2014年6月30日 星期一

靚媽週記 (6-11 June 2014)

唉...最近好努力扮靚,但換來的是我老公讚我 "美魔女"﹗

 美魔女唔係意思年過 35歲,仲保養得宜的女士咩?﹗其實我仲有 2個月先 35歲囉,我仲未算係美魔女架﹗我就算唔可以叫美少女 (30幾歲人仲叫少女又唔得),都仲係美女吖﹗無理由叫我美魔女嘛﹗阿旺 "美魔女" 的宣言是係 what'sapp 姊妹群組講完,之後我兩個妹笑佢...女人未年過 40 - 50,都唔好叫人美魔女...否則...其實係 "貶" 意﹗

又想記錄一下自己一個星期的 look﹗不過我次次都無恆心,今次又唔知可以維持幾耐啦﹗

20140606

top: topshop / pants: uniqlo

20140609

top: uniqlp / short pants: zara

20140610

one piece: b+ab

20140611

top: indivi / pants: Giordano ladies

大家 like咗我地的 facebook page未呀?﹗未就快啲 like啦﹗多謝支持﹗


2014年6月27日 星期五

Lancôme Lip Lover - 化出 3個不同感覺的妝


多謝 she.com x Lancôme 的試用邀請﹗

真是好開心,印象中是我第一次收到試用化妝品的邀請﹗今次要試用的是  Lancôme 最新推出的 18款 LIP LOVER 唇蜜的其中 3款唇蜜,仲有 Lancôme 的皇牌產品 Hypnose Star Mascara﹗對我來講都幾挑戰性,因為要用 3隻唔同色系的唇蜜化 3個唔同的妝,哈哈哈,我好耐都無好認真咁化妝,唔知大家仲記唔記得其實我之前係想做化妝師的 (早期的讀者可以會知),今次可以比我滿足一下﹗

Lancôme 今次新推出的 LIP LOVER系列唇蜜,試用後我覺得佢質地介乎唇膏與唇彩之間,比一般唇彩實色顯色,但同時就有唇彩的光澤感。平時用唇彩要成日補,佢就幾持久,而且好滋潤,岩晒我呢啲少補妝的懶人﹗


第一個妝,用上 339 Fuschia Attitude ,是今期大熱的桃紅色
基本上今季化妝袋入面,一定要有一支桃紅色唇膏架啦﹗由於將重點放係咀仔,我只是用了基本的啡色eye shadow,同淺粉紅色胭脂,唔好搶個咀的鏡﹗襯返件粉紅色 TOP,帶出柔和明亮的感覺﹗


第一日唔記得影個咀的近鏡,以下係第 3日用完 332 Beige Adage,抹咀後再加 339 Fuschia Attitude 係面的,所以會比單用 339 Fuschia Attitude淺色咗少少﹗


第 2個妝,用上 355 Framboise Etoile,是紅莓色
原本打算襯返條 little black dress,試個 elegant look,不過又好似太傳統﹗最後試一個清爽啲的做型,襯返比人感覺 casual 的橫間 top,只用少少香檳金 eye shadow,加黑眼線同濃濃的 Hypnose Mascara﹗搽得紅咀就記得唔好再用藍/ 紫眼影啦﹗唔係就好 80年代架啦﹗

呢隻 355 Framboise Etoile 無另外 2隻咁實色,似返唇彩質地,所以就算鮮紅,都唔算難 handle,佢仲係 LIP LOVER系統入面,3款必備色之一﹗

第 3個妝,用上 332 Beige Adage,是明亮的裸色﹗
3隻色之中看似最平凡,但用來襯 smoky eyes,簡直就是 perfect match﹗我用咗紫色 eye shadows做了一個返工的 "小 smoky",襯上裸色的 332 Beige Adage,效果出奇地好﹗是 3個妝之中,我自己最滿意的﹗


襯返一條白色 one piece,效果好溫柔呢﹗(雖然...我...唔溫柔)

332 Beige Adage比較實色,有少少似有光澤的唇膏﹗我覺得單用,或者薄薄一層用來打底用,中間再加返 339 Fuschia Attitude/ 355 Framboise Etoile,做個花瓣唇都唔錯﹗

最後就講下支 Hypnose Star Mascara,佢已經出咗 10年,一樣美容產品可以係市場 10年而無被淘汰就知係好野啦﹗我一向都最注重 mascara,有時星期六﹑日唔化妝,都可能用 mascara 加眼線,等個人望落去醒目啲。試咗 3日,無論防水/ 防油方面都好出色,我最怕化完個妝,因為 mascara 甩色,到放工時間就出晒熊貓眼,之後又要用紙巾又抹又印,我地去到某個年紀,盡量都唔好去抹對眼啦,一陣出眼紋,搽多多 eye cream都補唔返。 Lancôme 的 Hypnose Star Mascara 絕對無呢個問題,難怪是 Lancôme 的皇牌產品啦﹗再加上我是 "淚點" 超低的人,一日唔知喊幾多次,搵我去試 mascara 防唔防水,真係太適合啦 (愉笑)﹗

