2016年6月28日 星期二

芝麻街音樂劇 Sesame Street Live "Make a new friend"




呢度有冇芝麻街 fans 呀?﹗今個暑假,芝麻街將於7月1-3日同大家見面啦﹗全新音樂劇 Sesame Street Live  “Make a New Friend”,仲有新角色 Chamki 加入與芝麻街好友在舞台上載歌載舞。上年錯過咗,今年我會帶埋大頭妹同小丸子入場睇,作為暑假的第一個節目﹗



日期:
201671 (星期五) 下午230分/ 下午530
201672 (星期六) 上午11/ 下午230/ 下午530
201673 (星期日) 上午11/ 下午230/ 下午530
地點:九龍灣國際展貿中心-匯星
票價: $680 (派對座位) /$480 / $280 / $180
小朋友睇得好開心呢﹗


全新芝麻街音樂劇 Sesame Street Live - "Make a new friend" 將於2016年7月1-3日公開演出,門票現已於快達票HK ticketing公開發售

詳情可瀏覽以下官方網站及facebook專頁:


「沒有起跑線」之虎媽?苦媽?



早前幫TVB拍攝一個真人show 「沒有起跑線」!

我「扮演」一名虎媽,帶住我囡囡蟹蟹呂慧儀返 2間幼稚園,再返 3個興趣班,真是癲到無朋友!哈哈!希望冇嚇親大家!導演都是想用一個誇張的手法,去講下依家的小朋友有幾辛苦﹗辛苦背後...到底是為咗滿足父母的期望/ 虛榮,一或真是有 "需要"?﹗老實講...其實我自己都要反思一下﹗

上 2間幼稚園就純粹誇張,依家雖然都真是有少部份家長會係咁,但我相信唔多既,不過連返 3間我都聽過,真是唔知點可以返 3間(家長舉棋不定 女兼讀3幼園 影響交友 校長﹕家長也要教育http://m.mingpao.com/pns/dailynews/web_tc/article/20160613/s00011/1465755697403)﹗其實返 2間不外幾個原因,例如: 小朋友考到 2間家長都鍾意的學校,家長唔知點揀好﹗尤其是其中一間重學術,一間有小學 back up,通常會發生係九龍塘名校區﹗我又有聽過例如: 返全日班下午都係訓覺,返 2間就保證全日 6個鐘都學野。再加上可以一間讀國際班,一間讀有學劵,咁樣就學齊 2文 3語,而且唔會浪費政府既學劵 (交咗稅嘛)﹗嗱﹗我唔係鼓勵人比小朋友返 2間,純粹話返比未有小朋友的人聽,點解有啲人會咁做,至於合唔知理?﹗大家自己衡量﹗

上完 2間幼稚園,仲要上 3個興趣班﹗
 
第一個興趣班係 【koding kingdom】的『電腦程式編寫班』,老實講...我都是第一次聽,我講個句對白都食咗幾次螺絲,同埋就算睇『蟹蟹』上完,我都未知發生咩事?!只能話依家 『21世紀』既小朋友真是好叻 (個校長係咁形容)﹗佢地用寫電腦遊戲的方式去教 programming,另外好似話仲有教寫 apps之類﹗不過其實上堂的都是國際學校學生,而且興趣班係貝沙灣,其實我地平民百姓都唔係佢 target﹗

之後去【史丹福】學游水,其實學游水就好平常,不過 5歲識晒背蝶蛙自4式,仲係國家級教練,我真是無想像過 (啲男仔真是 5-6歲就有腹肌)!

