2017年6月14日 星期三

大頭小丸 Fashion Show

大家之前如果有睇開我 blog都知,其實我同阿旺都鍾意男仔多啲,不過係自己既,當然仔女都咁愛惜,亦無意再追個仔啦﹗依家 2個女大大下,完全感覺到,其實生女真是仲開心,無男仔咁難搞,又可以一齊扮靚靚﹗

由細到大,大頭妹都唔算貪靚,仲越大越唔貪靚,唔知點解,佢覺得貪靚係唔岩?﹗應該係幼稚園時,老師叫佢地冬天開 PARTY時唔好貪靚著公主裙,佢自己誤會咗,仲一直記住﹗小丸子就好貪靚,小丸子係每朝都陪我一齊化妝,佢知道晒啲化妝哈點用,邊樣用係咩位置,佢係清楚晒既﹗有時間中大頭妹會問個啲咩嚟,佢就會扮晒專家咁講解比家姐知。 不過佢個人就『呢呢啡啡』,都唔知點解佢會咁,買條靚裙比佢,佢都會攞嚟抹手﹗﹗﹗

全身連頭飾都是自己襯,星期六返興趣班,我諗佢最開心就是可以自己襯衫,基本攞咩衫比佢,佢都唔滿意,佢有自己的主意﹗不過佢基本上是一個粉紅控,所以襯出嚟通常都無咩問題,只是比較 『迷人 pink lady』少少﹗
Top: $128  Dress: 199  Shoe: $148 (Global Work)

大頭妹仍然係比咩佢著咩,佢最多話舒服唔舒服,要揀著的舒服既﹗
Top: $128 Dress: $148 (Global Work) Shoe: bibi 

呢條紗紗裙,小丸子睇中好耐,不過我唔肯買,要成 $200幾,仲要係紗,肯定佢好多著爛,後來見佢生日,佢揀來揀去又好堅決只要呢條裙,就買比佢啦﹗
Top: $158 Dress: $248 (Global Work)

咁睇﹗襯條白色紗裙又真是靚啲既﹗

件白色本身買比大頭妹,小丸子根本唔適合著白色,佢成日食野食到成身都係,又用嚟抹手,但佢就係都要白色個條,唔肯除返出嚟﹗
One Piece: 小: $248,大:$199  (Zara)

又要講句好耐無講過的『敗家萬歲』﹗﹗﹗

大家LIKE 咗我地 FACEBOOK PAGE未呀?﹗未就快啲 LIKE 啦﹗
 

2017年6月7日 星期三

傻夫婦親子東京之旅@2017【行程篇】

呵呵呵﹗又係一年一度的暑假旅行的行程篇,其實我真是覺得去旅行,plan 行程係最開心的部分之一﹗

今年的目的地是日本東京,其實都十五十六咗一陣子,想去大阪多啲, 因為2個女未去過,又想去沖繩,連我自己都未去過,又有少少想去返九州,上年去 6日,好多地方都未去﹗其實有諗過去新加坡,暑假坐 CX 都是 $1000多,想去馬來西亞 LEGOLAND,不過最後都是敵不過日本的誘惑﹗哈哈﹗如果下年 CX 去新加坡的機票都係咁平,我地就去 LEGOLAND 啦﹗最終都是揀返東京,因為我想 SHOPPING,為咗同前年的行程有大啲分別,今次會去浸溫泉﹗

機票 (http://www.hkexpress.com/zh-hk):
又是一早買機票,又是坐 HK EXPRESS,上年去福岡第一次坐,感覺良好,今年都是揀返 HK EXPRESS,無他平嘛﹗我又想去日本,暑假坐 CX 去日本,實在太貴啦﹗今次我繼續好勇,來回程都坐凌晨機,仲要個日大頭妹係要返學 (暑假前最後一天),即是放學返屋企換衫食飯就出發去機場,哈哈哈...上機應該一定訓得著﹗不過主要係我對 2個女好有信心,佢地出門都好乖,上車就訓,落車就自己行 (小丸子有時要抱啦﹗不過最近都訓練佢要自己行﹗),但我老公話佢對我最無信心﹗有冇搞錯?﹗

