2015年11月30日 星期一

小丸子上畫班

不得不承認,小丸子係冇大頭妹細個上咁多興趣班,唔係偏心,真是資源問題,得一個小朋友的時候,什麼都想最好,有 2個之後真是無辦法唔向現實低頭,家姐已經開始了的興趣班好難 cut,自己唔想佢半途而廢,所以唯有 cut 阿妹的,佢都未開始上,其實都唔算 cut,只是遲啲開始囉﹗

小丸子夠 3歲就幫佢排屋企樓下的畫班,唔係因為出名所以要排,只是因為好抵 $350/ 5堂,即是 $70/堂﹗

小丸子上 K1之後真是乖咗﹗有日我偷睇佢上堂,我真是估唔到,原來佢依家上堂可以咁專心,可以坐得咁定﹗佢完全唔為意我偷影佢﹗

登登﹗第 1堂的傑作﹗畫 FOX﹗

第 2堂是老鼠...不過唔係好睇得出﹗


大頭妹都有上同一個畫班,不過上唔同時間,大頭妹呢幅是貓﹗

有一日大頭妹話要自己接妹妹,叫我行埋一邊,等佢叫名。

終於接到妹妹,小丸子即刻比家姐睇下佢嘅大作!

好搞笑,大頭妹真是好認真咁睇!

2015年11月28日 星期六

近況- 工人姐姐

話說我工人姐姐一直的工作表現都是麻麻地,中英文都唔係太溝通得到,上一次同佢續約,主要都是為咗小丸子。之前大頭妹 2歲時轉工人,由好多野講,到之後有一排唔講野,其實到依家都唔多野講 (係我面前,我唔係度佢又好多野講),我唔想又轉工人,大家習慣咗就算,最重要都是要湊到 2個小朋友﹗咁佢算幾惜小丸子,不過就唔太理大頭妹﹗

佢原本就應該 2016年 7月完約,我無諗住咁快要同佢傾續約,我無打算同佢續,以佢的工作表現,我唔覺得值得比 long service 去留佢,而且之前佢自己話做 4年就返去結婚,所以我亦唔知原來佢想做多 2年﹗

佢 9月時忽然做得好好 (依家諗返佢可能想續約),之後 10月份的時候,佢問我攞返本 passport,之後就開始做得好差,我有問過佢係咪有咩事,點解攞返 passport 之後,做野就差晒,問佢係唔係借錢,佢又話唔係。之後我問佢攞返本 passport,佢又比返我,但過咗一個星期佢又再問我攞返,今次佢的理由是話星期日出街警察會查,根本就唔係理由,之後我都同佢講,如果你要搵新僱主,就早啲通知我,因為我搵工人都要時間 (其實本passport最初係佢話放我度,佢話怕朋友問佢攞 passport 借錢)﹗

之後成個 10月都做得好差,大頭妹同小丸子轉晒下午班,叫佢要 11:45前一定要出門口等校車,佢就成日到 11:30都仲食梗 lunch,2個校服都未換,自己做得慢唔夠時間,加上有時 2個囡又唔太合作,佢就攞大頭妹出氣,因為佢知大頭妹唔會講返出嚟,小丸子有咩事是會即刻投訴嘅﹗有一次我問返大頭妹,原來佢話姐姐會打佢,不過我問晒成件事之後,覺得大頭妹都有唔岩的地方,我就無特別同姐姐講,只是叫大頭妹要乖啲,同埋如果姐姐再打佢,佢就要即刻話我知﹗

到終於有一次連阿旺都問工人姐姐最近咩事,佢先話原來佢比人呃咗錢,買咗份唔知咩保險,好似金額是大約 $7000 (計埋供款可能唔只呢個數),但其實呢單野我知道是佢上次續約時的事,佢話佢放假返嚟就唔見咗個個人﹗佢比份保單我睇,全部印尼文,我就叫佢自己搵 agent,比 agent 睇下啦,佢又話搵唔到 agent,之後我就幫佢約 agent,打算順便講下佢最近的工作表現。

