2014年3月28日 星期五

香港科學園的魔法之旅



上星期日大頭妹同爸爸出席了一個 blogger活動,原本我同小丸子都有份架,可惜我病咗,連帶小丸子都無得去﹗

由於活動是期間限定,而要有份去嘅阿旺出 blog,可能下年都未出到,唯有我呢個無份去嘅人 post返當日的相,同活動詳情比大家睇下﹗

當日大頭妹玩得好開心呀﹗有魔術表演睇,仲有攤位遊戲玩﹗

爸爸同我講...佢竟然...玩到唔記得去廁所,之後佢...瀨尿呀﹗之後我諗返,唔知係唔係因為爸爸好耐都無帶佢去廁所,所以依家跟爸爸唔識去 wee wee呢?﹗(因為之前奶奶話佢大個囡唔好成日帶佢入男廁,以前都係爸爸帶佢去廁所多﹗)

之後...我唔知佢地點過...又無帶多套衫...濕住咁過一個下午...


大頭妹同 3位魔術師合照﹗

活動詳情:

由依家至4月21日,逢星期日及公眾假期,科技園公司於香港科學園舉辦名為「探索科學‧魔法之旅」的活動,邀請了本地實力派魔術師,在金蛋裡表演魔術,參加者不但能欣 賞一連串有關科學的精彩魔術,還可參與魔幻科學工作坊,親手製造魔術小道具,化身小小魔術師,拆解背後科學原理,以及投入精彩豐富的魔術攤位遊戲。

活動期間,現場更設有小朋友最喜愛的奇妙彈彈床、大型氣球魔法陣及百變氣球派發,七彩繽紛又新奇好玩,、更有巨型魔術師在園內區與大家捉迷藏,讓小朋友盡情玩樂一番。大家更可在魔術道具大賣町中近距離搜羅各種道具,屆時有專人示範,與大家研究箇中竅妙。

日期: 3月16日、23日、30日
4月5日、6日、13日、18日、19日、21日
時間: 上午11時正晚上6時正
地點: 香港科學園二期浚湖樓地下中庭長廊及2樓高錕會議中心
費用: 每位港幣20元正
報名方法: 按此到網站預先登記







2014年3月26日 星期三

兩姐妹真好

上上星期,小丸子病病豬,有少少發燒同咳,夜晚咳得特別勁﹗連續 2晚我都要抱住佢瞓,佢先瞓到...不過之後就到我病咗﹗唉﹗一轉天氣小朋友就病,真是好頭痛﹗好彩今次無傳染埋大頭妹,唔係全家一齊病就真係好甘﹗

大頭妹話妹妹病咗,發燒要幫佢貼 "退熱貼"﹗

 出奇地...平時小丸子唔比人貼退熱貼架﹗但家姐貼佢...佢又唔出聲,仲好 "順灘" ﹗

所以好多人見過佢地都話阿妹好聽家姐話,教好家姐就可以教好阿妹,慳返啲功夫﹗

之後仲餵阿妹食藥﹗又係好順灘...不過平時佢地食藥一向都好乖,有時一個食,另一個又話要食,唔比佢食仲要喊...我都唔知應該開心/ 唔開心﹗

heheh...如果佢地成日都可以咁和平共處就好啦﹗

2014年3月25日 星期二

公園時間

唔知大家有小朋友的屋企有冇裝 cam?我地自大頭妹出世就有裝 cam,不過我就唔經常睇,工作時間睇 cam,如果比老闆見過一次,一定會覺得你一定係返工成日睇住個 cam,無心機做野,所以我都盡量唔睇﹗

而且好多時,都唔會見佢地,工人姐姐同佢地成日都係房,以前都會要求工人姐姐 "盡量" 係廳湊大頭妹,依家...工人姐姐肯湊 2個...就唔好咁多要求啦﹗再唔係只會見到 2個囡戇居居坐係梳化睇 DISNEY JUNIOR,好似好陰公咁﹗每次見到呢個畫面就好想做 FTM﹗

大頭姨姨話佢地係家有喜事個 2個老公公婆婆,電視 + sofa﹗ 今日好少少,仲有碗蘋果食下﹗

冬天少咗同小朋友去公園玩,之前話希望星期日出多啲街,後來都好似做唔到,成日係 facebook 見到有啲媽咪好勁,真係個個星期日都去唔同地方玩﹗放工 9秒9返屋企,帶 2個囡落公園玩﹗

小丸子比大頭妹好身手,好似 18個月已經識爬呢個架,仲要爬得幾快下﹗大頭妹好似成 2歲先識,仲要爬得好慢下 (佢個人好小心)﹗我拍咗片,拍咗幾次都唔成功,因為小丸子爬得太快,終於有一次比我影到,因為佢係咁想玩哥哥架單車,分咗心慢咗,我先影得到咋﹗