羽田機場 (http://www.haneda-airport.jp):
今次第一次飛羽田機場,離市區近啲,但就唔清楚機場多唔多野行啦﹗

機場巴士 (http://www.limousinebus.co.jp/ch2/bus_services/haneda/index):

酒店
箱根小湧園酒店 http://www.hakoneho-kowakien.com/en/

其實上 2次去都想去箱根,今次有少少想去富士山個邊,帶大頭妹小丸子睇下富士山,不過最終都是揀交通比較方便少少的箱根。去小涌園就可以順便去埋小湧園溫泉樂園,比 2個女玩下水﹗今次揀咗箱根小湧園酒店,比較出名應該都 ok 呱﹗訂了 SUITE 之中,最細的房,都差不多 $4000/晚,因為溫泉酒店是人頭計,大頭小丸都要逐個收費,所以住溫泉酒店都是 2人世界/ 小朋友仲細時就住多幾次啦﹗

小涌園溫泉樂園,今次 BOOK 酒店時訂埋飛﹗


箱根都可以遠眺富士山﹗


仲未諗點樣行,樣樣都想玩,想坐海賊船﹑吊車,不過全部都要睇天氣﹗



世紀南悅酒店 (http://en.southerntower.co.jp/) :
 

因為今年大頭妹暑假已經 7歲 (時間過得真是快),日本大部份酒店都是 7歲以上當成人計,之前找了很多間酒店,最後比我找到【世紀南悅酒店】,佢地12歲以上才當大人計,房間係新宿來講都算大,相對價錢當然都少少貴 (對我來講),不過我個人細膽,帶住小朋友真是唔想住民宿,又怕影響鄰居,又怕有咩事時,走火警﹑小朋友唔舒服都會好麻煩,貴少少都住返酒店啦﹗

後來都仲搵到幾間新宿的酒店係可以比大少少小朋友一齊入住,例如: 哥斯拉酒店 (8歲以上當大人計),新宿太子 (都是 12歲)﹗

池袋大都會酒店 (http://www.hotelmetropolitan.jp/):


原先其實訂了【池袋大都會酒店】,有 3人房的酒店唔多,有亦好貴,所以搵來搵去,見池袋大都會酒店網上的評價都唔錯,3人房其實同【世紀南悅酒店】2人房一樣價錢,大頭姨姨上年住過都話地點方便,不過最後都是揀返新宿,因為去迪士尼同箱根都是新宿方便啲。

景點:
東京迪士尼樂園 (http://www.tokyodisneyresort.jp/en/):
東京迪士尼樂園酒店 (http://www.disneyhotels.jp/en/dah/facility/index.html):

今次應該去海洋個邊,前年都已經去咗東京迪士尼樂園 ,所以今年再去就去未去過,加香港都無既 Sea 啦﹗原本想住一晚,因為平時唔會捨得比幾千蚊係香港住,去到外地係唔係都要住酒店,不過最後阿旺揀了箱根﹗

東京鐵塔 (https://onepiecetower.tokyo/?lang=zh-tw):

其實上 2次都無去過東京鐵塔,今次應該會去,反正上次去咗 SKY TREE,而且佢地依家有 ONE PIECE館,我終於搵到一個地方比阿旺去啦﹗

餐廳:
釣船茶屋 (http://www.zauo.com/):
上年去福岡已經想試,不過因為第一次去九州,好多野都想試,牛腸鍋﹑華味鳥﹑屋台,最後不得不放棄釣船茶屋,但今年已經是連續 3年去日本,下年應該要轉場,所以今次唔食,就唔知幾時先會再去啦﹗點知上網睇,明明福岡個間好多好評 (見大少奶都去過話好新鮮),東京既好似麻麻地,首先見好多人話大煙味,另外都見到有人話食物麻麻?﹗但唔係自己釣再食刺身咩?﹗所以都是 1516中﹗
 

望落好真是好似唔太吸引﹗


牛かつhttp://www.jfoods.co.jp/menu.html
之前問朋友去東京有咩必食,朋友介紹食吉列牛,平時都是食吉列豬多,又真是未食過吉列牛喎,所以今次應該會去試下﹗加上幅相都真是好吸引﹗