不過因為咁我有機會見到我偶像蔡曉慧,我讀書時都係學校泳隊架,不過當然是包尾個隻,所以我明白,當年我游唔到成績,加上體形矮小又瘦,我教練是眼尾都唔望下我,特訓都一定唔會有我份,明明我係最勤力練習,所以都有少少感慨﹗

蔡曉慧可能做開幕前,見佢原來好搞笑,我好記得佢同蟹蟹講:你知唔知你問題係邊?你游得太慢﹑無速度﹑唔夠快﹗我真是忍唔住笑咗﹗今次亦不得不讚呂慧儀,真是好專業,我唔知最後會播幾多出街,不過佢真是游咗好多次,唔係游開水都應該會幾辛苦﹗

最後就是去【SDM】上『士的舞』,啲小朋友都是 9-13歲,不過好多都是由 2-3歲開始學起,個個都係舞林高手﹗我忽然都諗,我依家都有比大頭小丸上跳舞,到底我有冇呢個恆心?﹗我一直以為上跳舞係小朋友玩下﹗

後記: 其實拍之前,導演可能怕我擔心,佢都話節目完會比時間我講返我自己平時做媽媽係點,不過我都同佢講,其實我都唔驚,有睇開我 blog 的人都知我點教囡,我仲話其實我都是一個『半人獸』家長,經常徘徊於天堂與地獄之間﹗

2016年6月27日 星期一

父親節晚飯【太古城美心】@20160617

2016年 6月17日 (星期五)

上上星期五同老爺和阿旺慶祝父親節﹗今次又是去美心,哈哈...食套餐唔洗諗咁多嘛﹗今次叫的套餐是平時都有,價錢實惠過父親節套餐少少,都幾抵食,加埋中銀信用卡的 85折,12人餐都唔洗 $2000,阿旺 3兄弟,除返 3份,每家庭夾 $650﹗

上湯焗加拿大龍蝦 (伊麵底)

雲耳小瓜炒龍躉球


金磚翡翠豆腐

姬松茸花膠燉水鴨


蠔皇鮑螺片


蟲草花蒸龍躉頭腩

肉崧蒜子浸時蔬

蔥花豉油雞

廟街喳咋,今次終於都正常啦﹗上次母親節個紫米露...我懷疑真是加咗水﹗

整體食物﹑份量都滿意,唯一係上菜速度極快﹗放到成枱都係餸,然後不停幫我地轉細碟,好似好趕收工咁,同埋成日聽人講,大時大節,食套餐都是預早整好再加熱,睇上菜的速度又真是覺得唔係冇可能﹗




2016年6月20日 星期一

鋒味曲奇【港式茶餐廳系列】



謝謝 she.com 又送我最新推出的【鋒味曲奇】,今次的主題是【港式茶餐廳系列】﹗

【港式茶餐廳系列】分別有奶茶﹑咖啡﹑阿華田﹑麥香奶﹗我自己覺得奶茶味最香,我估小朋友就一定最鍾意阿華田,不過我已經成盒拎咗返公司當早餐/下午餐慢慢食啦﹗

奶茶味有淡淡的紅茶味,唔太甜﹗

咖啡味,我記得新年牌都有出過,咖啡香味濃郁,入口唔油膩。

阿華田口味又真是幾特別,原來除咗阿華田,仲加入咗 Valrhona 巧克力粉製成,所以特別香濃﹗

麥香奶是 4款之中最淡口,所以要食先,如果唔係就食唔出佢既真味啦﹗


銷售點:
中環旗艦店:  中環結志街 39-49 號地下
太古城 pop up: 香港太古城道 18 號 太古城中心 1 樓 GH1 (*網頁話去到 6月頭)
觀塘 apm  (new﹗)
網頁: http://www.chef-nic.com/



2016年6月16日 星期四

養兒一百歲,長憂九十九




 眨下眼大頭妹就 6歲,今年幼稚園畢業,9月就升小學,要面對新嘅「挑戰」﹗ 


仲好記得生大頭妹時的情景,大頭妹是由 BB 開始已經是一個乖孩子,連出世都要揀係母親節前一日的星期六,雖然由陀BB到生,整個過程好煎熬,但一見到呢個小生命,真係好感動,自己最大的心願,就係希望佢可以健康快樂成長﹗