我係度扮 "大灰狼" 嚇佢地﹗

我問佢地咁點算,大頭妹話佢扮怪獸 "嚇"返走大灰狼﹗咁我就唯有扮比佢嚇到,然後走啦﹗


之後同 2個哥哥玩 hide & seek,大頭妹叫小丸子跟實佢﹗hehehe...好耐無同佢地去公園,原來小朋友去公園玩係咁可愛﹗

佢叫妹妹同佢一齊呢係滑梯底...仲好大聲咁同人講 "我呢係滑梯底呀﹗",我依家先知...原來 hide & seek...係咁玩嘅﹗

之後聽到小丸子同我講 "媽咪,我飛呀﹗",望一望...咁樣 sir落嚟?﹗

佢自己仲要好開心...呢個真係百厭人...好多次去公園都聽到家長同自己小朋友講,唔可以好似小丸子咁...heheheh...

之後個哥哥好好人,借咗架單車比大頭妹玩一陣,不過大頭妹都唔識踩﹗

小丸子又想踩,不過佢唔夠高﹗

今次去公園仲發現同小朋友講野真係要好小心,我真係有排學﹗話說佢地同一個小朋友一齊玩滑梯,小丸子排第一又唔 sir,我叫佢快啲啦﹗唔好阻住後面。之後到另一個小朋友,佢又係企係度唔 sir,佢媽媽又講同一番說話啦,叫佢快啲唔好阻住後面 (即是大頭妹),之後大頭妹又有樣學樣話: 你快啲啦﹗唔好阻住後面﹗我同佢話唔可以咁講架,咁樣無禮貌,佢即刻話: 姨姨可以咁講,我唔可以咁講。佢唔係用挑戰我嘅口問講,只係唔明所以問,不過我即時都唔知點答好﹗下次同小朋友講野真係要好小心﹗

2014年3月24日 星期一

Happy Friday@COCO壹番屋

好耐無見﹗好少甩 blog 甩咁多日﹗上星期我病足一星期,去到星期五終於病到落唔到床,等阿旺放工返屋企帶我去睇醫生,原來是 "氣管炎",比醫生鬧爆,話我點解唔早啲去睇醫生,唉...之前好似唔係好嚴重吖嘛﹗仲未好返,今晚仲要覆診﹗

時光倒流去返上上星期五啦﹗原本想同佢地去太古城個邊玩波波池,點知個晚有人開 PARTY,雖然好似都可以玩,但入面勁多小朋友一齊跑來跑去,又唔記得提工人姐姐帶襪,我怕我睇唔到 2個囡,所以都是返去吉之島玩木馬就算﹗好彩 2個都無扭計﹗HEHEHE...因為小丸子都未玩過太古個波波池,成 $50 玩 20分鐘,2個加埋即是 $100/ 20分鐘,小丸子出世之後,真係未玩過﹗

小朋友玩完之後就到我地大人食野啦﹗又食我最愛嘅咖哩飯﹗

去咗幾次,我今次先見到原來餐飲可以飲橙汁﹗

大頭妹有橙汁飲幾開心﹗

嘩...飲咗我 1/3杯﹗

今日餐湯係雜菜湯﹗

工人姐姐嘅咖哩雞飯﹗

我嘅咖哩豬扒飯﹗

仲有我最愛嘅福神漬﹗

飯加 $20可以另加 3樣食物,我揀咗餐飲﹑餐湯,仲有最重要嘅雪糕,雖然係跟餐,不過份量都唔細架﹗有 2球,仲有少少雜果﹗

呢個小朋友今日就開心,又有得玩,又有得飲果汁同食雪糕﹗

呢個小朋友就慘少少,有得食無得食﹗佢當時咳呀﹗就係佢咳傳染我架囉﹗

今次先見到佢地有兒童餐仲幾正,下次可以一齊食﹗

2014年3月19日 星期三

小丸子23個月成長誌

話咁快就 1個月,今個月小丸子就 23個月,下個月就 2歲了,仲未 PLAN 生日會,不過生日前會去台北,當係幫佢慶祝生日架啦﹗PARTY就應該同家姐一齊搞,阿旺成日都話怕麻煩,今年竟然話比我 BOOK場 (PLAY HOUSE/ MC DONALD'S),我懷疑梗呢個係唔係我老公﹗今年情人節又送禮物比我,哈哈哈,唔通中咗六合彩唔同我講?﹗

講返小丸子成長先,今個月因為入學要去醫生度 BODY CHECK,所以有磅重/ 度高,依然是 27-8磅,85CM高,佢好似 10個月已經 24磅,所以人人見到佢都話佢瘦咗,不過其實大頭妹 2歲都是得 22磅,佢已經大份好多,依家應該無超標,唔洗減肥架啦﹗

