2016年8月30日 星期二

一個人的晚餐 - AEON Style 新餐廳【Nakayo食堂】



2016年 8月 26日 (星期五)

今日放工去做 facial,做完自己食飯,其實我好怕諗食咩,每日 lunch time 都已經諗到頭都大,忽然醒起Aeon Style 新開咗間定食,好多人排隊,平時帶住 2個女就唔會排,今日得自己一個就一於試下啦!

其實 AEON Style 裝修重開之後,我都少咗落去,真是好多人好多好多人,新開個排,落去行個圈什至會撞到住係九龍新界的朋友專登過嚟行。另外,裝修完雖然好行咗﹑靚咗,不過相對都貴咗,尤其是超市,對我地居民嚟講,真是唔知好定壞.,我買開日本生果,覺得有貴咗大約 20%,以一 PACK日本蘋果為例,以前大約 $50,有時做特價 $39.9都有,依家要 $65/ 4個﹗唔知比我講咗去邊,講返餐飯﹗

我點咗「照燒油甘魚定食 」$69

嘩,有少少喜出望外,其實我平時麻麻地魚,但佢真是唔錯,魚的肉質滑,味道都不錯!最重要是我覺得食到 "日本" 的味道﹗

麵豉湯都好有誠意,有紅蘿蔔、白蘿蔔,海帶、豆腐,但我覺得麵豉可以再濃少少。

我無食秋葵,紅蘿蔔白蘿蔔好好味,仲有少少柚子味,真是好感動。

比個menu大家睇下!

其實我見比較多人食海鮮丼,下次再去都要試下。

整體唔錯!相信會成為我地的新食堂,如果唔係成日都咁長龍的話。

【Nakayo食堂】
太古康山道1-2號康怡廣場南座AEON地下  

大家 like 咗我地個 facebook page未呀?﹗未就快啲 like啦﹗

2016年8月29日 星期一

二人世界【久違了的金雀餐廳】



2016年8月25日 (星期四)

呵呵呵﹗今日2個囡去爺爺嫲嫲屋企度假,我就同阿旺二人世界,去接阿旺放工,行咗一陣海港城,再坐船去灣仔,再行落銅鑼灣晚餐,係咪好浪漫呢!行到腳都痛囉﹗

上次我生日時,阿旺已經話想食金雀,裝修咗幾個月,終於都重開,裝修後同之前分別不大,不過就比之前細咗一半,大約9:00去到都要等位,2人亦比以前難啲等到卡位,得返入門口最左的幾個卡位,不過香港咁貴租,真是無辦法﹗

香港的夜景真是好靚!

金雀真是由我地拍拖食到結婚、生小孩子,充滿回憶的地方!

裝修後加了一點點價,大約$20-40吧!


2046餐由 $246食到依家 $450。

講完一堆一癈話⋯終於講到食物啦!

餐包仍然是餐包,同以前一樣,是唯一無變的!

羅宋湯⋯唔知點解覺得淡咗!希望只是錯覺,可能最近成日食太平館,食過太平館既都知,太平館的羅宋湯是好杰身,唔知係唔係咁,所以覺得淡咗。

黑椒牛柳,同以前一樣好味,但薯條唔同咗⋯⋯

食金雀其實都是食童年回憶,希望佢地裝修之後真是可以繼續做落去啦﹗

大家 like 咗我地個 facebook page未呀?﹗未就快啲 like啦﹗



2016年8月27日 星期六

傻夫婦九州親子之旅 DAY 2 【 熊本/ 熊本城/ 櫻之小路 】



2016年7月11日 (星期一)

繼續第 2日的行程,探完熊本熊就去【熊本城】,其實早在一月買完機票PLAN行程的時候,就計畫去【熊本城】,旅行我都喜歡參觀歷史建築,之後『熊本地震』,幾個月來諗來諗去,最後都是決定去,雖然出發前已經知道【熊本城】其實仲未開返。最後決定去,是想比大頭妹小丸子睇下地震是什麼一回事,去旅行除了玩,我都希望增加小朋友的見聞,另外都是希望實質支持熊本,不過原來熊本城的損毀比我想像中嚴重﹗