佢可能以為我地帶佢見 agent 係炒佢,個晚返屋企,佢話自己搵到新僱主係杏花村,2月就返新工,咁我地就叫佢自己寫返封辭職信,做到 12月啦﹗佢又問我地唔係炒佢咩,我地話我地從來無話炒佢喎﹗佢又話咁佢會做到 7月,仲話想唔放星期日揾多啲錢﹗

我地見佢怪怪地,之後個星期一叫奶奶過嚟幫手睇下 2個囡,點知工人姐姐真是癲咗﹗我奶奶講返姐姐全日都失常,同佢講自己撞邪,話我屋企有鬼,又話成日發夢有印尼小朋友要捉佢,佢下午話要去新agent度攞返 passport,返嚟我奶奶叫佢做野,佢就走去沖涼,沖完又話再沖,之後又話要出去,然後拎走晒自己啲行李,返嚟之後又話自己要出去上堂,我奶奶叫佢煮飯,佢話我都唔做,點解仲要煮飯。

佢當日下午佢打比我問我去agent度時,我話唔得,佢同我講我break contract ,佢同日的較早時間同我老公講咗,未同我講。我話你辭職都要比1 month我啦,我話最快要做到8/12,但我地想佢做到31/12 或26/12(出糧日方便我計數),佢話佢可以做到21/12。佢唔應該識 break contract 呢個英文,我覺得係有人教佢﹗之後我放工返屋企,我咁岩要洗牙,佢又話要出去,我話佢今日已經出咗去2次,唔可以再出去,我要去洗牙返嚟先傾。我走咗佢就發癲尖叫大喊,嚇到小丸子一齊喊,我奶奶就call我,我老公,老爺,我地全部返屋企。

我第一個返到屋企先,佢又正常無野,話自己做到23/12。之後我老公返到,佢又癲過,話唔見咗passport,但佢passport其實係keep咗係佢自己新agent度,佢話佢下午去人地唔比返佢,我老公話陪佢去拎,我奶奶話一齊去。之後阿旺話佢遇到神蹟,去到agent已經走咗,得個印尼人,阿旺`扮話約咗個agent,個印尼人問佢咩名,自己講咗兩個名Roy/ Michael ,阿旺話Roy,佢話幫阿旺搵,佢地就出咗去打算食野先,點知一行出去,我工人就話見到個agent,原來真是Roy。之後佢地攞返passport就走,阿旺話佢望到張 contract得姐姐簽名,個新僱主都未簽。但我搵唔到我地個agent,叫返阿旺朋友幫手,之後佢幫我地傾好晒,再送佢返佢地宿舍,再送佢去機場返印尼。

最後阿旺都賠足比佢,佢話心安理得﹗連埋機票 $3900,再加請新工人,又唔見 $2萬啦﹗鳴鳴鳴﹗

後記: 最後我地覺得工人姐姐好似有焦慮症,無記性﹑發惡夢﹑成日去廁所...依家諗返佢可能想我地同佢續約,要做多 2年先夠錢返印尼,見我地唔講,自己就出去搵僱主,但又好擔心,因為佢其實嚟我地度做就是第一次出外打工﹗越擔心越做得唔好,越做得唔好越比我地話,之後就一個惡性循環,終於一個月就爆煲﹗

2015年11月26日 星期四

產品試用: 雞仔嘜 TECHWOOL 系列


多謝雞仔嘜的厚愛,每年差不多天氣轉冷,就會收到雞仔嘜公關送來的保暖內衣﹗由【心膚吸】到【心膚吸 INFRA】遠紅外線保暖內衣,到今年的 TECHWOOL 系列﹗

 