千代田: http://niku-mansei.com/contents/02honten/10tiyoda.html
另一樣今次想試既是鐵板燒,其實次次去日本都會食和牛,好多時都是食『燒肉』,今次想食鐵板燒,好耐之前 2人世界時去神戶食過一次,但今次同 2個女去,唔知佢地食唔食,日本餐廳通常預一人一個餐,所以又是 1516中﹗



TAKAFUKU: http://sukiyaki-takafuku.com/menu/index.html
JOJOEN: http://www.jojoen.co.jp/



暫時只是 PLAN 咗咁多,如果大家仲有啲咩必玩必食推介,記得通知我呀﹗

大家LIKE 咗我地 FACEBOOK PAGE未呀?﹗未就快啲 LIKE 啦﹗
 


2017年6月6日 星期二

小兒健脾湯水: 粟米紅蘿蔔淮山蓮子鵪鶉豬展湯 (附食譜)



最近為咗大頭妹的體重都幾頭痛,我記得佢 4歲返健康院檢眼的時候就有問過護士,大頭妹的體重合唔合格?﹗當時大頭妹大約是 32磅,應該是成長線的 3%,護士話佢一直都是 3 - 10%線,無話突然由 97% 線跌落嚟,都唔係太大問題,如果我擔心可以再約時間見醫生。

如事者到依家 7歲,大頭妹一直都是偏瘦偏細粒我是知道,但這3年來好似都無重過,依家都是得個 35 - 37磅,好似唔識大咁,好彩就都仲有高,但無重到,仲要拉高咗,望落就真是越來越瘦﹗

周圍問下人有咩增肥方法,其實我已經唔敢比大頭妹介奶,佢到依家都是早晚各一包 125ml 奶/ 朱古力奶。另外,就是多啲湯水﹗之前湊大頭妹的 AMY婆婆其實叫過我地煲下鵪鶉,不過好難買,最近見到有急凍的都試下啦﹗鵪鶉蛋白質、維他命﹑鐵都比雞肉高,而脂肪含量﹑膽固醇都少過雞肉,所以好適合補身﹗
 
粟米紅蘿蔔淮山蓮子鵪鶉豬展
材料:
粟米﹑紅蘿蔔 各1條
准山 4-5片
茨實 2湯匙
蓮子 2湯匙
紅棗3粒
蜜棗 2粒
豬展 $30 - 40
鵪鶉 1隻

做法:
1. 豬展﹑鵪鶉飛水備用,藥材洗淨,浸30分鐘。
2. 煲滾  3公升水,將所有材料放入,大火煲滾之後用小火煲 1.5 -2小時。
3. 下鹽調味。


今次成功喎﹗平時大頸妹好多湯都唔飲,今次話好好飲,即刻谷佢飲返 2碗﹗


鵪鶉係上次係 FOODWISE 入貨,好抵 $58有 2隻,我今次落咗一隻,再加豬展,啖湯真是超甜﹗岩岩上網睇依家做 $48.9/ 2隻﹗就算再加 $30-40肉,都仲平過煲雞,又無雞咁燥﹗


係 AEON 都見到,就貴少少。


 大家 LIKE 咗我個 FACEBOOK PAGE未呀?﹗未就快啲 LIKE啦﹗

2017年6月5日 星期一

脊的疑惑


最近走去睇脊醫,其實都痛咗一段時間,比我一路拖一路拖,一直都的唔起心肝去睇。

話說之前同媽媽朋友講起,我每次要湊大頭小丸一日,我就一定要食必理痛,有時出去玩,仲會食定打底,我都知成日食必理痛唔好,但因為我湊完佢地一日,就會全身骨痛,有時仲會條頸扯住痛到頭痛,都無辦法。

之後朋友問我有冇睇過脊醫,我又真是無諗過,其實我成日周身骨痛,原來是同自己脊骨有關喎,我成日都以為湊女太辛苦咋﹗要知道小丸子成 40幾 50磅,間中有時出街玩玩下訓咗,都仲要抱架﹗

第一次見醫生會先檢查,再做「衝擊波」治療,做的時候會有少少淵淵地,代表肌肉繃緊啦!最後醫生會做「矯正」,呵呵呵,我之前一直以為脊醫好似一般 body massage,原來誤會晒!