今年 9月就返學啦﹗真是好唔捨得小朋友大得咁快﹗講野唔算好快,我估都是正常啦﹗開始講簡單句子,電話係邊呢?﹗我唔食啦﹗爸爸返學﹗爸爸係廁所?﹗家姐打人﹗hehe...最得意係有時佢講啲野得大頭妹明白﹗好似有一次佢問爸爸攞支 smart pen,唔知講句咩 "嘩come",大頭妹就知佢叫 smart pen,原來佢係講 "welcome",支 smart pen 一開就會講 "welcome"﹗



睇下佢個肚,仍然有咁上下 "斤兩" 架﹗

超百厭,有人問係唔係我抱佢上去,其實...佢好早就已經識爬上去,好似搬去新屋之後就成日自己爬上去洗手/ 玩水,不過通常都係我在場,個日佢自己一個爬上去,我經過見到,佢叫我抱佢落嚟,我貪得意影底佢,佢就喊住我唔好影...

其實成日覺得做細好慘,加上轉咗工人,以前湊大頭妹個工人,好鍾意出街玩,日日同大一頭妹去街街,依家個工人就唔鍾意出街,係接家姐放學先有得出街,所以一出街就唔想返屋企﹗(咁我都明帶住 2個又好難出街嘅,不過叫佢朝早落下公園,又似都無...)

呢日我帶大頭妹上唱歌班,帶埋小丸子出去,佢真係玩足 2粒鐘﹗

第 2胎當豬養...以前大頭妹未夠 2歲...邊有得食薯片架﹗仲煲韓劇...(當人人睇梗 "來自星星的你",我睇緊 "主君的太陽"...慢人2-3季﹗不過睇晒 "來自星星的你" 同 "繼承者們" 嘅大頭姨姨,話 "主君的太陽" 最好睇﹗)

2014年3月17日 星期一

南乳炆齋 (附食譜)

每年新年去阿旺姑媽家都會吃南乳炆齋,而且阿旺姑媽煮得非常非常好吃﹗齋是一早炆的,我沒有機會跟姑媽學一次,不過我都有返屋企試煮,如是者煮了幾次,覺得味道合格,才出食譜的﹗當然同姑媽煮的,仍有一段距離,下次有機會一定要請教姑媽﹗

其實南乳炆齋不難煮,最難是要預備好多不同的材料﹗我通常都是星期六煮,平時好難要工人姐姐一邊看大頭妹小丸子,一邊預備太多功夫的餸菜,雖然最後都是我炒,但事前功夫是工人姐姐預備的嘛﹗

材料方面都好隨意,除咗津菜是必要的,其他菇類﹑豆品類都是可加可減,買到什麼就加什麼啦﹗不過其實我覺得...最畫龍點睛的是髮菜,我煮幾次都沒有加,我見姑媽是有加髮菜的,的確是有特別的風味﹗另外就是山根,上次加了山根,大家一齊 "尋寶"﹗

南乳炆齋

材料:
菜類: 津菜 1棵 (洗凈,切段)
菇類: 冬菇﹑木耳﹑金針(浸軟)/ 秀珍菇/
豆品類:炸枝竹 (枝竹亦可) 1包/ 山根 1包/ 炸豆腐卜
其他: 粉絲 (用熱水浸軟)

*其實材料都好隨意,可因個人喜好加減,不過最好都要有 5款以上,咁先有唔同口感﹗另可加: 紅蘿蔔/ 栗米芯/ 草菇/ 髮菜/ 荷蘭豆

調味料:
南乳 1磚/ 酒 少少/ 老抽 少少/ 片糖 少少 (可用黃糖代替)/ 麻油/

做法:
1. 先把冬菇/ 木耳 (浸軟)/ 秀珍菇/ 草菇飛水,可除菇的草味,到煮的時候出少啲水。
2. 再把炸枝竹/ 山根/ 炸豆腐卜出水,這個步驟一定不能 SKIP﹗我上次忘了影一影出水後個一煲水...見過大家就明...飲咗個煲水...一定身體健康﹗﹗﹗ 
3. 先炒津菜,盛起備用。
4. 用麻油起鑊,加入南乳﹑紹酒煮開 (有需要可加入煮津菜剩下的水)。
5. 加入全部材料略炒 (令所有材料都佔上南乳醬),再加入老抽﹑片糖,煮先全部材料軟身即可。


2014年3月14日 星期五

阿旺的情人節禮物

話說今年唔知點解阿旺會買情人節禮物比我,好似由拍拖到結婚 12年都是第 2次,但上一次,亦是唯一一次嘅鑽石介指,最後因為花咗,退咗錢,之後佢用咗嚟交學費...即是佢自己用返﹗反而我今年咩都無預備﹗其實我覺得我地現代人生活富足,真係無咩特別野要留返情人節送﹗平時睇岩都買咗啦﹗