今年 TECHWOOL 系列最特別的地方應該就是外型啦﹗用上運動型貼身彈性剪裁,望落一啲都唔似內衣,加上加強吸濕排汗的功能,冬天著來做運動都可以﹗

我揀了黑色拉鍊的比阿旺 (另有灰色)
睇下阿旺的示範,真是就咁著出街都唔會有問題﹗

阿旺穿的是 M 碼﹗


我自己就揀咗件紫色圓領比自己﹗
估唔到依家內衣的 CUTTING 都咁講究,阿旺話著得我 "好似" 好好身材﹗
因為用上 18.5微米的超細美麗諾羊毛,所以非常薄身,而且不會刺激皮膚
雖然薄但都好保暧,呢幾日天氣未凍,我試身時影幾張相都即時成個人熱晒

TECHWOOL 另一個最大的好處是可以機洗,仲防臭同防飳
我地呢啲有 2個小朋友的家庭,雖然有工人姐姐 (最近走咗),下下要手洗,始終唔方便。
如果要拎出洗衣店洗,洗多幾次就已經買多件,所以可以機洗,真是方便好多


(產品由雞仔嘜提供

關於雞仔嘜 - 最好的.給家人
雞仔嘜是為每個人打造貼心內衣的香港品牌。 雞仔嘜以待家人的心,去對待每位顧客,承諾用卓越的品質、舒適的穿著感,及以簡約的設計,令每個人感受到如同擁抱般的溫暖親切感。
雞仔嘜1953年創辦,品牌以豐衣足食的願景,並本著點點關懷與創意,由創辦至今開發出不同的産品,由防縮、防蛀的輕暖羊毛內衣,到排汗與保暖兼備的「心膚吸」智能保暖內衣。儘管品牌形象亦不斷革新,雞仔嘜始終貫徹精細優良的工藝及質量始終不變,是家庭成員及摯友親朋互相傳達溫馨愛意的工具。
幾經革新兌變的雞仔嘜,屢獲殊榮,2012年,中華廠商會選爲「香港名牌十年成就」獎;2009-2013年,連續5年獲選為「全港最多人選購的保暖內衣」,産品與品牌備受肯定。現時,雞仔嘜分店遍佈全港,合共26間門市及以19個百貨專櫃。







2015年11月25日 星期三

大頭妹【自行放榜】@20151123



2015年11月23日 (星期一)

最近真是忙到七彩,不過都要打尖出呢篇 BLOG 先﹗

今日對有小朋友讀 K3 的媽媽來講真是非常非常重要的一日﹗早於一個月前,我已經開始緊張,日日自己同其他媽媽一齊倒數﹗之前一個星期六同星期日,仲分別約咗 BLOG友國皇一家同 80後媽媽一家,同舊幼稚園同學們一齊倒數,我地都話 11月23日之後,如果自己小朋友派唔到,短期內都無心情玩﹗要等到 6月大抽獎抽到先玩得安心啦﹗不過身邊朋友都好叻,其實大部份都有私/直小學 BACK UP啦﹗

有睇我地 FACEBOOK PAGE 都知,大頭妹好好好好好好彩 (我都唔知應該用幾多個好去形容),我地自行 20分入返依家幼稚園的小學部,一次過搞掂晒 2個囡,真是開心到暈呀﹗啲人話好似中六合彩咁﹗其實又真是喎﹗諗下可以慳返未來 6年的學費,仲要 2個女加埋,即是 12年的錢﹗$4000 X 12 X 12 = $576,000﹗真是同中六合彩 2獎無分別﹗就算唔計錢,老實講...我從來無諗過我自己 2個囡可以入到人地口中的 "神校" ,真是好激動好激動﹗

講返個朝,其實我之前一晚真是都訓唔係幾到,每 30分鐘就上學校網頁望下出 RESULT未,之後到 9:00前幾分鐘,不停 REFRESH,但我又係地鐵,LOAD來LOAD去睇唔到,叫咗阿旺返到公司即刻睇,佢又懶懶閒,之後 9:02分我都未見到個 LIST,已經有朋友WHATSAPP我話睇到啦﹗到 9:04我都未 LOAD到,已經係 WHATSAPP 收到同學媽媽傅來的名單啦﹗我不停望 110﹑110﹑110...真是有...再對埋個名,真是大頭妹個名,不過個心都是好唔實在,對咗 3次﹗之後就係媽媽 GROUP 入面報喜,再 CALL 阿旺,佢忙梗,都未 CHECK﹗我同佢講入咗啦﹗佢仲問我...私定津...我真是心諗...唔好玩我啦﹗自行派間私小比你咩﹗有時真是唔明...點解阿旺可以咁睇得開﹗﹗﹗哈哈﹗算啦﹗呢啲可能叫傻人有傻福﹗(話說我星期六日約咗其他媽媽聚下,話放榜前 RELAX下,佢仲問我放咩榜?﹗我真心佩服阿旺﹗)

