹗都知佢 "藥煲" 架啦﹗上個冬天,差唔多成個冬天都病 (睇咗4-5次醫生,我地仲唔知原來有得CLAIM保險)﹗呢排仲話印傭有德國麻疹﹗好彩大頭妹岩岩夠1歲,已經打咗針,唔係又有排擔心﹗

我 地又係粗心,工人姐姐病咗,都冇提佢唔好再成日咀對咀惜大頭妹﹗無錯...是咀對咀﹗其實老爺奶奶好唔滿意呢一點,最初我地都講過幾次,又唔想講得太 SERIOUS,好似驚死佢有病咁﹗之後就只是佢病的時候REMIND佢﹗點知今次我地REMIND佢的時候...佢仲同我地講...佢(大頭妹)都病咗 啦﹗真是比佢激死﹗

講返上星期六,又上PLAYGROUP,因為阿旺爸爸去了做義工,今次同姨姨一齊上﹗HEHEHEHE...終於比姨姨見識到大頭妹上PLAYGROUP唔肯玩的奇怪行為﹗

個傻豬囡坐到去最後,老遠咁望住老師﹗

我唔出去架﹗我唔出去架﹗

又眼定定望住老師...

依然眼定定望住老師...阿囡...我真是投降啦﹗

企定定...唔肯郁﹗

老師叫佢行去對面呢﹗佢就行埋老師度...

老師叫佢放紙入去,佢就拎返出嚟﹗

做運動啦﹗都算肯做啦﹗


不 過我發現佢上完PLAYGROUP是有學識野架﹗好似上堂唱ROW YOUR BOAT咁﹗老師的VERSION是最後會尖叫一聲,依家我同佢係屋企唱的時候,唱完佢都會叫一聲﹗唱LONDON BRIDGE IS FALLING DOWN,佢又會做DOWN的動作,將對腳摺埋,再放返低﹗希望上多幾堂佢會肯玩啦﹗平時出街又好開心,成日"聊"人玩架喎﹗

2011年10月20日 星期四

無個樣整個樣

最近買咗2樣家居用品,覺得其中一樣好有用,想介紹一下﹗HEHEHEH...不過唔好意思,要大家睇埋我屋企個屎塔﹗

最 近屋企個廁所板爛咗,催咗阿旺幾次,佢終於去買啦﹗點知佢個 "屎忽鬼" (唔好意見...我好少咁粗俗,不過只有呢個名詞最能夠形容佢﹗),買咗一個軟墊面的廁所板﹗大家請幻想一下...你坐係一個軟綿綿的CUSHION上 面...一個 "正常人" 是不會在一個CUSHION上面大小二便架囉﹗

就是這一個﹗

個廁所板當然就唔係我想介紹的一個啦﹗我想介紹的是這個涼衣架﹗我 工人成日話無地方涼衫,涼晒啲衫出街,飛走過幾次床單,細件的...都唔知唔見咗幾多﹗睇廁所板的時候,行下行下...比我地發現咗一種涼衣架,原來唔洗 上牆,有個窗就得架啦﹗即買啦﹗費事3日唔埋2日又要去管理處問有冇人執到我地啲衫呀﹗床單呀﹗被袋呀﹗

就是呢款啦﹗我地以前灣仔都係用呢款,不過就上牆的﹗



呢款就是上窗啫﹗方便好多﹗

2011年10月19日 星期三

大頭妹FASHION SHOW

最近又買了很多衫衫比大頭妹,其實本來只是想買鞋,因為之前買的,真的大部份都不合穿了﹗有時去完街回家,除鞋會發現腳仔紅紅的﹗點知...上網看完一輪 (都是GAP CN啦﹗11月香港都有專門啦﹗實在太開心﹗),鞋就買不成,衫就買了幾件 (真的幾件咋﹗)﹗

牛仔褲 $185,大頭妹只有2條長的牛仔褲,1條是70碼,今個冬天應該已經不合穿啦﹗買啦﹗
大片绣花窄腿牛仔裤

長袖T-SHIRT $160,一看見就很喜歡啦﹗無論是顏色/ 款色﹗沒有特價都要買啦﹗


背心裙 $160﹗是大特價啦﹗一定要買啦﹗買了90碼...明年夏天穿﹗

涂鸦花朵无袖连衣裙
T-SHIRT都是90碼 $48咋﹗不買對不起自己啦﹗人气休闲短袖印花T恤
都是一樣 $48﹗GAP的質地很好,買來明年穿囉﹗


就是這樣花了$640﹗不過一對鞋都沒有買到﹗HEHEHE...行動失敗﹗要繼續看看哪兒有漂亮的鞋子啦﹗HEHEHEHE...很久沒叫口號啦﹗"敗家萬歲﹗敗家萬歲﹗敗家萬歲﹗"﹗

2011年10月18日 星期二

不知不覺變大咗?﹗

最近我忽然覺得大頭妹大個咗好多﹗除了之前買比佢的鞋仔,大部份都已經唔岩著之外﹗同佢講道理,佢好似明白好多咁﹗
 
好 似上星期六,我同佢上完PLAYGROUP,之後去咗鰂魚涌公園玩(近東區體育館的一個),佢一支箭咁跑去一對兄妹騎住的搖搖馬,仲想爬上去玩,我叫住唔 好,之後佢已經比隻馬馬撞低咗﹗撞瘀咗右眼下面﹗當時對方的家長都有叫個小朋友停低的,不過個小朋友當然無停啦﹗我都唔會怪人,怪只怪自己唔眼明手快抱走 大頭妹﹗

