2015年6月10日 星期三

大頭小丸@BB醫生



2015年 6月7日 (星期日)

今日帶大頭妹同小丸子去參加 BB醫生﹗之前想參加好耐,不過之前參加要聽一個講座,成日都抽唔到時間去聽,所以一直都報唔到名參加﹗依家改咗,唔洗先聽講座啦﹗岩岩又見到一個時間同地點都夾到的探訪,就參加咗啦﹗

我自己嫲嫲住過老人院,之前我成日會去探佢,雖然話係成日,其實都是一星期一兩次,每次去探嫲嫲,佢都會好開心﹗老實講,有邊個老人家想住老人院,個種孤獨,我地唔會明白,所以我都好希望我地可以帶到一份愛,一份熱鬧比老人家﹗(不過其實我地今次去的是長者屋) 

 一去到首先同公公婆婆打招呼﹗

大頭妹同小丸子都做得好好﹗其實小朋友天生就有感動人心的力量,公公婆婆見到小朋友都好開心﹗

打完招呼就坐定定等 "表演" 比公公婆婆睇﹗今次有成 20幾個小朋友參加﹗

主持問邊個小朋友想表演先﹗我估都估唔到,小丸子竟然第 1個舉手﹗大頭妹第 3個舉手﹗正當我心諗小丸子知唔知自己舉手做咩,主持一叫佢個名,佢就真係自己行出去,之前都有同佢講過,叫佢表演唱太陽伯伯,佢出到去我問佢唱太陽伯伯好唔好,佢答我好就開始自己唱啦﹗大頭妹仲係台下叫佢唔洗怕羞﹗


 因為小丸子第一個表演咗,連帶大頭妹都要第2個出去表演﹗大頭妹有少少緊張﹗佢表演跳 "小孔雀",其實是佢幼稚園畢業禮的表演,依家老師同佢排梗舞,我叫佢當今次是 REHEARSAL,佢話 OK試下,不過好緊張,因為平時都是一班同學一齊跳﹗結果佢跳咗一半,我見佢停落嚟,就問佢係唔係跳完,見佢都好緊張,我都唔迫佢完成啦﹗不過之後去佢對自己完成唔到個表演好耿耿於懷﹗


表演完之後,送貼紙比老人家﹗



一齊食﹑一齊玩﹑一齊坐﹗對老人家來講真係好重要﹗

仲有一條手帶﹗

最後仲有一齊表演同大合照﹗小丸子上到台又搶咪﹗真是估唔到原來佢咁鍾意表演﹗最搞笑係主持話唱生日歌,問邊個 6月生日,小丸子又舉手,叫 "我我我",之後大頭妹即是好大聲話 "唔係呀﹗佢 4月生日架﹗",真是好搞笑﹗
有時你以為自己做義工是去幫人,原來有得著的是自己,我今日見到 2個囡上台,開心表演,我自己都好開心﹗佢 2個都好開心,之後仲同爺爺嫲嫲講自己去探老人家,小丸子仲不停同爺爺講好掛住佢,好擔心佢,HEHEHEH...真是冧到爺爺呢﹗今次真是一個好好的 EXPERIENCE,下次有機會一定會再帶大頭妹同小丸子去參加﹗

後記: 之後大頭妹去爺爺嫲嫲屋企,瞓晏覺之後,忽然喊醒,佢好少會咁,我以前問過佢,佢話佢唔會發夢 (小丸子成日發夢)。我估佢係表演太緊張啦﹗佢話見到好多 monsters,我估佢發夢見到的 monsters 是台下的觀眾,hahaha...希望下次個傻妹唔會再咁緊張啦﹗因為佢跳舞的時候,有台下的小朋友笑,佢以為人地笑佢,我同佢講,係因為佢跳得好,台下的觀眾先會笑。如果佢今次覺得自己跳得唔好,咁下次就要做好啲,唔好令自己後悔﹗

大家 like咗我地的 facebook page未呀?﹗未就快啲 like啦﹗

 


沒有留言:

張貼留言

Related Posts Plugin for WordPress, Blogger...