2016年4月30日 星期六

大頭妹開始上【公文中】(5歲10個月)

 

最近幫大頭妹報咗上『公文中』,即是 KUMON,不過通常人去 KUMON 上數學,我地就去上中文,眼見大頭妹的中文程度上小學會有一定問題,所以襯 K3下學期,想幫佢打定底,問過身邊的朋友邊度上中文好,教小學中文的朋友推薦公文中,所以我就去了解下啦﹗

其實之前成日聽公文好多功課,所以有少少擔心,見朋友的小朋友上數學,真是不停做不停做,依家已經多功課,我唔想再加重大頭妹的 WORKLOAD,去了解過,中文個模式又唔同,都是每日有功課架啦 (公文的特色嘛),不過中文一開始是『聽』同『讀』,唔洗寫字,5A 係學讀音先 (最低班),之後 4A 就開始學『拼音』,即是 BO PO MO FO 個啲,其實大頭妹學校的有教過,佢之前讀國際班嘛,依家幼稚園都有普通話堂,不過大頭妹的小學是普教中,所以普通話老師都有講過幼稚園一星期一堂的普通話字必足夠。

報名之前其實家長要聽講座,小朋友要再做一個評估,睇下由邊個 LEVEL 開始學,大頭妹做完都是要由最低 LEVEL 開始學,我覺得都可以,當打好個底,雖然依家要由: 手﹑口﹑腳個啲讀起,令我想比埋小丸子一齊上...不過做評估之後好意外,老師話大頭妹有時唔太理解問題,所以有啲問題唔識答,但是拼音方面就幾好,問咗我幾次佢真是無出去學過普通話?﹗佢話好少年紀咁細就識咁多拼音,聲母識晒,係韻母差少少,呵呵呵...即是學校教得好囉...所以老師話就算由最低學起,應該都可以好快升班。


暫時都是聽 CD ,所以都算輕鬆﹗一邊聽一邊睇,都希望可以認多啲生字啦﹗

小丸子有時都會聽埋一份﹗


為咗增加動力,每次大頭妹聽 CD,我都會幫佢按摩架,佢最鍾意按摩腳。

大家 like 咗我地個 faceboook page未呀?﹗未就快啲 like啦﹗

2016年4月29日 星期五

迪士尼購物 6折優惠又嚟啦!

呵呵呵!又到放毒時間!唔好話我有優惠唔早啲通知大家!由4月29日至5月9日,奇妙處處通會員購物有6折優惠!不過依家銀卡冇得weekend入,入去掃貨既人唔知會唔會少咗!我上星期已經叫 VIP朋友幫我買咗!一早花蛋節入去已經睇定,一6折就買,唔係有啲靚款可能會斷碼架﹗

呢條 Shelliemay 紗紗裙,原價 $295,依家 $177,佢係2件可以分開著!

後面都好靚!

仲有呢件大頭 Shelliemay 衫好cute! 原價$218,依家$131。

條紗紗裙是小丸子自己襯。

仲買咗少少tsum tsum頭飾!原價 $138,依家 $82.8,都ok抵啦,未開嚟用,唔知襟唔襟。

仲有小朋友最愛既Mickey Minnie頭碗!無工人時,阿旺洗碗打爛咗一隻,要補返比大頭妹,呢隻深少少的粉紅色是新既,小丸子有一隻淺粉紅。

家姐次次都讓妹妹,自己揀咗 Duffy,我話唔洗讓妹妹,2件買晒 Shelliemay 都可以,佢話覺得Duffy顏色出啲!

小丸子就一定要粉紅色!

大家 like 咗我地 Facebook page 未呀?﹗未就快啲 like啦﹗

2016年4月27日 星期三

醫療保險那些事

因為需要,最近又開始上網搵醫療保險的資料,記得我初出社會做事,第一件事就是幫自己買一份樣樣保障都有少少的保險,人壽﹑意外﹑儲蓄﹑醫療都有齊,覺得要為自己的人生負責,好好計劃以備不時之需。如果自己有咩三長兩短,屋企人都有保障!