仲記得大頭妹第一次病,個陣自己真係好彷徨,加上岩岩做媽媽無耐,完全手忙腳亂,唔知點算好,唔知點先幫到佢。 見住自己個女女唔舒服,佢細個又唔識表達,個一刻我寧願有病個係自己。直到現在,每次 2個囡一病仍然有呢種感覺。我好希望自己可以永遠係佢地身邊照顧左右,但亦深知畢竟唔可以陪佢地一輩子, 而且自己唔屬於大富大貴嘅家庭,可以為小朋友預備嘅唔多,更擔心大吉利是要醫病用錢時屋企會好大負擔,所以佢地一出世我就幫佢地兩個買咗一份醫療保險,等佢地都有健康保障。

當初考慮買醫療保險,好大原因係因為可以附加門診保障,使用醫療卡付款,呢樣對於好似我地呢啲雙職媽媽真係幫咗唔少!試過有幾次返返下工,工人姐姐打比我話小朋友發燒,自己一時間請唔到假,屋企又唔會留太多現金比工人姐姐,去醫院睇又唔知要幾耐,好彩之前買嘅醫療保險加咗門診保障,叫工人姐姐拎張醫療卡帶小朋友去屋企附近嘅網絡診所睇醫生,總算解決燃眉之急。宜家啲門診保障除咗普通醫生包埋專科醫生﹑中醫治療(跌打和針)物理治療等,又全面又方便。

可能好多人會覺得投資做得叻先算係理財有道,其實我個人認為,買保險都算一種理財。依家醫療費用高昂,真係有「需要」時拎一筆錢出嚟應付醫療開支,對普通家庭嚟講係一個好大嘅負擔,加上政府醫院資源緊張人盡皆知,買咗保險,有起事上嚟就多個選擇,唔使排政府醫院。2個囡份醫療保險每月保費只係幾百蚊,長遠嚟睇,份保險嘅價值遠遠超過每月個幾百蚊。

我地「夾心家庭」放係醫療開支啲 budget 可能唔多,所以買保險時除咗了解佢保障之餘,更加要留意保險的配套服務,例如有保險公司專人幫你係入院前計算可以賠償金額,出院時又可以安排出院免找數,最緊要係心中有數就唔怕出院時失預算。

做爸媽嘅,真係養一百歲,長憂九十九,理財之道係女女細細個嘅時候就開始慢慢灌輸,希望佢地都明白我嘅用心良苦啦,至於份醫療保險,我打算幫佢地供到 21歲,之後佢地要自己供返架啦﹗到時我自己都 50幾歲,希望已經退咗休啦﹗雖然以家香港的生活指數嚟講,兩個未讀完書,我都幾難諗退休﹗ 

不過好感恩我兩個囡一直健健康康希望佢地永遠都使 claim 自己份醫療保險

不過隨住小朋友慢慢長大開始讀書,功課考試壓力,做父母好容易 "迷失" 咗,好容易成為「怪獸家長」,所以我成日都要提醒我自己小朋友最重要健康快樂成長至於讀書成績呀、參加啲咩課外活動呀,只要佢地自己盡咗力、做得開心同學到就得了

2016年6月15日 星期三

太古城中心【父親月】優惠推介﹗



今個星期日就是父親節,大家買咗父親節禮物未先?﹗我就一早買咗禮物送比我家的超人爸爸阿旺啦﹗如果大家都未揀岩心水,都可以睇下我個 blog,睇下會唔會有咩 "靈感" ﹗

首先是帶大頭妹參加 adidas  的足球活動,大頭妹好叻叻,一個女仔同一大班年紀大過佢既男仔一齊學踢足球,佢同我講玩得好開心,之後做功課寫週記,佢話 "雖然沒有贏獎牌,不過我也很開心"。其實佢自己一個入去到男仔踢波,我係出面睇都有少少驚,好彩教練同其他小朋友都好好,仲不斷鼓勵大頭妹嘗試﹗

學完踢波,就開始我地既『親子 gift-hunting』行程﹗第一站就是 adidas﹗

其實我平時買運動衫比阿旺,我都是睇款﹑顏色﹑價錢,老實講...有時我都唔明點解差唔多款,但價錢可以差咁遠?﹗原來依家運動衫的物料好講究,要快乾﹑散熱﹑排汗,好多功能,所以可以款式差不多,物料唔同就可以差好遠啦﹗