佢個刷頭係前尖後圓,連細微的眼頭/ 下眼睫毛位都可以照顧到﹗好容易就做出濃密的捲曲效果,而且唔黏膩,唔易結塊。卸妝的時候都係用 eye make up remover輕輕力抹下就ok,唔會太麻煩。

LIP LOVER系列於 6月20日於 Harvey Nichols (Landmark / PP / The ONE Beauty Bazaar) 率先發售。7月1日全線正式發售 (售價 $230)。今次我有得優先試用,真是好開心呢﹗


Lancôme website: http://www.lancome.com.hk
Lancôme Facebook:  https://www.facebook.com/lancomehk





2014年6月26日 星期四

Fujiyama Go Go拉麵


上 2個月,有一日 lunch time 落咗尖沙咀做野,即埋打比阿旺睇下佢食 LUNCH 未﹗一直都想試下佢朋友係尖東開的拉麵店﹗係 "忌廉哥" 旁,食完可以去探下忌廉哥﹗不過我個日見唔到忌廉哥﹗

講返佢朋友間拉麵店,都幾出名架,我同大頭姨姨講起,佢都食過,係 OPEN RICE有唔錯評價﹗我地自己識得個老闆就明白,好評都是有理由,老闆親自飛去日本超過半年學煮拉麵,由湯底到煮麵都要跟足日本店,才取得開分店的資格架﹗湯底是雞骨加豬骨,所以除咗有豬骨的濃,仲有雞骨的甜,每日一早 5:00- 6:00 就要開始煲,絕對唔係個啲幾十蚊大大枝的濃縮豬骨湯可以比美﹗

三眼仔拉麵...HEHHE...因為我唔知本身已經有半隻蛋,加咗 1隻蛋變成 3眼仔拉麵﹗

阿旺推介,芥末醬雞軟骨棒 (我作嘅...我唔記得咗個名啦﹗),阿旺每次都必吃﹗

呢碗係阿旺的...我估...佢朋友應該加咗豬比佢...無理由有咁多架﹗

富士山 55
尖沙咀麼地道75號南洋中心地下7-8號
2723 7737

2014年6月25日 星期三

小丸子 26個月成長誌

眨下眼小丸子就 26個月,過多 2個月就要返幼兒園,算是脫離 bb 階段,真是有少少唔捨得﹗另一方面又好擔心,小丸子無大頭妹咁獨立,返幼稚園應該會是一個幾大的挑戰﹗

上個月佢病咗,今次反而唔係咳得好利厲,初初又無發燒,不過阿旺都話帶佢去睇醫生,本來以為好快會好返,點知我夜晚同佢按摩的時候發現佢耳仔下面有粒野腫咗﹗我仲問阿旺係唔係老人家講個啲 "痰火核"﹗我按的時候小丸子話痛,因為我反應太大,仲嚇親佢,我見佢好似好驚,自己都不停摸下腫起個位﹗第 2日未食晒啲藥架,我地都即刻同佢復疹先﹗醫生話係啲痰同鼻水的菌出唔到嚟,積咗響度,係 "淋巴核",要食 7日抗生素﹗

 自從佢病咗幾日,忽然每朝都唔比我返工,叫我唔好返工,留係屋企。之後就要跟埋我落樓,去到公園有野分心,我再同佢 bye bye,咁先容易啲走得甩,有時送到我落地鐵站,又有時我呃佢去超市,等佢坐上車仔,我再同佢 bye bye。令我更加擔心佢點返學,我估唔可以係我帶佢返學,要阿旺帶佢可能會好少少。

見唔見到呀?﹗耳仔下面個位腫咗﹗

影相唔係好覺眼,最大的時候有時 2cm大。



哈哈...有一晚入房...忽然發現自己多咗個仔...hehehe...即刻影底,仲拍醒阿旺叫佢睇﹗其實係佢條褲太窄,谷起咗條片,加埋燈光...做出呢個 "方力申" 效果﹗

