2017年2月28日 星期二

快樂的星期日

2017年 2月 19日 (星期日)

由於大頭妹 2月尾就考試,2星期前的星期日就已經要閉關溫習,依家終於明白,點解以前成日都約唔到家有小學生的媽媽朋友星期日出來玩,最近有時忙東忙西,連芭蕾舞都無上,都是時候再排一排 2個女的興趣班﹗

星期日要溫習,又無工人姐姐幫手,而且我都相信『吊頸都要抖下氣』,不停溫不停溫,都唔會吸收啦,所以決定落街食,再去 MOLLY FANTASY 玩﹗玩完返屋企再溫過﹗暫時...我覺得仍然做到 work hard play hard﹗

我發覺小丸子真是好識食,我買咗塊炸尤魚餅,佢二話不說就攞去食,仲要話自己要食晒成塊,然後見佢好熟手咁將隻溫泉蛋放入自己個碗,再加少少湯,然後點來吃﹗﹗﹗

大頭妹...就斯文得多﹗

睇下佢個邪惡樣﹗

阿旺點了新的蜆烏東,佢話味道都不錯﹗

最後叫多一塊比大頭妹,佢真是可以食淨烏東架﹗

哈哈...唔知係唔係小女孩的必經階段 『扮香港小姐』,不過我未見過大頭妹做過,應該都係港女丸的主意﹗

又一個愉快的星期日﹗多謝各位收看﹗

2017年2月27日 星期一

大頭妹『第 69屆香港學校音樂節』 (上)



2017年 2月 12日 (星期日)

好少記錄大頭妹學鋼琴,其實我都唔係太識,所以都無咩講,今次寫呢篇 blog,冒住比人鬧『怪獸』,不過唔理咁多,依家好多野都唔會係 blog講,但都真是想記底今次的經驗,當比大頭妹第時大個睇返又好,提醒自己都好﹗

眨下眼都學咗1年半有多,我唔知進度如何,我估應該是偏慢,成日聽人話 1年考 1級,佢暫時 1級都未考過,彈緊大約 1級的書。之前老師有問過我,我話我都唔心急要考,又唔洗考學校,我寧願佢有興趣去學,所以老師就話不如試下去參加比賽,當然唔係為獎啦,只是想累積一下經驗。

正適比賽是 3月份,今次是鋼琴學校自己的交流會,學生彈比校長聽,校長會比返少少 comments 咁啦﹗

我一向都知大頭妹係容易緊張的人,今次第 3個到佢,唔係第 1個出去,應該就已經好少少啦,點知咁岩前 2個學生,同佢彈得唔同,首歌第一段係要重覆,佢地都無重覆,大頭妹老師係教佢要重覆的,後來校長有講返,比賽時係唔需要彈重覆的部份,唔知係唔係咁影響咗大頭妹,佢坐低彈的時候,除咗第一句,之後的...基本上無一句係無錯的﹗﹗﹗

OK﹗『平常心』係比個啲小朋友已經做得好好的人講,當自己小朋友表現唔好時,其實好難『平常心』﹗尤其是其實平時真是做到,點解出嚟落差會咁大呢?佢返埋位時,自己主動問我 : 媽咪,你係唔係嬲我呀﹗我真是無嬲 (可能面色唔係咁好睇),我是覺得好可惜,同埋唔知點樣可以幫佢,係屋企練習時,基本上已經彈到好熟,從來未試過彈到咁,就算第1日開始練時,都未有彈得咁差﹗之後睇『親親我好媽』,有集講大女落選芭蕾舞,又是問咗同一條問題,我真是睇酊眼紅紅,我希望小朋友去學一樣興趣,並唔係為咗滿足父母的期望,只是希望佢享受中間的過程,我要提醒我自己﹗﹗﹗ 

之後我有問返老師,我主要的擔心係以後考試點算?﹗比賽我從來無諗過我女會羸,但學得琴,都總要考試架?﹗老師叫我比佢係多啲人面前彈,親戚朋友上嚟屋企,就叫佢彈比人聽下﹗因為鋼琴比賽係最容易緊張,其他樂器的比賽都是自己帶自己屋企用開的樂器,得鋼琴比賽是要彈一部自己第一次見的鋼琴。