正當我下午係市內遊走的時候,完全感覺唔到幾個月前就有 7級以上的地震,【熊本城】的損毀比我想像中嚴重,這個應該是正面的入口。
 

 呢個『清正公』,我真是對佢唔住,話說我老遠見到,叫大頭妹小丸子睇『武士』的時候,小丸子忽然問我,『佢係唔係【好彩無事】呀?』,我要 LOAD 咗一陣先知佢講咩,因為我地之前講地震,佢意思佢好彩無事...無震爛到。


這是其中一個入口,當然現在已經封了,不過有2個不知道是職員/ 義工的伯伯當值,佢見到我地在外面經過,主動叫我地行過去看看,問我地係邊度嚟,仲比返入面的一啲相我地睇﹗

其實真是比我想像嚴重得多,但係市內,又完全感受唔到地震的痕跡,真的不知道要幾多年才可以修復。


職員叫我地睇下呢條柱,原本是直的。


我地本身唔敢影相 (怕唔禮貌),不過職員反而叫我地影相,叫我地話比多啲人知。

之後去旁邊的『櫻之小路』,幾乎是零遊客,只有數個日本學生。

冷清清的﹗

但仍然有熊本熊﹗

熊本加油﹗

OKOK...食啦食啦﹗不過其實下午睇熊本熊先食過咋喎﹗

決定幫襯下支持下﹗蜜瓜雪糕好好味,1200YEN。


小丸子叫家姐一齊同佢呻脷﹗

呢架巴士都可以用熊本電車的 1日PASS坐,所以原來我地坐了 5次﹗

走的時候,小丸子經過一檔炸物係都要試食,食完仲要再食唔肯走,最後我話買一盒啦﹗結果真是好好味,小丸子果然係『食家』﹗原價1060 YEN,依家 530 YEN,我聽到當地人問係唔係日日都是半價,店員話是...我諗佢地生意真是好難做。分別是炸魚餅﹑魚餅﹑炸芝士魚餅﹑炸蟹肉餅﹑炸雞。

睇小丸子食得幾開心﹗

之前有講過我地回程無訂『指定席』,返到 JR熊本站時見到有一班直接返博多的新幹線 7分鐘後開車,即刻衝入 SERVICE CENTRE 訂指定席,時間剛剛好﹗其實直通車的車程是 40分鐘,唔直通都只是 50分鐘,中間多 2個站,而且每隔 10-20分鐘就有一班車,所以坐新幹線去熊本真是好方便。

最後小丸子同大頭妹 2個,係坐新幹線回程時食晒係櫻之小路買的 1盒炸物﹗好彩小丸子夠為食,唔係可能要餓住坐車返博多﹗

大頭妹都食好多,相信一定好味﹗

希望下次再來的時候,熊本城已經回復舊貌﹗熊本加油﹗

傻夫婦九州親子之旅行程一覽:
傻夫婦九州親子之旅 DAY 1 【HK EXPRESS 初體驗/ SOLARIA NISHITETSU HOTEL/ ひょうたんの回転寿司 】
傻夫婦九州親子之旅 DAY 2 【JR KYUSHU RAIL PASS/ 新幹線初體驗/ 熊本/ KUMAMON SQUARE 】
傻夫婦九州親子之旅 DAY 2 【 熊本/ 熊本城/ 櫻之小路 】
傻夫婦九州親子之旅 DAY 2 【晚餐: 華味鳥 】
傻夫婦九州親子之旅 DAY 3 【豪斯登堡/ WATERMARK HOTEL/ 花之家】
傻夫婦九州親子之旅 DAY 3 【豪斯登堡 WATERMARK HOTEL/ 花之家(午 + 晚餐)】
傻夫婦九州親子之旅 DAY 4 【豪斯登堡/博多車站拉麵街/天神】
傻夫婦九州親子之旅 DAY 4 【晚餐: 大東園】
傻夫婦九州親子之旅 DAY 5 【海之中道海濱公園】
傻夫婦九州親子之旅 DAY 5 【晚餐: 博多名產牛雜鍋笑樂/ 宵夜: 屋台初體驗】
傻夫婦九州親子之旅 DAY 6 【星乃咖啡店/ 福岡機場】

