傻夫婦一家四口生活日誌: 【大頭姨姨】『上野‧淺草‧淺草今半‧新宿』東京輕井澤7天遊記 20160109 Day 3

2016年5月7日星期六

【大頭姨姨】『上野‧淺草‧淺草今半‧新宿』東京輕井澤7天遊記 20160109 Day 3

返到東京市區第一日，因為之前買的JR東京廣域周遊券要連續3天使用，所以今日就揀去較遠的上野同淺草！上JR前先去酒店對面的麵包店買個快速早餐，揀咗每次去日本都必食的密瓜包！

東京的鐵路真是複雜過香港好多，次次睇點轉車睇到頭都暈埋，但好彩而家乜都可以搵apps幫手，只要download「乘換案內」，即刻可以show晒最快到站班次、最快到達班次、最平到達班次，任君選擇！

嚟到上野當然要行下阿美橫丁，集中的藥房，正適合要大手入貨的，可以一次格晒價，但通常我都是買少量補給，所以都是去返酒店附近的藥房入貨慳返d腳骨力！除咗藥房，仲有n間ABC mart，雖然有時d波鞋款都差唔多，但偶然都會係另一間見到d唔同款，所以想買波鞋的，可以行晒咁多間！另外唔少得當然是食品店同激安店啦！

其實基本上有少少似女人街咁，乜都有d，買衫、買精品、買雜貨、買乾糧、買水果...！

仲有嚟到上野必定要食的章魚小丸子！有4、6、8粒裝可供選擇！

見到好多邪惡的Donald精品！

仲有透明puzzle，雖然平過香港，但太佔位，所以放棄咗，只是買咗迷你版的！

其實都唔知香港有冇，但見到TSUM TSUM大集合，即刻忍唔到手買咗！

速遊完上野，就轉戰到淺草！之前一直無緣食到淺草今半，今次終於可以試到！星期六的午餐時間，排咗約十幾人左右，但都只是等約廿分鐘就可以入座，易過排澳牛啦！

午餐比set meun的價格相宜好多，由3,000YEN起，而set meun最平都要6,000YEN (http://www.asakusaimahan.co.jp/pdf/restaurant_english_menu.pdf)，雖然份量多d，但貴成差唔多一倍，咁我寧願分兩次午餐食！其實仲有d每日限定20個的丼飯，由1,500YEN起，但如果想食就要早d嚟排隊喇！
地址：3-1-12, Nishi-Asakusa, Taito-ku, Tokyo, Japan. 111-0035
營業時間：11:30am - 9:30pm (Last Order 8:30pm) Open 365 dayshttp://www.asakusaimahan.co.jp/e_restaurant

第一次嚟淺草今半，當然要食壽喜燒啦！點咗「壽喜燒午餐御膳」！
前菜都特別精緻

蔬菜拼盤

碟牛一放落嚟，真是雙眼放光！睇相見返佢，真是好想即刻飛去再食！

仲有專人幫你排靚靚個鍋！

自己排的話絕對唔會排得咁整齊啦，應該只會好似香港打邊爐咁一次過扔晒想食嘅嘢落去就算，哈！第一啖食片牛時，平時睇旅遊節目d主持對白即刻出晒嚟「入口即溶」、「牛有牛味！？」etc，總之就真是一試難忘，所以我決定每次來東京都要再嚟食！其實可以再追加，但都是小食多滋味，而且之後又會再去食六歌仙，所以都是留返任食時再食個飽！

另外再叫咗個抹茶雪糕，都好好味！

食完滿足的一餐，就漫步返過淺草寺！

遠遠可以望到晴空塔，新舊的比照！

每次嚟都必影的—雷門！

唔知係咪因為新年多人嚟求籤祈福許願，好似比平時熱鬧(=擠迫)！

多人到好似年宵咁

雖然剛食完淺草今半，但嚟到淺草的其中一間名店前，無理由唔食！？食咗幾次，其實都唔知佢叫乜，上網search一下話佢係炸饅頭！不過同香港的炸饅頭唔同，有餡的，而且仲有多種口味選擇，價錢由120-200YEN！

揀咗甜薯同抹茶，另外仲有豆沙、南瓜、芝麻等！

因為上次去咗晴空塔，所以今次遠眺加影張到此一遊就算！

然後又到下一站—秋葉原，但並唔是屬於我的世界，所以停留咗約半個鐘就走！

偶遇到佢，是機動警察d朋友嗎？

繼續下一站東京站，之後通常都是嚟轉車，今日經過又去探索下！不過，最後都只是行咗地下街，上到地面見似是商業區，所以短暫逗留又走lu！

好吸引的零食店

Gundam Cafe

速遊完兩個JR站後，終於都返返去屬於我的世界—新宿！首站先衝去東口的LUMINE EST，基本上我想行的牌子都有齊，earth music、JEANASIS、Cecil McBee、ESPERANZA！不過唔知係咪因為大減價又撞正星期六的關係，所以都幾人山人海！

雖然係洗手間就唔應該影相，但見到呢個設施真是忍唔住要影一下，讚揚一下日本人的貼心！

係LUMINE EST迷失完咗唔知幾耐，再去買埋利木津巴士卷，跟住就去南口的MYLORD！
利木津巴士可到成田/羽田，另外仲有優惠票，機場巴士卷+1 day METRO PASS，可任選一日任搭metro線，當然要注意有效期！至於機場巴士卷，建議購票後先到酒店櫃台預約時間，免得走個日無位就真是天氣好似預期都飛唔到！
優惠詳情可參考 http://www.limousinebus.co.jp/discount_ticket/en/
路線及班次可參考 http://www.limousinebus.co.jp/ch2/bus_services/