之後我地就去玩滑梯啦﹗個小朋友又轉去玩滑梯,我見佢係大頭妹身邊經過的時候已經好驚,驚佢會踩落大頭妹度,因為當時大頭妹爬 緊,佢對腳就係大頭妹的手指旁邊﹗點知佢自己唔踩,佢令轉面大大聲叫佢個妹 “踩佢”,好彩個妹妹好乖,只是呆呆的站住﹗我當時大大聲鬧大頭妹唔聽話,就9秒9抱佢走﹗個小朋友的媽咪都企係度,完全無出聲話自己的小朋友,我唔想幫 人教仔,亦無呢個本事…我最多走人啫﹗

我行返屋企的時候問大頭妹 “下次有人玩緊的時候唔好跑過去,知唔知道?”,我以為佢一定會答我 “唔知道”,佢的口頭禪﹗點知佢好 “認真” 咁點頭﹗之後我問佢 “頭先驚唔驚?”,佢又再好認真咁點頭﹗

之後我第2朝再問佢一次,佢都係好認真咁點頭﹗好似好明白咁﹗哈哈哈…原來我個囡不知不覺大個咗好多,明白好多事架啦

2011年10月17日 星期一

買樓夢

睇完曾特首的最後一份施政報告,又挑起我條筋,想講下我同阿旺買樓的故事﹗今次份施政報告,終於都提出復健居屋啦﹗其實雖然我已經是有樓一族,我個人是讚成復健居屋的﹗好多人話唔公平,其實公平/ 唔公平是點定呢?

想當年我同阿旺拍拖儲錢買樓,當年(2002年)已經無居屋抽啦﹗不過仲有首次置業計畫﹗可惜因為前一年公司年派了 “大花紅”,我地剛剛過了入息上限,唯有等到年尾,如果沒有再派花紅,就可以申請首置啦﹗結果年尾的時候,政府宣佈取消首置,我地的買樓夢就完了﹗

誰 不知過了一年,香港有SARS,樓價跌到落谷底,我的買樓夢又開始過啦﹗當時我地去睇元朗YOHO TOWN,我記得是一個7樓 599呎有露台的單位,售價是 $108萬多少少(我估依家應該超過 $300萬)﹗不過YOHO TOWN沒有提供2按,最少要比10%,我地當時全副身家得 15萬,其實勉勉強強都足夠,但唔想問屋企人借錢 (只是週轉都唔想),我地自己同自己講…無咁大個頭,就唔好戴咁大頂帽,結果我地抽完籤都沒有去買。我仲好記得當時是 2004年的中秋前,之後SARS過了,樓價不停升,2005年的農曆新年,我再睇YOHO TOWN同一個單位 (是﹗同﹗一﹗個﹗),已經去到 $180萬 (半年升了 $80萬)﹗

新樓的升幅實在太驚人啦﹗我地之後唯有向舊樓埋手,如果揀舊樓,其實就多很多選擇啦﹗我地開始睇 灣仔區,因為近我地返工﹗當時的BUDGET是$150萬以下的 2房單位,但當時樓市已升返不少,最終我地就買了一個一房唔洗裝修的單位,然後自己油油,買最平的家私﹗唔洗$10,000就入伙啦﹗其實當時有一個只是 貴 $30萬的單位,就已經是2房啦 (仲要是屋苑,地點又是靚少少的星街)﹗不過阿旺堅持要買 $150萬以下的,怕供樓會辛苦,當地我同佢的人工加埋應該都是大約 $3萬﹗OK﹗即是由頭再來一次,我地都未必有資格去抽居屋﹗所以根本就不存在不公平問題﹗

再睇返依家的租金,老實講...$6-7k都 真是租唔到咩樓﹗如果兩個人的收入只有 $30k,用 $10k去租樓,生活真是好 "慢慢緊",除非唔洗供養父母啦﹗所以我其實都讚成復建居屋,不過...個新的補地價方法,又真是奇奇怪怪,以前的好地地,又沒有人投訴唔公平,點解要無 啦啦轉一個咁有爭議性的方法呢?﹗可能因為這就是香港政府﹗

2011年10月13日 星期四

第3堂PLAYGROUP@SUNNY GARDEN

2011年10月8日 (星期六)

又到星期六,又到上PLAYGROUP的時間啦﹗
上星期六因為國慶假期不用上課,
今個星期再上返...又唔肯出去玩啦﹗
都唔明白,
平時出街/ 去朋友屋企,佢都唔怕人,
唔知點解一上PLAYGROUP就好怕醜﹗

佢會好留心聽老師講,
不過當老師比指示/ 要佢地出去,
佢就唔肯做﹗
仲要唔比爸爸幫﹗
真是硬頸到無人有﹗

嗱﹗好留心咁 "食手指" 囉﹗

唔比爸爸幫﹗我見其他小朋友,個個都會自己拎住,再由媽媽幫手搖的﹗

甩開爸爸的手﹗

出埋惡樣﹗

極力反抗﹗

總之...佢就好留心咁聽...不過就唔做囉﹗

睇下大頭妹...零反應﹗好冷靜咁企係度﹗

推箱仔都一樣...旁邊的小朋友已經到咗老師個邊...阿旺仲氹梗佢推﹗

到爸爸推佢...佢又係好冷靜咁坐係度﹗

次次自由活動時間就最開心﹗

訓練手仔,呢個都肯玩下﹗

又好專心聽老師講解啦﹗
 
跳舞時間,最開心啦﹗終於見到得個囡跑啦﹗

扭晒PAT PAT咁,個阿SIR同MISS見到都忍唔住笑...

雖然只是側面...都見到佢笑啦﹗

上克PLAYGROUP之後,又去公園玩一陣,
返屋企飲完奶就瞓,
瞓咗足足4小時,
上PLAYGROUP原來要用咁 多ENERGY咩?
佢從來瞓晏覺都唔會超過 2個鐘架喎﹗
Related Posts Plugin for WordPress, Blogger...