2012年11月2日 星期五

認人肓

其實....我真係唔知點解...我記性好好,但認人/ 記人就好差﹗ 我試過 3次之多,係街認錯我表哥,同人打完招呼,先知原來認錯人﹗又試過勁白痴,同個ex-boyfriend的ex-girlfriend打招呼 ,面善嘛...我記得我見過佢架...唔記得佢係邊個之嘛﹗自始之後...我通常都唔會同人主動打招呼,怕自己又再認錯人/ 同咗啲唔識我的人打招呼﹗

最近都發生過好幾單搞笑野﹗

案件 1: 陀住小丸子去產檢的時候,係醫院撞到個男人同老婆去做產檢,對方同我打招呼,我記得我見過佢,但對佢個名完全冇印象,之後我同阿旺講 "個個男的呢..好似係我大學同學,不過我完全唔記得佢叫咩名。",阿旺偷笑 "你唔知佢叫咩名係正常架,因為佢係你媽咪屋企個鄰居。"。oh...唔怪之得咁熟口面啦﹗

案 件 2: 噚日同阿旺去吉之島新開的麵店食麵,之後有個女人係旁邊行過同我打招呼,我又同返佢打招呼,之後阿旺話”呀﹗佢又會認得我地嘅?”,我當時心諗 "係囉,我地認佢就易啫,佢一日見咁多人都認得我地",我話 "係囉﹗帶我地睇樓個agent嘛﹗",阿旺偷笑 " 佢係家俬鋪職員呀﹗" 。


之前成日話太古無粉麵粥檔,依家有啦﹗間 5代同糖執咗,但又有咩用呢?2個人去食,1碗粥﹑1碗撈麵﹑1小食﹑加1可樂,都要 $94﹗真是經濟﹗﹗﹗




沒有留言:

張貼留言

Related Posts Plugin for WordPress, Blogger...