醫生話我情況唔算差,又唔係好好啦!問我照唔照x-ray睇清楚啲,所以約了第二日到化驗所照x-ray,下星期再返去睇報告覆診。

唉...估唔到原來都真是幾麻麻地!本身頸是應該有個C curve既,我無咗都不特止,已經有少少向前傾,醫生話其實坐office的人好普偏,可能因為電腦位置唔好,成日伸前條頸去睇電腦!另外,就是玩手機啦!佢話依家越來越多年青人有頸部的問題!

再睇下條脊骨,都「咩咩地」,醫生話是因爲繞腳,所以一定要戒!


暫時做了 2次治療,第 1次做完時就去了露營,所以即時打回原形,第 2次做完之後,就真是有鬆啲既感覺,都要再繼續覆診,醫生話之後會再教一啲我可以係屋企做既改善做作,我學識咗再同大家分享!

依家2個女日日提我唔好再繞腳,唔係背脊就會攣啦!我又可以順便提下佢地要留意自己的坐姿!一舉兩得!

2017年6月1日 星期四

近況

有睇我 FACEBOOK 專頁的都應該知道,我公司搬咗,我再唔係中環 OL,我升咗呢做咗『山頂 OL』。在老闆家 HOME OFFICE,連帶包午餐,是最令人鼓舞的地方,以後再唔洗諗午餐食咩啦﹗不過返工放工的時間,就長咗好多﹗﹗﹗好多﹗﹗﹗好多﹗﹗﹗試過最高紀錄用了 2小時先返到屋企,朋友開玩笑話返大陸都返到﹗

依家仍然研究點樣放工最快可以落返中環,結論是睇彩數,我放 5:30,有時上到山頂都 6:00,等到車落山都 6:15-6:30,落到中環就 6:45-7:00,即是比之前遲咗成個鍾先放工,不過仍然早過好多要 OT 的人﹗唯有咁安慰下自己啦﹗有時好彩遇到大廈其他人,會車埋我落中環/ 金鐘,又有時等等下小巴,有 3-4個人就夾埋坐的士﹗

講返伙食,老闆個工人煮野食都唔錯,成日覺得點解佢可以煮到咁多野出嚟,明明 3日先去街市一次﹗

LAKSA

姐姐包的餃子真的不錯﹗

魚蛋粉﹗

炒麵同酒樓的一樣味道,仲有花生豬骨粥﹗

吞拿魚意粉,蘋果沙津﹗

大家 LIKE 咗我地 FACEBOOK PAGE未呀?﹗未就快啲 LIKE 啦﹗



2017年5月31日 星期三

媽媽聚會【蒸蒸日上】

先一排因為有位不小心的爸爸係家長 GROUP『失言』,令好多無小朋友的人疑問問,其實入家長 GROUP做咩呢?﹗有人話跟功課囉,之後就會有人話寫手冊是小朋友的責任,我地細個都無 WS 問功課架啦﹗其實我覺得又唔洗考究,反正都已成習慣,我地媽媽真是可以係家長GROUP入面識到朋友,不過我諗爸爸應該可以唔洗GROUP啦﹗

同大頭妹幼稚園媽媽的聚會,雖然大頭妹 K3轉了校,又雖然大家都升晒小學,不過我地都 KEEP住 2-3個月食一次飯,通常等大家小朋友考完晒試,我地就會出嚟鬆一鬆﹗每次都會去食好野,証明我地平時幾辛苦﹗

今次去【蒸蒸日上】食蒸海鮮﹗我地叫了一個 AROUND $500/ 位的餐,要先預定,因為老舊要預備海鮮﹗同下面呢個差不多,不過我地 UPGRADED咗個蟹做長腳蟹﹗