星期六約咗國皇同 80後媽媽一家小聚﹗

星期日就約咗舊同學石澳沙灘 bbq﹗其實都是幫大頭妹 farewell,所以大頭妹有禮物收﹗
哈哈...你呢個龍b 就好彩啦﹗有家姐幫你打頭陣,2年後你就是 "世襲生" 啦﹗


大家LIKE咗我地個 FACEBOOK PAGE 未呀?未就快啲 LIKE 啦﹗

2015年11月20日 星期五

拍拖 14週年【Pokka Cafe】@20151117

2015年 11月17日 (星期二)

今年的拍拖週年撞正工人姐姐一星期前辭職,我地無得 2人世界啦﹗仲要有個無良心的人,完完全全忘記咗今日是拍拖週年,全日無聯絡,到放工問佢食咩,佢答我平平地食美心快餐好唔好 (忙到連 FACEBOOK 都無上過?我 POST晒相架喎﹗我覺得公司要比個好員工獎佢囉﹗)?﹗幾年前佢話食 "波士頓" 都比我話,原來再過多幾年,只是可以食美心快餐﹗真是唔知再過幾年會點?﹗

最後阿旺話据扒,近近地去 POKKA CAFE﹗

我地點了一個美國西冷扒套餐,$278/位,加埋一大約 $300/位﹗

有三文魚牛油果沙律,啲三文魚切到細到都見唔到,我最初以為比錯咗蟹子沙律我地,UM..,其實味道都OK,不過最好改過個名,有誤導成份﹗

雜菌龍蝦湯,味道都唔錯,最少夠熱﹗

大頭妹最愛的牛油餐包﹗

美國西冷扒份量都算大份﹗

阿旺好滿意,話叫 5成就是 5成﹗

最後仲有個甜品﹗曲奇雪糕加豆腐布丁﹗

當然唔少得咖啡啦﹗

大頭妹同小丸子就食肉醬意粉﹗

大頭姨姨的海鮮意粉﹗

應該都幾好味﹗大頭妹自己食咗 2碗仔﹗

大家LIKE咗我地個 FACEBOOK PAGE 未呀?未就快啲 LIKE 啦﹗


2015年11月19日 星期四

香港迪士尼樂園10周年「A Happily Ever After Christmas」盛演


2015年 11月16日 (星期一)

今年好開心,再次獲得迪士尼的邀請,參加香港迪士尼樂園10周年「A Happily Ever After Christmas」盛演﹗今年可能因為是 10周年,場內真是星光熠熠,仲有勁多外國的傳媒﹗

今日岩岩大頭妹同小丸子的幼稚園放假,我本來都已經請咗假,時間真是岩岩好呢﹗一早 11:30就出門口,1:00 已經到迪士尼啦﹗估唔到係無約實的情況,我地竟然同朗朗一家一班車到迪士尼﹗要趕係 1:00 入場,因為我地要睇全新迪士尼音樂劇 《迪士尼魔法書房》,今日是公開首映呢﹗

排隊入場時,大頭妹問我地係咪 blogger?﹗估唔到佢識讀喎﹗


全新迪士尼音樂劇 《迪士尼魔法書房》真是好精彩,故事主要是圍繞米奇同高飛幫 OLAF 返返入故事書,中間會穿越不同的迪士尼故事,包括:《小泰山》、《小魚仙》、《魔髮奇緣》、《勇敢傳說之幻險森林》、《阿拉丁》、《公主與青蛙,最後當然就是幫 OLAF 返返入去 《FROZEN》 的故事入面啦﹗


