2017年1月25日 星期三

小丸子 K2 家長日



2017年 1月 21日 (星期六)

呵呵呵﹗新年假前快快手寫好小丸子 K2 家長日的 BLOG,免得假期後又拖到唔記得晒﹗上星期六,又到一年一度的家長日,我平時好少會主動找老師,又沒有去接放學,所以一年就只有這個時間可以和老師好好溝通一下﹗小丸子的幼稚園好好,家長日除了拿成績表和老師談談,仲會有小朋友的作品展覽,家長可以從多方面了解一下小朋友的校園生活﹗

首先是見班主任,班主任讚小丸子最近上堂明顯專心咗,少咗遊雲,多咗舉手答問題,同同學相處都開心,唔會爭野﹑嗌交...即是淨係蝦家姐,真是無人性﹗另外,就是成日掛住玩唔做堂課,做完堂課又唔舉手同老師講,寫字求求奇奇...上年都已經係咁...貪玩...

見完班主任再見英文老師,不過英文老師放了假,所以傾唔到小丸子上堂的表現,但就可以講下課程,原來學校主力是教 PHONICS,老師話到 K3會教晒全部 PHONICS SOUND,K2下學期會教多啲 BLENDING,所以可以開始係家中都練習一下,睇書時做下 BLENDING 的練習。最後就見普通話老師,苗老師之前都有教過家姐,不過上次家長日,太多人排隊,所以見唔到,今次同苗老師傾下,發覺佢好了解每一個學生,佢『一矢中的』話小丸子是比較上透過玩會學得快一點,所以如果想補下普通話,等上小一快啲適應,補習坐定定其實唔岩佢,自己播下歌仔同佢唱下會更加理想﹗

江湖傳聞小丸子的幼稚園好谷,其實又不是,學校的課程不算深,功課量少,無默書無考試,之前觀課見佢地相當活動教學﹗今個學期的專題學習是『野餐』,所以教不同的食物﹑天氣﹑野餐的活動﹗

上堂可以整啫喱,整完仲有得食,真是開心﹗

小朋友做天氣報告,睇下天氣適唔適合去野餐﹗

用輕黏土做出不同的野餐食物,小丸子話佢有份整士多啤梨﹗

估唔到小丸子都會 『貼堂』喎﹗


小丸子唔洗預備考小學,真是輕鬆過大頭妹當年好多,不過都要開始預備升小一啦,今年大頭妹升小一,好多時候都忽略了小丸子,今個暑假之後就要開始發力啦﹗

 大家 like 咗我地 facebook page 未呀?﹗未就快啲 like 啦﹗



2017年1月13日 星期五

除夕晚餐【君頤上海小廚】@20161231



正當除夕大部份人都去食西餐,我地食中餐,呵呵呵,可以不用排隊﹗今次去太古的【君頤上海小廚】,其實屋企樓下都有一間【翔龍】,不過最近越來越難吃,仲要越來越貴,價錢加了,份量又同時少了,所以現在都好少去翔龍,曾經上年沒有工人姐姐的時間,翔龍是我地的飯堂呢﹗現在寧願行遠少少去太古吃﹗

冷盤 $88 可任選 3款﹗牛展的味道不錯,淆肉只有我吃,我總是喜歡吃『肥肉』,以前瘦的時候沒有什麼問題,但是現在...真是要戒口了﹗又少做運動﹗

醉雞是阿旺的最愛﹗

上海粗炒十分美味,最重要是大頭妹和小丸子都喜歡吃﹗

炒鱔糊,原來只有阿旺吃,下次都是不要再點了﹗

銀絲卷點比大頭妹小丸子的﹗

砂鍋什錦 $88 真是好抵呢﹗我覺得好過吃砂鍋雲吞雞,反正煲完湯的雞又沒有人吃﹗這個砂鍋什錦有豬肚﹑蝦仁﹑蛋角﹑豆腐,更加岩胃口﹗

煎鍋貼

第一次點這個蛋白蒸蝦,味道不錯﹗

【君頤上海小廚】
地址: 太古太古城寶安閣地下G510-511舖
電話: 25689989
openrice: https://www.openrice.com/zh/hongkong/r-%E5%90%9B%E9%A0%A4%E4%B8%8A%E6%B5%B7%E5%B0%8F%E5%BB%9A-%E5%A4%AA%E5%8F%A4-%E6%BB%AC%E8%8F%9C-%E4%B8%8A%E6%B5%B7-%E4%B8%AD%E5%BC%8F%E5%8C%85%E9%BB%9E-r16826

