2016年12月30日 星期五

星期六好煮意 (附羅宋湯食譜)

2016年11月26日(星期六)
湊大頭妹小丸子,能親力親為的,我都希望自己做,不會假手於工人姐姐!今日大頭妹學校長週,一早6:45起床,7:30送大頭妹上校車,8:30再送小丸子上興趣班,9:30返到屋企,又無理由訓返,所以走去買餸預備晚餐!

這幾天天氣轉冷,忽然好想飲羅宋湯!煲得羅宋湯,就當然食西餐,好耐無焗全雞,呵呵呵,驚唔夠飽,叫工人姐姐預備意粉,雪櫃仲有買了差不多一個星期的三色椒,哈哈哈,焗埋佢!

檸檬蜜糖焗雞,影相出來比較黑,事實上剛剛好,皮好香,好好味!

工人姐姐牌肉醬意粉!好好味架!


大頭小丸好識食,仲要加芝士!

焗三色椒,加少少葡萄籽油(什麼油也可以)、少少鹽,焗15分鐘,即刻變得又香、又甜、又好味!最重要是方便快捷,用普通多士爐焗都可以!

中式羅宋湯,今次寫咗食譜!

中式羅宋湯
材料:
牛腩 $80/ 洋蔥1個/紅蘿蔔 1條/西芹 1/4條/ 薯仔 2個/ 蕃茄 4個/ 椰菜 半個/ 香葉 2片/ 蕃茄膏 1罐


做法:
1. 牛腩飛水洗淨切粒備用 。
2. 所有蔬菜洗淨切粒備用。
3. 湯煲中加入油爆香洋蔥、紅蘿蔔、西芹、蕃茄、牛腩炒香。
4. 加入適量清水煲以高速煲煲1小時 (普通煲煲2.5小時)。
5. 加入薯仔、椰菜,蕃茄膏﹑鹽﹑糖,大火煲 30分鐘。

*我個煲就 7L,我加水去到 MAX 線,如果用普遍煲,就大約 4 -5 L水,大家自己預啦﹗最好用大湯煲啦﹗

2016年12月16日 星期五

7日告別黑眼圈?﹗【MEDiPLUS白眼圈】試用報告﹗

 

無人想要黑眼圈﹑眼袋,但偏偏我好似一出世就有黑眼圈﹑眼袋,咁多年嚟,用盡不同的辦法都對付唔到佢。直到依家,年紀又大咗,湊住 2個小朋友,長期唔夠訓,自己又成日對電腦﹑玩手機﹑煲韓劇...呵呵呵...對熊貓眼...越來越嚴重﹗

今次試用 MEDiPLUS【白眼圈】褪黑藥效眼療膏強效版 (15ml),廣告話可以幫黑眼圈「7日減7度」﹗﹗﹗今次『強效版』的滲透度強3倍!經臨床證實 7天減淡頑固黑眼圈,24小時持續修護,激發骨膠原再生,增加眼周肌膚彈性,回復細緻年輕。

嘩嘩嘩﹗咁神奇?﹗我緊係要即刻試下啦﹗﹗﹗

睇返 MEDiPLUS 【白眼圈】褪黑眼療膏強效版,主要針對以下問題:
1. 黑眼圈、眼袋纏繞多年
2. 經常捱夜
3. 長期使用電腦
4. 配戴隱形眼鏡
5. 喜歡搓揉眼睛
6. 眼部化妝及不當卸妝
7. 預防眼圈眼袋

嘩...我中咗 1﹑2﹑3﹑6﹗

MEDiPLUS【白眼圈】褪黑藥效眼療膏強效版 (15ml),標準價: $259,激搶價: $199,萬寧有售。

MEDiPLUS褪黑眼療膏強效版,有5大嶄新歐洲技術成分:
1. Haloxyl: 能修補眼部皮層脆弱的微絲血管及增強淋巴循環,減少瘀黑及啞黃色調。

2. Eyeliss: 有效消除浮腫,回復平滑。

3. Eyeseryl: 可改善眼周鬆弛現象,增加眼周肌膚彈性,減少浮腫水腫。

4. Renovage: 修補細胞DNA機制,促進膠原蛋白更生,改善眼部緊緻。

5. PML Vitamin K: 活化深層細胞,改善眼圈周圍的黯沉現象,為眼圈肌膚注入活力。


質地係 milky cream狀,都好易推開﹗

哈哈哈﹗不好意思啦﹗產品試用,又要出我個素顏樣﹗
用咗一個星期,我自己覺得黑眼圈有明顯的改善,另外就是眼袋,對眼都 firm 咗﹗


比返張有化妝的大家比較下,眼袋真是唔見咗呢﹗


MEDiPLUS【白眼圈】
https://www.facebook.com/mediplushk/

2016年12月7日 星期三

拍拖15週年晚飯【品越越式料理】

2016年 11月 19日

嘩﹗原來我同阿旺眨下眼就一齊咗 15年,今年拍拖週年正日都無慶祝,阿旺要返學,今日出街食飯,其實都唔係慶祝,只是星期日無人煮飯先出街食,順便當慶祝咋,老夫老妻...係咁上下架啦﹗

