2012年1月18日 星期三

假日後遺症 (附大頭妹舞獅 VIDEO)

我一向都覺得大頭妹好生性﹗有時生性到我有少少心痛﹗好似戒食手指咁﹗其實佢依家在公開場合/ 去到婆婆屋企/ 去到爺爺屋企,已經可以用意志力做到 "盡量" 唔食﹗"盡量" 的意思是有時會見到佢想食,將手指放入口之前就拎返出嚟,有時仲有放上耳仔邊,扮無事發生過。有時食咗,比人一望就會拎返出嚟﹗

我 覺得佢已經好努力,所以我諗上次點解老爺一話大頭妹,佢喊得咁 "悽涼" ,就是因為連大頭妹都覺得自己已經好努力,但都仲要比人話,所以好唔甘心﹗而且當時已經好夜,到了瞓覺的時候,食手指的心癮就更加強烈﹗不過我做媽 媽...又無可能叫人地唔好話大頭妹,一陣又比阿旺話我 "慈母多敗兒"

吖﹗講到離晒題﹗其實我是想講平時我返工,大頭妹好少會扭計/ 喊,每朝同我講BYE BYE的時候,有時仲會 "故意" 唔望我,好似唔想傷心咁 (可能是媽媽一相情願,其實個囡是費事理我﹗)﹗不過逢星期一就會喊幾聲﹗

岩 岩的星期一,佢自己瞓晏咗,爸爸已經出咗門口,佢一起身見到我就問我 "baba, where?",我話 "爸爸go to work啦﹗mimi都go to work啦,跟媽媽講一次,work﹗" ,大頭妹 "work",我再問 "mimi go to work 好唔好?﹗" ,大頭妹擰擰頭,之後我真是要走啦﹗佢就開始喊啦﹗不過都是喊幾聲就收咗聲﹗

到星期二,大頭妹見我拎手袋出門口,即時跑過嚟,拎走我的手袋﹗佢知道拎手袋代表出街﹗諗住拎走我個手袋,我就無得出街囉﹗

噚晚有個節目講舞獅,大頭妹好鍾意睇,仲學人舞獅不停跳 (跳梅花樁)﹗笑死我﹗

沒有留言:

張貼留言

Related Posts Plugin for WordPress, Blogger...