好似波衫咁...好彩阿旺唔好,其實都幾貴架﹗仲有分 "落場版" 同 "球迷版",落場版即是球星著落場踢波個件,原來好 "講究" 架﹗

平時我都好經常買運動衫比阿旺做運動,佢一星期都會跑 2次步,我都想老公著得 "型仔" 啲嘛﹗

之後下一站去新開的意大利朱古力/ 雪糕品牌 Venchi,大頭妹同小丸子就最開心啦﹗有得試食朱古力同雪糕﹗

都有好多款唔同口味的雪糕揀﹗推介 "特濃朱古力",真是好鬼正﹗

小丸子是一個天生的粉紅控...佢揀士多啤梨雪皅,超級好味道呢﹗唔太酸,但又好 fresh﹗

大頭妹是朱古力控,呢個朱古力真是無得彈﹗食開雪糕既人,睇個 texture,就知正啦﹗

最後一站是 D2R,專攻流行服飾﹗店員話佢地最強就是型格 "親子裝",尤其是運動鞋。


就好似呢對 VANS 咁﹗

仲有 New Balance﹗

小丸子睇中呢對﹗

自己走咗去試著...仲擺晒 post 比 "天使媽媽" 影相﹗


其實我自己都成日行太古城中心,呢一年真是多咗好多唔同的鋪頭,好有新鮮感,又多咗好多年青品牌,同 pop up store﹗呵呵呵﹗岩晒我呢個 shopaholic 媽咪﹗

hehehe...今次活動之後收到 adidas 的 cash coupon,第 2日又同阿旺去再睇過﹗其實...我岩岩先買完一套比佢做父親節禮物,咁岩都是 adidas... 

呢款是今期熱賣啦﹗因為是 "彭于晏" 廣告個件嘛...不過因為于晏效應,佢個隻綠色已經賣晒...阿旺試咗黑﹑螢光黃﹑素綠色...點知素綠色都斷碼,最後又是灰黑色﹗

因為件螢光黃好似 "肥" 啲﹗

呢套就是我之前買比佢既,全完因為條粉紅邊﹗

另外今個父親節月,太古城中心仲有購物優惠架﹗
父親月期間,古城中心特呈獻窩心購物重賞,於19期間,在內消費滿指定金額,即可換領精緻獎賞包括適合「潮爸」的時尚品牌 i.t 現金劵、潮流手機配件品牌Casetify個人專屬手提電話保護殼及Under Armour現金禮券

adidas 
地址:G/F, 018A, 太古城中心
電話: 2907 0158

d2r
地址: G/F, 018B, 太古城中心 
電話: 2344 9081

Venchi
地址: 2/F, 256, 太古城中心 
電話: 3902 3183


2016年6月13日 星期一

小丸子蕩失記


今日呢件事真是要記低佢,真是嚇到我鼻哥窿無肉!我真是第一次唔見咗個女,係職員打比我,通知我個囡係收銀處,叫我接返佢!

話說今日我又一拖二帶兩個囡去北角上phonics,回程話返屋企留下食烏東,經過商場入口的 MOS burger 時, 因為人龍太長,阻住出入口位置,我地本身是要直行,但就要繞過啲人,當時大頭妹行頭,我行中間,小丸子行後,繞過人龍時我仲有另轉望下小丸子,過咗人龍之後,大頭妹因為識路自己向前行,我行多2步,忽然向後望,就唔見咗小丸子,佢應該是行咗去Aeon方向(即是轉咗彎),當時我叫大頭妹返轉頭,佢仲不停向前行,我其實已經好心急,但我又唔可以掉底埋大頭妹,到佢行返轉頭,我同佢講妹妹唔見咗,我地就向Aeon方向行,佢就大叫咗一聲妹妹,點知仲要比個師奶shu佢,我當時真是好嬲,其實佢唔係亂叫,佢叫妹妹,就算你唔知我當時唔見咗個小朋友都唔洗shu?!佢令大頭妹以為自己做錯事!

