2017年3月17日 星期五

No. 5 Italian@20170313



2017年 3月 13日 (星期一)

和大學同學約了半年的飯局,之前都是大家生日時出來食飯聚聚,人越大好似越難約,由之前大約 2個月一聚,到依家半年一聚,所以就算約了星期一,本來要帶大頭妹上鋼琴班,都無辨法,要丟低大頭妹了﹗

第 2次來【No. 5 Italian】,可能熱潮過了,今日來到好似好冷清,去銅鑼灣世貿中心分店,全晚都只是半滿,不過食完之後覺得都正常,食物質素是 OK,意大利飯和意大利麵是做得不錯,但其他主菜只是一般般,服務就更加是麻麻地,感覺上好『小家』,其實上一次來的時候,已經覺得服務有改善空間,今次仲要連埋單時都出錯,套餐之外再收了主菜的錢,說是電腦出錯﹗

今次點了 $488/ 2人的套餐,包括沙律﹑湯﹑主菜﹑甜品,飲品要另加 $98/ 2位 (任飲 1.5小時,加沙律任添),佢另外有個西冷的任食套餐都幾吸引,不過一個人食,就要全枱人一齊食,所以就放棄了﹗


麵包...不明白...4人和 2人都是得 4片包,而且依家已經好似唔係自家制了﹗

沙律是吞拿魚雞蛋沙律,這個是 2人份,其實 2個人都吃不完,所以加 $98/ 2位的飲品加沙律任食,基本上是唔會再額外添加沙律﹗

蟹肉粟米湯,texture 有少少奇怪,因為粟米打成半爛,既不是一粒粒的粟米,又不是完全 creamy 的粟米湯,我覺得味道都唔錯,最少真是有蟹肉﹗

12' 鵝肝配野生大蘑菇薄餅

鮮海膽櫻花蝦手造意大利麵,海膽份量都算足,入口好 creamy﹗

焗法國野雞...我無食...出去食西餐的焗雞...中伏的機會是好大...今次都唔例外,同學話似煲完湯的雞,啲肉好鞋﹗

烤伊比利亞黑毛豬鞍...我都無食...望落都是乾爭爭咁﹗

我點的北海道蟹肉意大利飯,這個味道不錯,我估去No. 5 Italian都是吃意大利麵/ 飯,比較有水準﹗

最後仲有甜品﹗

$98/ 2位任飲的飲品都算多選擇,其實連紅﹑白餐酒都可以揀﹗



另外,西冷任食餐,其實真是幾吸引,本來都想同阿旺來試試,不過食完今次覺得 service 麻麻地,應該唔會試啦﹗

No.5 Italian
網址: https://s.openrice.com/QrbS0sl0200
地址: 銅鑼灣 告士打道280號世貿中心3樓311號舖
電話: 2554 2228


2017年3月16日 星期四

靚媽日記【VICHY溫泉礦物保濕修護微精華液】

最近天氣時冷時熱,一日已經上落幾度,唔止容易病,其實皮膚都好難適應,所以真是唔好以為春天就可以唔洗做好保濕,因為保濕做得唔好,好容易又會有皮膚敏感問題﹗

今次試用 VICHY新出的【VICHY溫泉礦物保濕修護微精華液】$310 ,用上突破性的 『 + 油』配方,融合水性成分: 法國火山礦物泉水、透明質酸、甘油,及油性成分: 角鯊烯、維他命E,仿效皮膚的水油黃金比例有效修復肌膚屏障﹑阻止水份流失﹑抵抗外界及自由基對肌膚造成的傷害

【VICHY溫泉礦物保濕修護微精華液】可以直接倒大約一個 5蚊硬幣大小的份量落手,再輕輕力拍上面,可以輕輕按壓,加強吸收﹗基本上好快就比皮膚吸收晒,唔會有油笠笠的感覺﹗