【品越越式料理】開咗好幾個月都未試過,望過下餐牌,覺得價錢算中上,一般越南野都唔貴嘛,咁呢度一碗湯河都要 $7x,我覺得貴架啦﹗樓上越盞都是 $3-4x,所以我岩岩發現越盞已經執咗囉﹗吉野家又執咗﹗真是想食平少少,就得返大家樂同 MX﹗

品越湯河 $76,有齊雞絲﹑生牛肉﹑牛展,湯底的味道都不錯,有沒有味精就不知道了﹗份量都可以,不算小,最少小丸子都吃了 2碗仔﹗

牛柳粒紅飯 $118,吃越南菜我最喜歡吃『紅飯』,不過多年來都是最喜歡『小巴黎』的,可能是『細個的味道』最好味,小時候唔多出街食飯,出街食好似特別好味﹗這裡的紅飯,我覺得不夠乾身,牛柳粒又加入青紅椒炒,吃的時候有點似『豉椒炒蜆味』,麻麻地﹗

芒果軟殼蟹米子卷 $72,唔係幾夠味,冇芒果味又冇軟殼蟹味﹗

阿旺點了薄荷青檸梳打,我點了芒果沙冰。


哈哈...為食丸咩都話要試...佢話好酸﹗

我個杯芒果沙冰,佢就飲到停唔到口﹗

【品越越式料理】

2016年12月1日 星期四

一個人的晚餐【Nakayo食堂】



每次做完 facial,我都會去我新飯堂 【Nakayo食堂】,食物質素唔錯,而且價錢唔貴,我好少食魚,但就鍾意食呢度的魚,我都覺得幾神奇,不過正常晚飯時間好多人,唔係我都會帶大頭妹小丸子嚟試下﹗

我平時食開照燒油甘魚,成日都想試下個比目魚西京燒,因為我夜去,次次都賣晒,今次終於試到,但都是照燒油甘魚好味啲﹗可能我自己有少少誤會,我以前跟日本人老師學的西京燒係會放麵豉醬上魚上面再燒,呢度都無麵豉醬既?﹗


啲肉好似好散,可能我自己唔鍾意食比目魚的質感,下次都是食返油甘魚﹗

大家 like 咗我地的 Facebook page 未呀?未就快啲 like啦﹗



2016年11月26日 星期六

血拼攻略「一田購物優惠日」



同以前比依家已經好少Shopping,每日放工返屋企都趕住湊女教功課,不過總有要我出手的時候!

今次一田購物優惠日,事先已經上網睇晒有咩抵買(http://vip.yata.hk/vip/,睇準就要出手快,只是放工時間去,我想買的北海道帶子刺生已經賣晒!好彩仲比我買到其他之前睇中既!

當中最抵是呢set 「Sofina 底妝防曬洗面套裝」,原價$1350,依家只是 $640!我由中一開始用Sofina的防曬到依家,真是好長情。

買唔到帶子好彩都仲買到美國螺頭,冬天用來煲湯一流!

仲買咗大頭妹同小丸子都好愛吃的日本香印提子。

阿旺愛吃的Laksa麵都有減價!

一田購物優惠日由即日至11月28日,部分營業時間同平時唔同,襯今個weekend去shop返轉啦!

超市都真是幾多人架!最好一次過買多少少,就排得物有所值啦!

好耐無講過,早期有睇我blog的人可能記得,哈哈,敗家萬歲!

2016年11月25日 星期五

大頭妹甩第一隻門牙@20161116

2016年 11月 16日 (星期三)

哈哈﹗咁有紀念價值的一日,一定要記低佢啦﹗等咗好耐,大頭妹隻門牙終於都甩啦﹗第一隻甩既係左下的門牙﹗鬆咗好耐架啦,不過我唔敢自己搞佢,等佢自然甩,橫掂無頂住後面隻牙。

星期三放學的時候,大頭妹一落校車就同我講,佢隻牙甩咗啦﹗上最後一堂時甩,冇痛,不過有少少血,之後佢用手巾仔包住隻牙,放入筆袋﹗個傻妹跟返學校課文 (第10課: 第一次換牙)去做,之後我話帶佢去 AEON 食壽司,再去買返個玻璃樽放返佢的乳齒,時間真是岩岩好,岩岩就是今個星期教呢一課,佢就甩牙啦﹗

甩第一隻啦﹗

佢自己揀咗個勁大的樽去放...又是要跟返書囉﹗同埋佢話要比 TOOTH FAIRY放金幣喎﹗
(隻牙...細到見都見唔到...白白地色個隻就係啦)

佢第二朝好緊張去睇下隻牙,見到隻牙仲係度,即刻好緊張,問我點解 TOOTH FAIRY仲未拎走佢隻牙,係唔係 TOOTH FAIRY 唔識開個樽?﹗又未比金幣佢?﹗吓...咁認真既咩?﹗咁我係唔係要去買啲金幣放入去?哈哈哈﹗大家會點處理小朋友的乳齒架?﹗