之後我向前行行到去Aeon 之前 Dr. Kong個位,都見唔到小丸子,我驚我中間miss咗,就走返轉頭,反方向行返一個圈,又行返入Aeon,行到大約之Molly Fantasy 就收到職員電話,問我係咪唔見咗小朋友,小朋友係收銀處,叫我快啲去接佢,佢就快喊,其實我當時都已經行到收銀處,見到小丸子企係姨姨旁邊,想喊未喊出,用紙巾輕印淚水,但一見到我就爆喊,話自己有好大聲叫媽咪,點解我聽唔到。

之後我問收銀姨姨係咪佢自己識搵幫手,佢話佢地職員是樓梯口見到佢叫媽咪,再帶佢去收銀處,好彩佢識講我電話號碼!之後我問小丸子,佢話係叔叔帶佢去姨姨到,佢再講電話比姨姨知﹗

估其實家姐都好驚,因為我都有話佢自己一支箭行咗去,佢當時發脾氣,妹妹著咗水鞋,佢冇水鞋,我話食完鳥東同佢買,所以佢就不停叫我地快啲快啲

佢之前一直都無喊,我叫佢攬返妹妹,佢就忍唔住喊啦﹗

後記: 唔知點解...次次我帶女上 phonics 都出事,上次就比個男仔打,又嚇到大頭小丸喊。今次又唔見咗小丸子,又係嚇到大頭小丸喊﹗當然我知我都有責任,係一個日日都行的商場,警覺性低咗﹗又高估自己的能力,成日一拖二,唔想漏低小丸子係屋企,結果漏低咗佢係商場﹗好多人之後話都好吖,等小丸子知驚,下次唔會自己走咗去,我始終覺得係我責任﹗不過小丸子亦無知驚,佢第 2日仍然繼續自己走咗去﹗所以結論是,要知驚個個係我﹗

我之後都有再同佢地講,下次唔見咗大人,要企定係原來位置,越行得遠,大人就越難搵返你,好似我其實無諗過小丸子會不停向前行,所以行到半路就走返轉頭,其實如果我都繼續向前行,應該就會見到佢﹗

大家 like咗我地 Facebook page 未呀?未就快啲 like啦﹗

2016年6月9日 星期四

又團購晚餐【金饍韓國料理】@20160605

2016年 6月 5日 (星期日)

星期日唔想煮飯,所以我平時成日睇下有冇平團購,買定星期日用﹗今次呢間【金饍韓國料理】等咗好耐,佢新開的時候做過一次,之後就一直都無再做團購,平時食都唔平架,見佢啲 2人套餐都要成 $500- 600 先有牛牛食,所以一次都未試過﹗

今次的團購是 $298 已包加一﹗套餐包括: 前菜﹑燒大虎蝦﹑牛﹑雞﹑五花腩﹑生菜﹑海鮮煎餅﹑飲品 x 2,我本身驚份量好細,但最後我地一家 4 口都差啲食唔晒,都真是幾抵食,而且 service 都唔錯﹗最重要是大頭妹肯食,話樣樣都好味 (但有啲位會辣,可能有黑椒),如果下次再做團購,我都會再買﹗


前菜 6小碟 。

個碟係好大架,所以份量都真是多,我起初買的時候,唔知隻碟個 size,仲好驚得好少﹗

海鮮煎餅

生菜好新鮮,包住啲肉嚟食,又真是無咁 "漏"﹗

飲品仲可以揀啤酒﹗

我就要可樂﹗

未有火之前,2個都話幫手燒﹗

有火之後... 2個都話唔燒啦﹗

下次如果有可以買個 4人餐同埋媽咪﹑大頭姨姨去食﹗仲可以試下個人蔘雞,或者其他野﹗

金饍韓國料理
地址: 太古康山道1-2號康怡廣場北座3樓T1舖 
電話: 2628 0266

大家 like咗我地 Facebook page 未呀?未就快啲 like啦﹗




Related Posts Plugin for WordPress, Blogger...