長腳蟹好大隻呢﹗

蜆好清甜,我覺得食蒸海鮮一定要食蜆,真是好鮮味﹗

扇貝,唔知點解唔連殼蒸,好似無咁甜,平時如果連殼蒸會有啲水,好鬼鮮甜嘛﹗

鮑魚都幾鮮味﹗

乳龍蝦,上枱時仲郁郁下,好殘忍咁,不過食肉就是咁架啦﹗


其實仲有好多野食未影,好似仲有雞﹑牛﹑菜,只是影了海鮮﹗

個粥先係精華所在﹗正到無朋友﹗有 2款粥,一款是柴魚花生粥,一款係菜乾粥﹗


最後仲有甜品﹗

其實有好幾款套餐,由 $330-530不等,想再食豪啲都應該可以問下﹗

蒸蒸日上
網址: https://s.openrice.com/QrbS0zCs3W0
地址: 尖沙咀 彌敦道184號英龍商業大廈11樓

電話: 5596 9382

2017年5月29日 星期一

峰壽司魚屋@20170518

2017年5月18日 (星期四)

今日要出外工作,沒有回 office,中午的時間剛好在銅鑼灣又諗唔到食咩,想行下 GU,所以行咗過皇室堡,就揀咗去【峰壽司】食午餐啦﹗點知...

其實都唔係第一次中伏,上一次是 tea time,以為是下午茶時間出事啦﹗今次午餐時間,一樣出事,壽司飯太酸,飯的口感亦不好,上面的刺身感覺唔新鮮﹗真是超級失望﹗晚餐/ 散叫唔知會唔會好啲?﹗如果唔係以呢個質素,應該都好難係銅鑼灣捱落去?﹗

午餐定食的價錢是平,才$58起,但都唔可以唔理質素架﹗﹗﹗

前菜同麵豉湯反而正正常常﹗


一共 10件壽司,我最後食淨 5舊飯﹗可想而知...味道有幾...
刺身上枱望落已經麻麻地新鮮,食落當然都是唔新鮮,咁都係嘅...$58一個餐,唔應該有太大期望,其實我唔介而意少 2-3件,比返好少少質素我﹗

我應該唔會再比多次機會,以前好喜歡食佢地的蟹棒壽司呢﹗依家都係食返元氣算啦﹗

峰壽司魚屋
地址: 鑼灣告士打道311號皇室堡4樓405號舖 
電話: 3583 3316
https://www.openrice.com/zh/hongkong/r-%E5%B3%B0%E5%A3%BD%E5%8F%B8%E9%AD%9A%E5%B1%8B-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E5%A3%BD%E5%8F%B8-%E5%88%BA%E8%BA%AB-r47015

2017年5月27日 星期六

南港島線【海洋公園】



2017年 1月8日 (星期日)

南港島線聖誕節假期通車時已經想帶大頭妹和小丸子去試坐一下,試坐就當然要去海洋公園啦,無理由坐完之後原車坐返屋企吧﹗不過當時驚太人多,過了 2個星期,見運作大致順暢,就帶大頭妹小丸子去海洋公園會玩下。有了南港島線之後,去海洋公園真是好方便,我由太古出發,去到海洋公園門口都只是用了 25分鐘,以我當日星期日所見,又不是特別多人﹗

車站有 7-11﹑美心西餅﹑鴻福堂,入園前後可以補給一下﹗

【超時空魔幻匯演】真是好精彩,之前去澳門都有睇過不同的魔術 show,想不到這個樂園門票已包的魔術 show 都一樣精彩﹗﹗﹗成個魔術 show,用故事和舞蹈串連,分開 5大部分﹗大頭妹同小丸子睇到好緊張,不停問我啲野真定假?﹗我話假佢地又話係真,我話係真架,佢地又唔信,都唔知佢地想點﹗

最後仲有得影相﹗


睇完 show 就去兒童皇國玩啦﹗玩玩下...小丸子話要食野,其實食咗 lunch 先入去架喎﹗咁快又要食 tea?﹗

兒童餐 $88,樂園價來講,食物質素都 ok 的﹗

之後去睇海威劇場,講海洋保育,好岩小朋友睇﹗


其實我平時唔比佢地玩呢啲要額外用錢的遊戲,今次破例比佢地玩一次,$50/ 24次,每人有 12個波,最後大頭妹竟然中了 2個細獎,可以換一個中獎﹗


平時多數是暑假/ halloween 的時間去,唔知海洋公園關 7:00pm,依家有地鐵 7:30已經返到太古了﹗呵呵呵﹗以後去海洋公園玩就方便得多啦﹗


Related Posts Plugin for WordPress, Blogger...