謝幕﹗

睇完音樂劇,我地就去食 LUNCH啦﹗大頭妹又話要食火箭餐廳﹗
岩岩 MANCENT 一家都到,可以一齊 LUNCH﹗

食飽飽就出動去玩啦﹗先玩巴斯光年﹑再玩馳車天地﹗

開始換晒聖誕節佈置啦﹗

6:45 係美國小鎮大街會有《魔雪奇緣》聖誕大街閃雪亮燈禮﹗有 ELSA 同 ANNA 的表演啦﹗


亮燈嘅一刻真是好靚﹗

投影效果令美國小鎮大街變成 FROZEN 入面的小鎮﹗

仲有飄雪的效果﹗小朋友就最開心啦﹗

ELSA 出場的片段﹗


之後就急急腳趕過城堡個邊等睇煙花啦﹗加入全新城堡投影效果嘅『星夢奇緣』煙花表演,真是非常精彩﹗

估唔到原來今日有謝安琪做特別表演嘉賓,現場唱出由著名填詞人林夕和音樂人趙增熹聯手打造的迪士尼樂園10周年主題曲 『Happily Ever After』﹗

一開始有香港迪士尼樂園10周年的投影﹗

煙花真是超勁靚﹗不過我要抱住 2 個囡睇,所以影唔到相,又拍唔到片﹗開頭拍咗少少﹗會有少少震,我單手抱住小丸子,用左手影嘅﹗之後要抱埋大頭妹就無得影啦﹗大家自己入場睇啦﹗真是好值得睇﹗


大家LIKE咗我地個 FACEBOOK PAGE 未呀?未就快啲 LIKE 啦﹗



2015年11月13日 星期五

血拼迪士尼@20151106


2015年 11月6日 (星期五)

今日兩個囡的幼稚園放假,撞岩迪士尼會員 6折喎,我同阿旺都請假入園,來個血拼迪士尼﹗

平時我地入迪士尼玩,都會睇定有咩鍾意,留返會員 6折先入場買買買﹗老實講,要入迪士尼買的一定唔係生活必須品,都是為咗氹下囡,都是以公主衫,同玩具精品為主,所以都是留返 6折先買啦﹗

今日一馬當先的竟然是阿旺,佢睇中 The Avengers 的玩具好耐架啦﹗借 2個囡過橋,買咗 Captain America 同 Ironman 玩具,佢仲問點解無 HULK﹗

係美國大街買完第一 ROUND,就去坐底食個 LUNCH,岩岩 1:00 好多人﹗

先買 2 杯啫理安頓 2個囡先,再去買野食﹗

其實我自己幾鍾意去 ROYAL BANQUET HALL,佢的扒餐都OK,又唔算太貴,BELOW $150/ 餐 ,咁就唔洗次次火箭餐廳 (大頭妹最鍾意),烤雞炸薯條個啲囉﹗

阿旺的雜扒餐...我笑佢食晒全部 1級致癌物...哈哈哈...算啦﹗呢啲是正常香港人飲食習慣,唯有自己平時食多啲菜,平衡下啦﹗

唔食飯的大頭妹...又比爸爸 "訓話",爸爸比幅小朋友得白飯食但食得好開心的相佢睇,UM...其實...大頭妹都淨係鍾意食白飯,所以我覺得阿旺呢個方法...行唔通﹗

食飽飽去玩遊戲﹗大頭妹竟然話同我 SHOPPING 唔玩﹗哈哈哈...即時覺得生女真好,可以陪我 SHOPPING﹗

之後同學仔到咗,佢先肯玩下﹗

我地第一次同 JESSIE 影相,今日可以因為會員購物日,好易排到﹗

原來 SHOPPING是可以要求寄存,之後係門口拎返,我地都是第 1次用呢個服務﹗

滿載而歸﹗

大頭妹同我 SHOPPING時...買晒成個園的 INSIDE OUT產品咁制﹗

Related Posts Plugin for WordPress, Blogger...