今次去大會堂彈個鋼琴,價值 $80萬架﹗


明明入去之前都好輕鬆,點解...一坐低彈就會咁緊張?﹗

係大會堂望到 AIA,岩岩係 LAST DAY,所以過去玩下,不過都幾高消費,行個圈唔係玩咗好多遊戲都 $600﹗

估唔到大頭妹夠膽玩過山車,雖然呢個是小童 VERSION﹗小丸子就直頭玩到好 HIGH啦﹗

呢個滑梯最唔抵...大頭妹又未夠 120CM,要大人陪,好似 $30/次,即是要 $60﹗反而過山車 $40,感覺就好抵﹗

呢個同海洋公園的差不多﹗

小丸子要食綿花糖﹗


2017年2月24日 星期五

敘亨軒海鮮火鍋

 

2017年 2月 10 日 (星期五)

阿旺的中學同學,每年都會食一次開年飯,今年就打邊爐﹗

今次好驚險,我地就是約咗係『地鐵放火事件』的同一日,7:00 尖沙咀,所以我地有朋友地鐵埋唔到站,遲咗成個鐘先到,其實我都係因為買蛋糕,所以預早少少到咗咋﹗最後食完飯,我同阿旺行去碼頭坐船落灣仔,再坐巴士返屋企。唉﹗香港幾時變成一個平安返到屋企都要感恩的城市﹗我依家坐地鐵都真係 360度前前後後左左右右望一次身邊係咩人。

潤肺海底椰湯 $88,上枱的時候真是好香椰子味,食落都真是有淡淡椰子香﹗

平地手切肥牛

炸響鈴

雲吞﹑魚皮餃

炸魚皮,是即炸架﹗所以好好味呀﹗又香又脆﹗

蝦滑

炸茶樹菇

油麥菜


皇帝菜


最後仲有生果送,因為朋友是熟客仔﹗

敘亨軒海鮮火鍋
尖沙咀河內道3-4號世紀商業中心1樓 
2311 1908
星期一至日:17:30-05:00

2017年2月23日 星期四

英國文化協會開放日: 大頭妹試堂



上星期帶大頭妹參加【英國文化協會】開放日免費 Primary Plus (小一至小六) 英語模擬課堂,雖然是免費,不過內容都好豐富,包括 45分鐘的模擬課堂﹑英語水平測試﹑家長資訊講座﹑課程諮詢﹗

今日的流程都好順暢,我地準時 2:25到 3/F 登記,大約 2:40分就開始。首先是模擬課堂,因為今日是開放日,所以家長可以坐入課室觀課,我又可以了解一下我女平時上堂的情況啦﹗

先講下課堂的內容,我地今堂的主題是 Haunted House, 一開始是 『故事時間』,主要是教不同的生字,當中都包括一些問答,等小朋友有多些『聽和講』的機會,例如: bedroom﹑kitchen﹑study room,之後又有叫小朋友估下鬼屋入面會住了什麼動物,例如: turtle﹑octopus﹑snake,然後再教下形容詞: headless﹑two-headed。講完故事,就到手工時間,當然不是真的單純做勞作,當中都包括簡單『作句』,好似: There is a cat in the kitchen。


 
課室的環境,真是相當不錯,有落地大玻璃有自然光,上堂都精神啲,課室有 4張大圓枱,一張大約坐 5個小朋友。



家長資訊講座有提及,小一二的課程就會加插少少手工的時間,訓練小朋友的小手肌,亦都比較貼近小一二的學校課程。到小三四就會多些作句/ 短文,小五六就更加會寫下故事。真實課堂是 1.5小學,會有少少比小朋友 presentation 的時間,不過今日模擬課堂就不夠時間了。

之後大頭妹就去另一個課室做筆試,我又去另一個課室聽家長資訊講座,主要都是介紹一下 British Council Primary Plus 的課程﹗最大的賣點除了課程本身是貼近小學的課程,當然就是『師資』啦﹗所有英國文化協會導師的英語均達母語水平。除了學位外,他們全都持有專業的教師資格,包括CELTA、DELTA等等,另外最少要有 3年的教學經驗。



做完筆試,仲有『口試』,之後再會同家長講解小朋友的程度,建議小朋友上什麼課程,老師建議大頭妹可以上 Primary Level 1 Plus 的課程,其實 level 1和 level 1 plus課程內容沒有分別,只是 level 1 plus 比英文掌握較好的小朋友。