2017年1月11日 星期三

大頭妹小一第一張成績表

剛剛的星期六是大頭妹小一第一次家長日,收到大頭妹小一第一張成績表﹗其實沒有意外,亦沒有驚喜,因為考試之後一星期,已經知道分數了,今次只是去拿成績表,班主任講下大頭妹在學校的表現﹗

先講成績,英數2科 9字頭,中常 8字頭,我地學校成績表會出中位數,但唔會出名次,英文科就是 4科之中最好,中文科在中位數以下,老師叫要多花時間在中文,多看中文故事書﹗其實我自己對佢中文科成績已經滿意,自己知自己個女的中文水平,唯有再比心機啦﹗平均分力保 9字頭,老師話考得不錯,但同時都話小一其實好多人都 90分以上﹗對吖﹗小一應該是 4科都 9字嘛?﹗我自己細個是囉﹗哈哈﹗即是要繼續努力啦﹗不過都唔抱太大希望﹗而且漫漫長路,前面仲有好多考試,不需要急在一時。對對對,我同自己講,洗自己腦﹗

老師對大頭妹的評語一如以往,都是上堂好乖 (操行有 A-),不過希望她可以多回答問題﹑多舉手 (學習態度 B+)。老師同大頭妹講希望佢可以多舉手,下次以學習態度 A- 為目標﹗唉﹗由 K2 聽到依家,每個老師的評語都一樣。老師話大頭妹假期後好似比較 "遊雲",其實我自己都發現到,可能聖誕節玩得太多,又夜訓,都是時間收拾心情了,最近叫她做功課,好似好難專心,上堂抄手冊又抄唔足,明明開學的時候就做得好好,最近仲欠了 2次功課,明明已經做好帶了回校,完全唔明白點解會欠交。最慘大頭妹自己亦唔覺得是一回事,我估老師都好仁慈﹗我細個帶漏剪刀都喊,走去廁所祈禱,希望老師今日上堂不要用剪刀,如果欠帶功課,直頭想 SICK LEAVE 返屋企﹗

上了小學,不方便 post 學校相,post 返預備新年的靚衫衫﹗


小丸子千辛萬苦...去櫃桶找 "皇冠",以為是什麼皇冠...呵呵呵﹗

2017年1月9日 星期一

平靚正中環午餐【勝香園】

12月的某一日,阿旺來中環陪我吃午餐,我平時最怕諗中午吃什麼,每日 LUNCH TIME 都非常頭痛,在中環吃午餐,又貴又不一定好味 (貴就一定),味道好又平的,一定多人,所以我平時一個人的時候,通常都是買 "大家樂" 回 OFFICE 吃﹗反正出去吃又是一個人,回 OFFICE 吃又是一個人﹗難得今日有個伴,行遠少少去吃【勝香園】﹗陳幾何時 OFFICE 仲有同事的時間,我們間中都會去吃,中午的時候必定大排長龍,由於是大排檔,我夏天一定不會去﹗

其實勝香園有 2款湯底的,通粉是全番茄湯底,公仔麵是公仔麵湯,再加番茄醬上面,會有少少番茄肉,如果想要全蕃茄湯底,又要有番茄肉,就要點通粉,再加番茄 (當一個餸計)﹗

我的番茄通加茄,配紅腸﹗

阿旺的番茄公仔麵,配雞扒﹑午餐肉﹗

必飲 - 咸檸七﹗

必吃 - 蜜糖檸檬豬仔包

2017年1月5日 星期四

朋友仔生日會【PIZZA EXPRESS】@20161204

2016年 12月 4日 (星期日)

現在的小朋友真的很幸福,我記得小時候好羨慕同學在麥當奴開生日會,現在小朋友的生日會,已經不限於麥當奴,冒險樂園是近年熱門之一,小朋友有得玩,大人坐在一旁可以 "吹下水",但原來現在小朋友生日會還可以做 PIZZA﹗

今次去朋友的生日會在 PIZZA EXPRESS,好似一點也不便宜,小朋友可以做 PIZZA 就是 $198 + 10%/位﹗大朋友的食物就是另點的,沒有特別的優惠,PARTY的 MINIMUM CHARGE就已經是 $6000﹗我連麥當奴開生日會都覺得太貴,所以大頭妹小丸子應該沒有這個機會了,都是參加別人的生日會啦﹗