之後諗下諗下,之前阿旺想要條做運動嘅 legging,不過樓下間運動鋪無,我就去太古望下啦﹗我呢啲師奶好out架嘛﹗都唔知咩運動 legging,男人老狗著 legging?﹗入到去就問下售貨員,原來真係有﹗仲要好多牌子都有出﹗佢帶我睇第一個...我都唔識咩牌子...成 $800-900條...著完變 "劉翔" 咩 (好似最近我地女仔 (女人?)個個都想要支 YSL唇膏,聽講炒到成千蚊,搽完變 "千頌伊"?係又抵喎﹗) ?﹗之後再介紹 NEW BALANCE 同 ADIDAS,價錢就正常返少少,$300幾一條 (我都覺得貴架啦)﹗ADIDAS多啲款,都靚啲,可惜斷晒碼,最後買咗 NEW BALANCE﹗

之後又發現原來阿旺得一條運動褲,佢之前一個星期跑 1日,今個月買咗 WATERFALL BEECRAZY 個優惠,一個星期做 2 -3次 GYM,就發現條運動褲乾唔切。我又走咗去 UNIQLO 買咗套運動衫比佢, 衫﹑褲各 $129,一套 $258,以為好平啦﹗原來呢啲運動衫本身都唔貴架喎﹗ADIDAS都係 $199,仲有 9折,即係都係 $179,貴 $50...買個 LOGO...HEHEHE...結果我又買多一套﹗不過褲就買咗另一款型仔啲嘅,跑步長褲,要 $379,所以最後套 ADIDAS要 $520,足足貴過 UNIQLO 個套 1倍﹗之後仲買多咗條 ADIDAS LEGGING,因為岩岩返咗貨﹗HEHHEHE...比大頭姨姨話我用 $88買 COUPON做 GYM...但就用多 $888都唔只去買衫...UM..."工慾善其事,必先利並器" 嘛﹗但要利其器,就先要銀包出血囉﹗HOHOHO...敗家萬歲﹗

阿旺好識做咁係 FACEBOO PAGE留咗呢句: 多謝老婆送的運動套裝,跑得很爽,很型!WAHAHAHA... 做得我老公...型就最基本架啦﹗
 運動服: UNIQLO,LEGGING: NEW BALANCE
 

呢套就係另一套 ADIDAS啦﹗問過阿旺,佢話其實同 UNIQLO 個套,著上身真係唔大分別﹗多個 LOGO就型仔啲囉﹗WAHAHAH...都預咗,因為始終大家都係百幾蚊貨仔,我見佢有啲要 3-400嘅,可能質地就會有分別啦﹗
運動服:ADIDAS

件 UNIQLO 嘅近鏡﹗


 件 ADIDAS 嘅近鏡﹗
 

 仲有 ADIDAS LEGGING﹗



大家 LIKE咗我地個 PAGE未呀?﹗未就快啲 LIKE啦﹗









2014年3月13日 星期四

節瓜赤小豆薏米瘦肉湯(附食譜)

一年四季...我最最最唔鍾意就是春天,又濕又焗,今年就又濕又凍,小朋友都易病啲﹗我家工人姐姐就不停問我幾時先凍完﹗heheh...佢地印尼人,真係好怕凍﹗今日想介紹一款好岩春天飲嘅湯水,春天一星期飲一次,有助去濕﹗

節瓜赤小豆薏米瘦肉湯
材料: 節瓜 2條/ 赤小豆 2湯匙/ 生薏米 2湯匙/ 熟薏米 2湯匙/ 慈實 2湯匙/ 瘦肉 300g

做法:
1. 瘦肉飛水備用,藥材洗淨,浸30分鐘。
2. 煲滾 2.5公升水,將所有材料放入,大火煲滾之後用小火煲 1-2小時。
3. 下鹽調味。


2014年3月11日 星期二

晚餐@和民

呢餐好耐架啦﹗
每逢和民做啲套餐優惠,我地一家都會去食下,因為都真係幾抵食,尤其以太古區來計,剛搬來的時候,直頭是我地嘅飯堂﹗

 heheheh...係都要揹我個背包﹗

其實我諗姐姐唔係好想出街食架咋﹗因為湊住小丸子,佢根本就無啖好食,所以我地通常都會叫個飯比佢,咁佢起碼都知自己有個飯食下吖﹗

因為太耐,已經唔記得個套餐有啲咩,自己散叫咗啲咩啦﹗












大頭妹唔肯食...不過都肯乖乖地自己坐...小丸子...真係...有半餐飯時間出咗去...因為我地怕佢擾到其他人...
Related Posts Plugin for WordPress, Blogger...