初時我對保險認識不多,諗住有份公司Medical就 Cut 咗自己份醫療保險,我覺得簡直是我人生做得最錯嘅事之一,份工唔係做一世架嘛﹗後來了解多咗,先知醫療保險越後生買越平 (所以大頭妹小丸子一出世就買咗),轉工之後,無深入研究過,就急急忙忙又再買另一份醫療保險,包啲咩唔啲包咩都無認真睇過,覺得買咗先好似安心啲﹗不過,因為依家份醫療保險未必保證續保,如果索償過更有可能會加保費,所以我想襯仲後生,搵過另一份醫療保險,到時年紀大先轉,保費一定貴啲,而且醫療費用又不停加﹗

其實買任何保險都是買個安心,絕對唔希望成日要CLAIM﹗尤其依家醫療開支高昂,萬一有咩事,對我地呢啲流動現金唔多的人來講,隨時失預算。依家自己有兩個小朋友,考慮嘅地方同以前唔同,我地呢代為人父母,唔諗住老來要靠仔女養,亦唔想自己成為仔女嘅包袱,有多餘錢都想留比小朋友將來讀書用﹗依家每個月供幾百,好過到時忽然要拎一大舊錢出嚟,雖然供咗無CLAIM就好似白交保費,但個個都想身體健康,唔通為咗個幾百蚊想自己病咩?﹗身體健康最重要,好彩我地一家大細都好健康,除咗生大頭妹小丸子個時,我都無入過醫院﹗


暫時睇咗不同嘅保險計劃,我覺得除佐保障額要足夠,保障範圍最好有針對性,根據同年齡和需要嘅人仕設。當然我都會計下Budget,有啲醫療保險計劃會提供無索償折扣優惠即係話如果今年無CLAIM續保時就可以有保費折扣,而且仲會因為索償記錄而加收保費另外,年紀越大就越需要有醫療保險,我睇返我依家個份醫療保單原來去到 74歲咋,如果到 75歲先再買另一份就一定好貴,所以,醫療保險計劃最好可以提供終身續保,咁就真正安心喇!

依家醫療保險保障範圍雖然好多都大同小異,至於價錢方便,講白啲就是買得多賠得多,保費貴啲,保障額就高啲,但當然最緊要考慮自身需要啦﹗譬如話如果自己仲後生嘅,可以相對買低啲保障額,畢竟年輕人身壯力健嘛;但如果年紀開始大,就有需要份保障全面同保障額大啲嘅保險啦
保險分分鐘跟足自己一,除佐保障要適合自己,其他配套服務其實都好緊要!好多時候要計自己份保單可以CoverClaim到幾多都好複雜,搞到頭都大。最近上網睇資料,就見到一個至醒醫claim專線嘅服務真係不錯,有專人在入院前先計算好可賠償金額,心中有數就唔怕出院時失預算之餘,仲可以「出院免找數」添!

保險畢竟只是額外保障,愉快幸福生活,多啲做運動,Keep住身體健康先至係最重要!咁先可以見證兩個女成長每一個重要時刻。

希望我地一家大細日日都開開心心、健健康康!

大家 like 咗我地 Facebook page未呀?﹗未就快啲 like啦﹗

打邊爐【海港薈】@20160421

之前試過屋企留下間打邊爐宵夜時段 (9;00後入坐) 幾抵食,成日都想再去食,不過之前天氣凍,成日都好多人﹗哈哈...岩岩今日走去做個學童書包的 focus group,返到太古岩岩 9:00,就叫阿旺陪我打邊爐,不過其實我因為之前食榴槤喉嚨痛,打埋邊爐之後...依家咳到死死下囉﹗

唔識死...仲要叫雞湯底...今次真是罪有應得﹗
同上次有少少唔同,今次雞另上。上次我記得係走過油的雞,已經放咗入湯,所以覺得有少少油,今次個湯底無咁油﹗
 肥牛 $98,我覺得好抵啦﹗不過...今次好似薄過上次﹗

