阿旺爸爸心碎了

今篇BLOG叫阿旺爸爸心碎了，大頭妹上星期六開始病，傷風﹑咳﹑仲要發高燒﹗最高去到40度﹗

最初我地見佢地好生猛，只是比咗高燒的退 燒藥佢地，通常都好見效，點知去到星期一都仍然高燒，阿旺星期一就帶大頭妹去ST PAUL'S睇醫生﹗醫生話通常由病毒引起的高燒，燒4日就會慢慢退，但如果維持高燒呢，就要再返去覆診，睇下會唔會係其他地方有問題。結果去到星期二， 大頭妹仍然高燒，星期三阿旺再帶大頭妹去覆診。結果醫生話個肺都有少少雜聲，要食抗生素﹗如果食完抗生素2日內都仲係唔退燒呢﹗就好大可能要入院啦﹗好 在..星期四早上(食了抗生素1日)，大頭妹就退燒啦﹗

陰公豬，燒咗5日﹗最慘係唔肯食，本身已經夠晒瘦架啦﹗


咁...點解篇BLOG叫阿旺爸爸心碎了...而唔係爸爸媽媽心碎了呢？﹗因為...令阿旺心碎的原因不止是大頭妹病病豬﹗而是...當大頭妹病病豬的時候就特別 "嗲"，特別要人陪，之後有一晚:

大頭妹: 一齊瞓吖﹗一齊瞓吖﹗
我: 好呀﹗好呀﹗(當時係床尾餵奶，大頭妹係床頭，我只是答佢好...無諗過郁...EHHEHEH)
阿旺: 好呀﹗好呀﹗(9秒9跳上床)
大頭妹: 咪咪呀﹗咪咪呀﹗咪咪，一齊瞓吖﹗(咪咪即是我)
我: 好呀﹗好呀﹗(又虛應)
阿旺: 咁要唔要爸爸一齊瞓呀？(已經上咗床，瞓低咗)
大頭妹: NONO呀﹗咪咪呀﹗(推開阿旺)
阿旺: ...我出面好多家務要做﹗(靜悄悄離開)

EHHEEH...以上就是阿旺心碎的原因...