哈哈...老師叫我唔好企係旁邊,怕小朋友會緊張。


1/F 就是國際幼稚園部﹗

大頭妹好乖,老師比咗一塊朱古力佢,我見佢一直都唔食,出門口先食,原來佢話見到有『不准飲食』的標誌﹗

British Council 英國文化協會
地址:金鐘法院道三號
網址:https://goo.gl/l1UFCa
Facebook:https://goo.gl/xxHNy8

2017年2月16日 星期四

年初五

2017年 2月 1日 (星期三)

今年新年無出去玩,其實年年新年都無,都是留港拜年,年初一至三的行程,真是仲忙過返工﹗年初五我未開工,難得多一日假,我就當然帶女週圍玩下,不過其實都是行下太古城﹗

行誠品見到呢本最近大熱的【再見了﹗變成鬼的媽媽】,讀比小丸子聽,點知佢真是聽到眼紅紅,係咁問我個男仔個媽媽點解死咗﹗ 

所以要睇埋本 【媽媽變成鬼了﹗】,原來媽媽比車撞死咗﹗

佢其實唔想比我影架...不過我話比我影啦,我要記底你好惜媽媽嘛﹗

之後見有時間,帶佢去食個麥當奴,當時都仲眼紅紅咁架﹗

點知...當得返最後一件麥樂雞時,我問佢: 你仲食唔食呀?﹗其實我食咗 1件,佢食咗 4件,佢問我: 你食咗幾多件?我食咗 2件﹗我答: 我食咗 1件。佢即時...拎起最後 1件放入自己個口...是即時...我仲話你好惜媽媽...眼淚都未乾...原來係呃我﹗

之後我同家姐講返,家姐話請返我食壽司﹗

話咁快就放完 5日新年假啦﹗我都要返工啦﹗




2017年2月14日 星期二

靚媽日記@Jan 2017

又好耐都無寫過我的『靚媽日記』,其實我最近都乖呀,日日都化個靚妝先返工,不過就唔係成日都有影相做記錄,化來化去都係差不多﹗總之就是有化比冇化好啦﹗哈哈哈﹗

1月份的記錄,當然就唔少得新年的新衫啦﹗其實生完 2個女之後,都好少買靚衫比自己,近年真是越來越少,不過新年就點都要買返少少既,買了 2件露肩的冷衫,粉紫同粉藍,2個色望落都好舒服﹗

另外,今個月試咗新的護膚品,覺得效果都唔錯﹗



Eucerin 透明質酸緊緻充盈系列,產品加入比一般透明質酸分子微細達 40倍的透明質酸分子,賣點是 『即使毋須注射亦能深層滲透肌底』,令肌膚更易吸收,達至長效保濕、持續抗皺。 Eucerin 獨有的3D Level抗皺技術,以大分子透明質酸滲入表皮層撫平乾紋,而小分子透明質酸則直達肌底皺紋根源令肌膚恢復平滑緊緻,加上活性成分 Glycine Saponin 更有助於細胞透明質酸的再生,從根源減少皺紋的產生。

呵呵呵,雖然我無咩皺紋的問題,不過等到有皺紋先做抗皺,就已經太遲架啦﹗出咗皺紋就真是要做好多野先可以補救,所以一定要防患未然﹗我用咗大約 3星期,感覺最大的較果是 firming,真是有收緊的作用,保濕度都足夠﹗於日霜前使用,幫助後續上妝持久貼服於晚霜前使用,為肌膚於晚間深層保濕。

透明質酸緊緻充盈精華素 (6 x 5ml),我自己一支都可以用到 5日,一盒就大約是一個月少量瓶裝,確保產品新鮮衛生。


另外都試了日霜,平時用開乳液狀,冬天天氣比較乾燥,可以轉用cream狀的,佢好杰身,感覺就是密度好高,不過用完唔會覺得油,之後再上妝都好貼。連老公都好鍾意用,佢平時唔會用我啲防曬乳液,佢話用完皮膚好似會白咗,呢款 cream 狀,用完就無色,仲有保濕同 firming 的效果﹗


LOOK 1: 粉紫色樽領連身冷裙,專登梳起馬尾,等個領位明顯啲,用埋紫色眼影,不過影完相,仲要用埋美顏相機,其實就唔係好出,同平時就是唔同啦﹗ 
 


LOOK 2: 呢日無特別,只是好用心機咁畫條眼線,所以要影底﹗

LOOK 3: 粉藍色露肩薄冷衫,近年都好愛呢類 BABY BLUE的顏色,少咗買粉紅﹗



Related Posts Plugin for WordPress, Blogger...