美國桶蠔 $98,個姐姐話大就有 4隻,細就 6隻,我地個份係 6隻,不過我覺得都幾大隻。

蔬菜藍 $28,今次無豆苗啦﹗係白菜 + 生菜﹗

仲有烏東 $18,我覺得都抵,有 1份半,配個雞湯好好味呀﹗

最後埋單岩岩好 $400 (好似 $39x),我個人覺得抵食個牛陣,牛陣啲牛...其實麻麻地,不過呢度就要 9:00後入席囉﹗

海港薈
地址: 太古康山道1-2號康怡廣場北座3樓T3號舖 
電話: 2811 1679
營業時間:星期一至日: 08:00-23:30


大家 like 咗我 Facebook page 未呀?﹗未就快啲 like 啦﹗

2016年4月26日 星期二

團購晚餐 The News Room Diner@20160410

一早1月份買的團購,原先打算新工人姐姐到同阿旺2人世界,點知...人算不如天算,3月尾先等到新工人姐姐,張groupon又4月中又到,阿旺星期一二要返學,大頭妹星期四五晚上要學琴同畫畫。得返星期三,但其實大頭妹平日都幾多功課,我唔返屋企,佢又唔會自己做,所以二人世界無望,問咗餐廳如果得一張groupon,帶小朋友可否另外點餐,餐廳話無問題,最後訂了星期日一家人去食啦!

其實呢間團購都食過好多次,不過佢期期都有少少唔同。大頭姨姨食咗話覺得今期弱少少,我覺得都ok啦!Groupon 價連埋加一大約 $300/ 2位,是抵食既!

凱薩沙律,都幾好味呀,個汁唔錯,芝士都足。大頭姨姨就係話前一次有煙三文魚,今次弱咗。

青豆湯,我覺得湯一向都是弱項,無咩味,不過賣相都唔錯。

每次都是點同一個主菜!西冷牛扒!今次阿旺個塊唔得,好多筋,但我個塊好正。

阿旺...的冧女技術...氹到小丸子好開心﹗

點比 2個囡食的 fish & chips,唔知係唔係因為唔係團購餐,要等好耐,我地主菜都上埋都未到,2個囡開始唔耐麻,最後食到一半,2個都訓咗﹗

最後上埋甜品,是凍蘋果批,味道都 ok,不過對我嚟講唔夠上 2次的蛋糕吸引。

都係個句,再有團購的話都會再去食,原價 $600/ 2位,就唔會考慮啦﹗

The News Room Diner
地址: 鰂魚涌糖廠街33號太古坊
電話: 2562 3444
營業時間: 星期一至五: 7:30 - 00:00,星期六及日:10:00 - 00:00 
openrice: http://www.openrice.com/zh/hongkong/restaurant/%E9%B0%82%E9%AD%9A%E6%B6%8C-the-news-room-diner/52059

2016年4月25日 星期一

大頭小丸揀鞋記「Shoe Box」@20160403



2016年 4月3日 (星期日)

今日出銅鑼灣食晚飯,順便帶埋 2個女去 SHOE BOX揀鞋﹗我發現小丸子真是好貪靚,一見靚鞋就 2眼發光,之後仲即刻拎住對粉紅色花花鞋唔放,好有自己的主見,有時都唔知佢似邊個,明明我同阿旺都唔係咁既?﹗大頭妹就完全唔同,佢會自己望下,再問下我覺得邊對好﹗

小丸子表情實在太浮誇啦﹗佢話佢淨係鍾意粉紅色喎,不過其實粉紅色都好多選擇,佢獨愛呢對 "粉紅色" + "花花" + "珠片"﹗佢最鍾意啲好 girly 既野,但自己又粗粗魯魯﹗

其實我自己好鍾意呢 3對,不過無大頭妹的 size,但小丸子又好堅持自己揀個對粉紅 + 花花 + 珠片。咁我就唯有尊重佢的選擇啦﹗如果唔係,就唔洗帶佢地自已揀啦﹗