我見小朋友真是玩得好開心﹗粉團是現成的,小朋友可以自己搓幾下,再放入焗盤,然後再自己放材料﹗

大頭妹的只有蕃茄醬和芝士,講了很久才勉強放了幾片火腿﹗

小丸子好少少,放了火腿和蘑菇﹗

很喜歡這條新裙子,所以特別買了姊妹裝﹗

大家都是穿 L SIZE﹗

大家 like 咗我地 facebook page 未呀?﹗未就快啲 like 啦﹗


2017年1月4日 星期三

媽咪生日飯【潮庭】@20161222



2016年 12月 22日 (星期四)

慢慢清下舊 blog,寫飲飲食食的會比較容易,所以我估最近都是出外食 blog 多,而且工人姐姐放假,多了機會外食﹗呵呵呵﹗忽然覺得請工人姐姐真是好抵,慳回不少晚飯錢呢﹗

今年媽媽的舊曆生日和冬至差一日,所以連冬至晚飯一齊吃,地點選了潮庭,價錢不太貴,食物質素好,坐得舒服,又近屋企,簡單點來講是『懶』囉,做女兒的就是有這個特權啦﹗

前菜也十分美味﹗

必吃的鵝片﹗

咕嚕肉是小朋友的最愛...不過我家 2位小姐口味奇怪,好多小朋友愛吃的,她們不吃,通常小朋友不吃的,她們愛吃﹗好彩今次大頭妹也有吃咕嚕肉﹗

臘味炒芥蘭,芥蘭竟然有點老,以這個價位來講,好似 $98,真的不合理﹗

蠔餅好好味﹗

蠔仔粥今次真是超級好味...可能因為今次我記得叫 "走青",沒有我最討厭的芫茜﹗

臘味芋頭煲,味道還可以啦﹗

炸子雞...我印象中好似好味﹗

杏汁豬肺湯,每次都必叫的﹗

最後仲有東海堂的士多啤梨蛋糕﹗忘記了名字,這款是用日本士多啤梨的,所以特別好味呢﹗小丸子不停吃士多啤梨﹗

大家 like 咗我地 facebook page 未呀?﹗未就快啲 like 啦﹗

2017年1月3日 星期二

結婚週年晚飯【La Vache!】@20161213

2016年 12月13日(星期二)

2016 年真是不太 productive 的一年,今年出的 blog,真是自正式寫 blog 以來,出產最少的一年﹗12月撞正工人姐姐返菲律賓放假,我自己又放埋長假湊女,出 blog 的數目真是少之有少﹗呵呵呵﹗希望 2017 新一年會勤力點啦﹗我個草稿箱真是已經爆滿啦﹗新一年的第一篇 blog,寫返 12月的結婚週年晚餐﹗

今次又再去我生日時去的的 La Vache﹗因為我間中都會忽然好想吃牛扒,La Vache﹗的價錢不算貴,食物亦有質素,所以想起慶祝就會想起它,而且地點很近我公司好方便﹗La Vache﹗只有一個餐 $298 +10%/位,只需要揀扒要幾多成熟就可以了 (不包括飲品)﹗

麵包的牛油超級好味﹗

沙津沒有特別,不過吃牛扒﹑薯條之前,當打個底,少點『罪惡感』,其實只是自欺欺人﹗

阿旺好型地點了 still water,其實...餐廳有免費水的﹗

我...如常飲可樂,吃薯條要飲可樂﹗

牛扒的質素真的不錯﹗這裡是 2份呵﹗不過侍應已經分了每人 2塊放在我們的碟子上﹗

今次點了 medium rare﹗


餐廳已經坐滿人,不好意思拍照﹗結婚 9週年快樂﹗

好似 6人以上才可以訂枱,我們放工行過去, 6:30 前 walk-in 一般都有位,6:30後好快就會滿坐啦﹗

La Vache﹗
地址: 中環蘇豪卑利街48號地下
電話: 28800248
openrice: https://www.openrice.com/zh/hongkong/r-la-vache-%E4%B8%AD%E7%92%B0-%E6%B3%95%E5%9C%8B%E8%8F%9C-r155310

大家 like 咗我地 facebook page 未呀?﹗未就快啲 like 啦﹗
Related Posts Plugin for WordPress, Blogger...