2姐妹依家會一齊玩啦﹗不過今次我覺得係大頭妹玩小丸子﹗

睇住佢亂搽,佢就卡卡笑﹗

hehehe...其實佢日日睇我化妝...有一日我教咗佢畫眉,用 "無芯" 的眉筆,之後佢就成日自己畫,不過用唇彩﹗

貪靚丸超開心﹗你就開心得過,我支 lip gloss新架﹗﹗﹗

大頭妹讚佢靚仲 blink blink眼...你唔係真係覺得自己靚架嘛?﹗

一開心就流口水...真係好恐怖﹗

嗱...我專登影佢架﹗睇佢個樣...係唔係笑阿妹...太唔要得啦﹗

我估小丸子咁貪靚...係遺傳自阿旺...同一日...佢無啦啦問我攞磨沙膏,又偷我啲 paper mask用...佢用得仲密過我呀﹗﹗﹗




2014年6月24日 星期二

COTTON CANDY KIDS 小朋友太陽眼鏡


哈哈哈,係 facebook 見到 2個囡戴太陽眼鏡啲相就忍唔住笑,因為影相個日發生咗啲搞笑野﹗

話說個日我地食完飯,已經 9:30,我帶埋 2個囡去太古城影相 (收到啲 sponsor products,唔想次次都係屋企影咁悶),夜麻麻...幫佢地戴太陽眼鏡行出街,大頭姨姨出門口時已經問我唔會太黑咩?﹗我又不以為意﹗

之後預備出門之際,大頭妹話: 媽咪你可唔可以開返燈先呀?﹗ 我話: 吓﹗已經開咗燈架啦喎﹗心諗...原來周星馳啲電影...係真架...唔怪得咁好笑啦?﹗真是笑死我啦﹗

再之後落到街,不停聽到小丸子口中唸唸有詞...聽清楚啲...原來佢話: 好驚呀﹗好驚呀﹗(個頭不停 2邊令) 嘩哈哈哈...我好衰...我仲笑得出,因為佢個樣真係好可愛,可能條街已經黑,佢再戴埋黑超,真係咩都見唔到,佢有叫我抱佢,我又同佢講出街玩要自己行﹗哈哈哈﹗諗返都覺得佢好陰公加好笑﹗

講完 2個囡的笑料,講返幅太陽眼鏡先啦﹗

Cotton Candy Kids 今次推出自家太陽眼鏡,一共有 7款,價錢大約是 $88-108,非常實惠﹗7款都好靚,最後我揀咗白色心心,黑色鏡面反光的,因為覺得比較少見﹗另外,CCK太陽眼鏡的鏡片是採用 Sunglasses UV Filter Category 3,可以放心比小朋友戴﹗唔知 Sunglasses UV Filter Category 3係咩?﹗唔緊要﹗CCK 個 website 有講﹗

買太陽眼鏡要注意一下吊牌的標示,照規定有分 4個Category:
Category 1 是Fashion accessory, 沒有抗UV功能
 Categoty 2 有減光和抗UV功能
 Category 3 有良好的減光和抗UV功能
 Category 4 不適合開車使用

唔好以為買太陽眼鏡比小朋友,求其揀個靚款就ok,保護小朋友的眼睛都好重要﹗上次睇新聞講啲 "假太陽眼鏡" 無抗 UV功能,戴完之後 "瞳孔" 會因為環境暗咗而放大咗,但又因為無抗 UV,所以反而會吸多咗 UV﹗吸 UV 又有咩問題?﹗白內障就是因為吸得多 UV 而形成, 人人都有機會有,只是早定遲的問題﹗如果戴咗劣質的太陽眼鏡,就真是唔戴好過戴啦﹗

點解我好似咁清楚?﹗我以前同媽咪一齊去 LENSCRAFTERS 亮視點驗眼嘛﹗

睇下大頭妹同小丸子示範啦﹗

第一幅是黑框反光鏡片的一款﹗我覺得男仔女仔都好岩戴﹗

戴完之後即刻型女晒﹗

第 2幅係白色心心﹗

呢款就易襯衫,而且好 SWEET SWEET﹗白色心心又無粉紅色咁 CHILDISH﹗

呢款的鏡片是啡色的。

TROUBLE TWO...就是...你想影到佢都幾難...叫佢企佢就跑,叫佢跑都一定唔會企,只會跑得更快,我就係商場跑來跑去追住佢嚟影﹗

好難得先影到呢幅﹗

可能跑耐咗...終於肯坐底啦﹗

原來食完飯落商場跑下影下相都幾開心,不過如果成日落去跑,唔知個商場會唔會 BLACKLIST我地呢?﹗

最後特別嗚謝 CCK﹗產品由 CCK 提供﹗



2014年6月23日 星期一

雙職媽媽的育兒迷思


自從生小丸子之後,做過 2個月的全職媽媽 (舊工人走了,新的未到),自己試過一湊二,每日對住 2個寶貝,我見知原來我都有做全職媽媽的天份,原來我對小朋友比我自己想像有耐性﹗