大頭妹話鍾意呢對有齊佢鍾意既顏色﹗粉綠 + 粉紅 + 黃﹗

最後都是揀咗對粉紅閃閃石﹗佢既原因係因為 "易著" 一穿入去就著到,同埋佢未試過著無搭帶既鞋﹗就快升小學啦,成日覺得自己大個囡,是大姐姐,但一上小學,又要由小妹妹開始過﹗

小丸子成日一同家姐影相就 "吉" 高腳...出貓﹗

Bibi係巴西牌子,所有鞋都採用「Fisioflex 激活機能鞋墊」,能刺激小朋友嘅腳板神經線,佢哋行路嘅時候可以同時活化身體機能,所以對小朋友係非常好架﹗目前Bibi係香港只有SHOEBOX做獨家代理。
 

大頭妹揀既通花心心,加閃石!

小丸子揀既 "粉紅色" + "花花" + "珠片"!
橙色既就是「Fisioflex 激活機能鞋墊」。

SHOE BOX
地址: 銅鑼灣皇室堡 2樓 216C 舖
電話: (852) 2940 3617
營業時間:星期一至五:11:45 - 20:45 星期六、日及公眾假期:11: 00 - 22:00
網址: http://www.shoebox.com.hk/
Facebook: https://www.facebook.com/shoeboxhk/?fref=ts





2016年4月22日 星期五

小丸子第一堂學器班【兒童流行鼓班】


小丸子一直都好想學樂器,可能佢見大頭妹有得學鋼琴,佢無得學啦﹗自細好多野都比佢 2個一齊學,唯獨學器,覺得有難度﹗一來小丸子坐唔定,二來小丸子無好似大頭妹一樣,由細開始上音樂班,無一定的音樂基礎。

今次帶小丸子去柏斯試一堂 30分鐘的【兒童流行鼓班】,我覺得可以睇下到底佢可以開始學樂器未?﹗第一堂主要是學拍子,老師話年紀小的小朋友學打鼓,一開始可以唔學睇譜,只是學簡單的拍子,初步掌握節奏同基本技巧,例如握鼓棍的手勢。我見開頭 10-15分鐘,小丸子表現好好,叫小丸子拍手數拍子﹑用鼓棍打一個鼓,老師仲讚小丸子數拍子數得準﹗過咗 15分鐘,小丸子的專注力有限,而且增加難度打 2個鼓,佢開始亂,之後同老師傾返,原來打鼓好需要專注力,同樣都可以訓練小朋友專注力﹗

未上堂前,佢知有得去柏斯上堂好開心呀﹗因為我之前一直同佢講,要佢手冊全部都 TICK 先有得學樂器 (就是差守規則同專心),其實依家都未達標,明明上學期尾已經成功咗2-3個星期,點知下學期退步咗﹗

佢仲自己執袋,帶晒屋企袋到出街既樂器去上堂﹗

大頭妹都係係呢度學琴,之前都行過下屋企附近的音樂室,覺得呢度環境唔錯,就揀咗呢度啦﹗

小丸子其實都好熟架啦﹗個個星期都陪家姐上堂﹗

原來學打鼓要帶耳塞,因為鼓聲好大聲﹗

小丸子一坐低已經好興奮啦﹗睇下佢個古惑樣﹗

朋友問點解比小丸子學打鼓,好似好男仔,我就純粹因為覺得樂器之中,打鼓比較易上手,小丸子無音樂底子,一下子學鋼琴/ 小提琴會仲難,我依家考慮比佢暑假上返個音樂班,佢的確需要靜態少少的興趣班﹗佢真是連上芭蕾舞都比同學投訴佢上堂時走來走去。

真是估唔到原來兒童流行鼓班用既鼓係咁專業,老師上堂仲會用埋電子結他一齊打拍子﹗

上完堂唔捨得走,我都唔明大頭妹,返到屋企又唔願練琴,去到琴行就唔捨得走。

兒童流行鼓班的結構比較簡單,分初﹑中﹑高 3級,每級 12堂,學晒大約 1年,岩比小朋友試下適唔適合學樂器﹗

柏斯音樂藝術學院: www.parsonsmc.com.hk








Related Posts Plugin for WordPress, Blogger...