見唔見到一粒粒的,就是角鯊烯維他命E,保存在微囊之中,當與皮膚接觸的時候養份可以直接滲透到肌底﹗
 

【VICHY溫泉礦物保濕修護微精華液】另外仲可以配合美容導入器,做到深層補水的效果﹗
 

 做完皮膚真是好柔軟,摸落好滑呢﹗
 

【VICHY溫泉礦物活水循環保濕精華】成份包括蘊含15種稀有礦物質的Vichy溫泉水,再加入專利醫學保濕成分「絲柔鎖水因子」,在肌膚表面形成「生物鎖水保護膜」 ,防止水份流失,為肌膚提供48小時深層持續保濕,用落的感覺補水又清爽,好易吸收,唔會有黏笠笠的感覺﹗ 


【VICHY溫泉礦物清爽保濕啫哩】,其實都唔洗我多介紹啦﹗經皮膚科醫學驗證,不含Paraben類防腐劑,通過敏感肌膚測試,可以舒緩敏感肌膚。早前,消費者委員會測試市面上17款本地有售的保濕面霜,【VICHY溫泉礦物清爽保濕啫哩】是 4款不含致敏成份的保濕面霜之 1,大家可以放心使用﹗

Gel cream 狀的質地,用落好吸收好舒服。

正確的護膚程序是洗面後,先用【火山礦物溫泉水】﹑再用【溫泉礦物保濕修護微精華液】,之後就是 【溫泉礦物活水循環保濕精華】,最後就是【溫泉礦物清爽保濕啫哩】,有時間仲可以用埋【火山溫泉 SPA 睡眠面膜】。

用咗大約一個星期,皮膚光澤感明顯提升,而且之前轉天氣時起的粒粒,都開始平伏返啲啦﹗


(產品由 SHE.COM提供) 

VICHY 

大家 LIKE 咗我地個 FACEBOOK PAGE未呀?﹗  


2017年3月15日 星期三

大頭妹『第 69屆香港學校音樂節』 (下)



2017年 3月 11日 (星期一)

今日公司有要事,所以不能帶大頭妹去參加比賽,這個重要任務唯有交給爸爸啦﹗其實這個安排可能更加好,我一向都是大頭妹『壓力』的來源,同爸爸一齊,可能可以輕鬆一點,我自己又不用緊張﹗

完成比賽之後,大頭妹好打電話比我,好開心話比我知,佢自己彈得好好,沒有彈錯,哈哈,佢對自己的表現好滿意﹗我都好開心,最重要是佢可以克服到上台面對觀眾的心理關口,其實上次學校預演之後,我好驚會影響佢的自信心,大頭妹本來就已經沒有自信,今次比賽順利完成,真的重要過任合獎項,哈哈...因為本來就沒有機會得獎﹗

9:15分集合﹗

完成比賽和爸爸一起吃午餐再返學﹗

有爸爸帶返學,特別開心﹗

爸爸帶完返學,再返文化中心拿成績﹗82分,我覺得十分不錯啦﹗



2017年3月14日 星期二

茶木@20170310


2017年3月10日(星期五)

今日去剪髮,對上一次剪髮已經是11定12月,開始頂唔順個頭,剪完髮返到屋企樓下已經9:00幾,想不到吃什麼,阿旺提議食茶木,都好喎!開了幾個月,經常都要排隊,所以都未有機會試過!結果9:30去到都要排隊入,然後9:45就last order,10:30就關門。

以為茶木是cafe style,食物選擇比我想像中多,點了牛肉麵、芒果沙冰、薄荷珍珠奶茶,黑糖芋圓。 本來想試試蚵仔煎,可惜已經賣完了!