有睇開我的 blog的朋友們,其實都知我成日讚大頭妹乖,小丸子就比較 "元氣"﹗其實我覺得除了跟本身性格有關之外,自小的管教都有好大關係﹗

對於雙職媽媽來講,有一事件其實好悲哀的﹗就是一日對住自己寶貝最長時間的,是工人姐姐,而不是自己。就算好似我可以準時放工,公司和屋企又不算遠的,返到屋企都差不多 7:00 (可能有好多媽媽仲未放工),又好似大頭妹和小丸子是夜瞓一族,夜晚成 11:00才睡覺,我一日都是對佢地 4小時,工人姐姐就由我地返工的一刻對到我地放工為止,起碼都有 11-12 小時,扣返午睡的 3-4 小時 (應該沒有這麼多),起碼都有 8小時﹗是我一倍的時間﹗所以雖然我成日話管教小朋友不可以假手於工人姐姐,人家收你 $4000一個月,要幫你煮飯﹑洗衫﹑打掃﹑照顧小朋友,仲要幫你教囡嗎?﹗

以前照顧大頭妹個工人姐姐本身好鍾意小朋友,又湊過3個小朋友,所以照顧大頭妹都照顧得幾好。依家照顧小丸子個工人姐姐,無照顧小朋友經驗 (佢之前係新加坡有照顧一個小朋友,不過因為同老人家一齊住,佢根本都唔洗照顧,只係 "執頭執尾"),之前係印尼都係耕田,所以唔係太識教小朋友,又偏心小丸子,小丸子打家姐唔會出聲,大頭妹打阿妹就會話 2句,見佢地naughty又唔stop佢地,所以間屋 "花晒',好多玩具又爛晒﹗我成日同自己講錢財身外物,不過比佢寵咗隻 monster出嚟,就真係幾頭痛,所以依家罰小丸子,小丸子會大叫 "姐姐救命呀﹗"。

最簡單如我要求工人姐姐每日要佢地自己坐定定食飯,但每次看 cam 都會見到小丸子走來走去,大頭妹就 4歲都仲要餵。到星期日,2個又可以自己食,仲會自己收拾,當然是我要求的啦﹗但大頭妹都會記得,星期日要自己收拾。我問佢星期一到姐姐照顧佢的時候,佢可不可以幫手收拾?﹗佢竟然答我不可以,因為姐姐會幫佢﹗




大頭妹係茄汁怪人,逢係茄汁食物都鍾意食﹗

2個囡的口味完全相反,我通常都就大頭妹,因為佢食得少,所以今次到小丸子唔食﹗唔知咁岩得岩橋,定 2歲的小朋友原來都好奸?﹗我要佢食晒就自己收拾,佢竟然用益力多樽同生果杯,壓住佢食唔晒的意粉﹗﹗﹗生果又食咗提子無食士多啤梨﹗

比我拎開嚟睇,仲要唔滿意﹗我話食唔晒就無奶奶飲架啦﹗佢話 ok﹗

結果到下午奶的時間...爆喊﹗不過我都係唔比佢飲﹗2歲都唔太肯食固體,但就飲 3餐 8oz奶﹗

其實好羨慕全職媽媽,不過岩岩計過,出年小丸子返埋 pn,2個囡的學費,加大頭妹 2樣的興趣班就已經 $8000有多,真係供多層樓,想做全職媽媽,好似真係唔太可能﹗


2014年6月20日 星期五

產品試用: adidas Sport Energy動能量男士止汗噴霧

 

多謝 adidas PR邀請我試用 adidas DryMax系列最新推出嘅「adidas Sport Energy動能量男士止汗噴霧」!
 
先講講試用感﹗


夏天的時間,很多時就算唔係運動,在街上行走時都熱到流很多汗,就算之後在有冷氣的地方都難免會有 "濃烈的男人味" (偷笑),用了adidas Sport Energy動能量男士止汗噴霧,又可以止汗,又有少少香味可以當香水用。放心...佢嘅香味很自然很清新,不太濃烈 (有少少男士古龍水的味道﹗),上班前使用都可以留到下班。

噴上皮膚之後就馬上有涼涼地的感覺,不會感覺太笠,我敏感皮膚用都OK無問題。

很喜歡使用它後的地方不會有痕跡,不會有白色粉末。

我今次試用的是全新升級長效72小時止汗因子,另外仲有一款 48小時止汗因子,2款都是故41.9,相當經濟﹗
adidas DryMax action3  體驗無限可能
  優良專利配方 - 48小時止汗因子及全新升級長效72小時止汗因子,適合不同場合所需
革新清爽技術帶給你極度乾爽清涼的感覺
有效抑制異味,能讓你時刻安心使用,盡情發揮體能
不留痕跡配方,噴霧使用後不會在皮膚上殘留白色痕跡 
 溫和配方通過皮膚測試,不含酒精及影響皮膚pH
簡約設計帶來更方便的使用體驗
與運動員共同研發,更清楚了解運動人士的需要


大家 like 咗我地 facebook page未呀?﹗未 like就快啲 like啦﹗

Related Posts Plugin for WordPress, Blogger...