大家 LIKE 咗我地個 FACEBOOK PAGE未呀?﹗未就快啲 LIKE 啦﹗


2016年8月24日 星期三

大頭妹成長誌【香港舞林盛會暨香港挑戰盃舞蹈比賽 2016 】



2016年 7月 24日 (星期日)

之前芭蕾舞學校揀咗大頭妹參加 2個比賽,第一個比賽就正正是 6歲生日,今次是第 2個比賽【香港舞林盛會暨香港挑戰盃舞蹈比賽 2016】﹗

今次完咗就唔洗再練習...的確...興趣同比賽同考試完全是兩回事。之前為了比賽加強練習,一個星期要上 2堂芭蕾舞 (恆常 + 比賽班),每次 1 - 1.5小時,星期六﹑日都要上芭蕾舞,少咗時間去玩,大頭妹話覺得辛苦,尤其是佢唔明點解得佢要跳 2日,但小丸子就唔洗,實情是學校無揀小丸子嘛﹗所以今次應該都是短期內最後一次比賽,再有下次機會都未必會參加了﹗

今次參加【香港舞林盛會暨香港挑戰盃舞蹈比賽 2016】,地點是柴灣青年廣場Y劇場,之前都帶大頭妹來過睇表演﹗

今次帶埋小丸子一齊去睇比賽,佢好好笑,唔係家姐出場,佢唔比我拍手﹗

其實大頭妹明明表演/比賽都好開心,但就是唔想練習,佢話佢唔鍾意做辛苦的事,但呢個世界邊有免費午餐架?﹗

大頭妹平時個人無咩自信,但每次跳舞,佢都好開心好有自信,所以阿旺堅持要大頭妹學跳舞,連幼稚園老師都講,佢話睇得出大頭妹跳舞有天份,動作做得好仔細,有節拍感,而且跳舞時特別有自信,叫我要比佢繼續跳舞。

最後得到豬肉獎銅牌,不過就是大頭妹第一個獎牌,都好有紀念價值﹗

大家 like 咗我地個 facebook page未呀?﹗未就快啲 like啦﹗

2016年8月23日 星期二

8月之星生日飯【小平津】@20160810



2016年 8月10日 (星期三)

大約一個月一次的大學同學聚會,其實真是好開心,大家可以 keep 住畢業咁多年都仍然個個月食生日飯﹗人大咗會更加珍惜朋友,畢竟真心朋友難求﹗

今次 8月之星話想食日本菜,我呢個悶人,又提議去返之前去過的小平津,價錢唔貴,食物都有水準,地點是銅鑼灣,大部份同學都方便﹗

南瓜沙津,香港唔多地方有得食,我自己就好鍾意食,不過應該幾肥﹗

拉麵沙津,又是出面好少見,都好好味架﹗


芥末八爪魚,好惹味﹗


煙肉荔枝卷,煙肉加荔枝竟然好夾,之前試過煙肉加車厘茄又是好好味﹗

雞肉丸串,估唔到好好味喎﹗

其實仲叫咗牛舌,好好味,唔記得影。呢碟是雞腎,都好好味﹗


豆腐鰻魚天婦羅,我覺得幾好味,不過塊鰻魚好似比以前細咗﹗

什錦天婦羅,我地研究咗個啲一支支的好耐,我話係意大利粉之類,最後問店員,原來真是麵,不過係日本素麵,佢話好多人客以為是金菇﹗

7色刺身,我記得都是 $2xx,都幾抵食﹗


軟殼蟹卷,好味﹗

炸蝦卷,我覺得軟殼蟹好味啲﹗


雞翼餃子,無食到﹗

牛肉烏東,飽肚之選﹗

最後仲有菠蘿雪糕 (送的),畫上完美句號﹗

【小平津】
銅鑼灣登龍街28號永光中心6樓
2893 9697
星期一至日: 12:00-15:00; 18:00-23:00
http://www.openrice.com/zh/hongkong/r-%E5%B0%8F%E5%B9%B3%E6%B4%A5-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E6%B2%99%E5%BE%8B-r82628

大家 like 咗我地個 facebook page未呀?﹗未就快啲 like啦﹗




Related Posts Plugin for WordPress, Blogger...