2016年11月24日 星期四

星期日的新選擇【潮人飯堂】

星期日大頭妹同小丸子要去坑口跳芭蕾舞,我同阿旺成日都要四圍遊蕩個半小時等佢地落堂,有次無意中聽到幾個婆婆話商場入面的【潮人飯堂】好好味,又鵝片﹑又蠔餅﹑又蠔仔粥,聽到我鬼咁肚餓,接完女就即刻去試下﹗哈哈...婆婆果然無介紹錯 (其實人地唔係介紹我囉,人地自己傾計,我偷聽到啫),真是幾好味﹗

無叫鵝片,叫咗鵝件,因為中午有特價,我記得好似 $68,都幾抵食﹗

蠔餅大大塊先 $58,雖然好好味,不過真是好好好熱氣﹗哈哈哈...下次如果都係得我同阿旺 2個大人,我都唔敢再叫﹗

叫咗碗鳥東比 2個女食,味道都唔錯﹗

其他點心其實都 ok﹗



整體水準唔錯,下次有機會再食,不過通常大頭妹都會話要食通粉﹗

大家 Like咗我地的 Facebook page未呀?﹗未就快啲 like啦﹗


2016年11月23日 星期三

Electrolux Ergorapido 3合1無線吸塵機

 

早前出席了 Electrolux 全新 【Ergorapido 三合一無線吸塵機】的產品發佈會﹗ Electrolux 自 2004年推出 Ergorapido 二合一無線吸塵機,到今年 2016 年已經推出了 12年,Ergorapido 無線吸塵機更加進化到『三合一』,添加新功能【電動床褥渦輪吸扒連UV紫外燈】,部份功能/ 配件亦都改良咗,我覺得真是近乎『完美』﹗

首先講下今次的新功能【電動床褥渦輪吸扒連UV紫外燈】,最大的賣點是針對深層清潔床褥﹑枕頭上的塵蟎及致敏源,配合電動渦輪快速拍打床褥,將塵蟎及致敏源拍出並吸走﹗再加上UV紫外燈有效殺死塵蟎及細菌﹗


雖然每個星期都會用 60度以上的熱水去洗床單,但是就洗唔到床褥,依家就可以定時吸下床褥,除咗可以吸走塵蟎及致敏源,仲可以一次過用埋UV紫外燈殺菌消毒,而且都好輕身易用﹗


UV紫外燈有自動距離感應裝置,可以放心使用﹗2邊都拎起晒就會自動熄架啦﹗

用來吸下小朋友的地墊都可以﹗

再講下基本的功能,無線吸塵機真是超方便,方便用真是好重要,完全大大提高做家務的動力﹗它使用 18v Li-ion鋰電可充電池,快速 4小時充電,可持續用 45分鐘 (長效模式)/ 15-16分鐘 (加強模式),一次過吸晒間屋一定無問題﹗


"自立功能",就算吸吸下纏,小朋友要搵媽咪/ 有人打電話返屋企,媽咪都可以即時 "分身"。


"LED扒頭",清潔時就可以照得清清楚楚,吸啲暗角位/ 枱底,都無問題﹗


另外佢仲有一個好厲害的地方,就是 "BRC 簡易滾軸清潔設計" 啦﹗好多時吸塵之後,都會發現有好多毛髮纏住個滾軸,而這個 BRC 簡易滾軸清潔設計,就可以剪斷毛髮,再自行吸入塵盒,乾手淨腳﹗
   
只要踩右手邊的腳制 3-5下,就會自動剪斷毛髮,再自行吸走,真是一樣偉大的發明 (清理過吸塵機的人一定明白點解)﹗小丸子就最鍾意走去踩腳制﹗

180度靈活扒頭,絕對靈活易用呀﹗

三合一另一個賣點就是可以分拆出的手提吸塵機,可以輕鬆吸下傢俬,有車的人吸下車都可以,唔洗買多一部手提吸纏機﹗另外,好似小朋友成日做完功課有好多擦膠碎/ 食完茶點又好多食物碎,拆個手提吸塵機出嚟,話咁快就吸乾淨晒﹗

每晚大頭妹做完功課,我都要佢自己 "清理現場" 架﹗

機身真係好輕巧,連小朋友都好易控制到﹗



之前講過今次增加咗啲小配件,我覺得真是超級實用﹗﹗﹗
尤其係條 70cm長的 "特長延長軟喉" ,真是可以大大提升靈活度,我真是超愛呢個設計﹗

之前因為吸頭太大,吸唔到梳化底,依家用咗 "特長延長軟喉" 都解決咗﹗


仲可以吸下家中較高的位置﹗

配合 "特長窄縫吸咀",真是任何角落都難唔到我﹗

最後就講下清潔塵盒啦﹗真是好方便,而且成個塵盒都洗得﹗

好容易拆開﹗



可以彈走啲塵﹗


沖一沖水就乾淨晒﹗



 


Electrolux Ergorapido 3合1無線吸塵機
更多產品資料: http://www.electrolux.com.hk

大家 Like咗我地的 Facebook page未呀?﹗未就快啲 like啦﹗

Related Posts Plugin for WordPress, Blogger...