牛肉麵 $75,連埋加一要 $80幾,味道是不錯,牛腩炆得好腍,又有少少紅蘿蔔和白蘿蔔,都炆得十分入味,麵夠彈牙,有點咬口,不過以這個價錢,我覺得算是交到功課,未算是超水準。

芒果沙冰 $36,入口好香,應該是用上台灣芒果,和平時泰國菜館的不同,加了cream感覺邪惡了一點。

阿旺點了薄荷珍珠奶茶 $31。

黑糖芋圓 $42,這個味道不錯,內容亦很豐富,有齊芋圓、珍珠、仙草、薏米、紅豆、蘆薈、士多啤梨,黑糖糖水還帶有點點薑的味道。

最後,有我的新髮型,漂亮嗎?其實沒有電曲,只是髮型師替我 set了頭髮﹗


2017年3月13日 星期一

小丸子上phonics



好似好少寫下小丸子的學習進度,其實小丸子 K2 11月,就開始學 phonics啦﹗都是去返大頭妹學 phonics 的 Jolly Kingdom,本來其實唔想再出北角,想搵下屋企附近的,上咗 3-4個月 eye level 的 sparks 課程,感覺自己好難跟,即是自己又要學過一套新野,所以都是跟返大頭妹上 jolly phonics,大頭妹仲可以幫我教下妹妹﹗

唔想大頭妹同小丸子一齊上堂,怕佢地會傾計,所以揀了另一個老師 Ms. Queenie,大頭妹是跟 Ms. Lena 的,做了評估,其實小丸子識晒 a - z 的 phonics sound,幼稚園有教,不過就唔識 blending,所以就變咗唔識拼字啦﹗當年大頭妹又無呢個問題架喎﹗所以老師就建議小丸子由雙音開始學,即是 Level 1 的 book 2,不過就要先上 4堂 blending﹗

現時上了 4-5個月,暫時仍然是英文文盲,都未係好掌握得到 blending,見佢主要係唔想做,依家同佢睇英文故事書,如果我是一邊做 blending一邊讀,佢睇完一本就話好攰﹗我做咋喎,我唔係要佢做喎,佢都話攰,可以一睇完一本就即訓著,萬試萬靈﹗

等上堂做少少靜態活動,油下顏色。佢問我可唔可以攞多一張比家姐,我真是好開心,一來見佢都惜家姐,二來見佢學識規矩,會問下我先拎多一張﹗

最近搬咗去和富中心,雖然行遠咗少少,不過就有得行商場,hohoho...仲要係正 $12店對面,今次真是...幣家伙﹗

最後,講個笑話比你地聽,最近 Ms. Queenie 原來請咗幾星期病假,唔知係唔係搬咗之後其實已經無做,轉咗個男老師,我之前唔知,都係老公帶,咁我老公個人一向無所謂啦,個日我接的時候,見到係男老師,仲要單對單教我女,我已經打個突,之後小丸子出嚟仲面青青好驚咁,然後拉我出學校出面,話有野同我講﹗我當時好驚...然後小丸子細細聲同我講...『我想大便﹗』,HAHAHAHAH...真是比佢嚇鬼死,諗返都覺得自己好低能﹗

2017年3月11日 星期六

聖誕親子澳門 3天遊【Hello Kitty Obrigado/ 大三巴/ 贏到粥/ 新濠影匯】

 

2016年 12月 25日 (星期日)

今年聖誕節約了國皇之家一齊來個親子澳門 3天遊﹗呵呵呵﹗2個女十分期待,11月時已經訂好酒店和船飛,原來去澳門的船都好早爆滿,好彩今次有 Mandy 安排,如果比我訂,我一定拖到 last minute,可能已經買不到船飛啦﹗

訂了 1:00的船,我地 11:30到碼頭集合,我去到碼頭才發現自己帶漏東西,結果阿旺用極速 1小時來回上環太古,最有趣是我和 Mandy 兩個先帶小朋友入閘過關,Vincent 就等阿旺,結果他們沒有帶小孩,可以行 e道,登船排隊時,竟然排在我們前面,而我之前預備比 2個女上船吃的卷蛋,就做了阿旺的午餐 (我因為一直擔心阿旺趕不上,所以忙記了幫他買午餐)﹗

坐 1:00 船去到澳門已經 2點,假期過關的時間比較長,坐酒店 shuttle bus 去到酒店都已經 3:00,剛剛可以 check in,今次我地都是住上次入住的【新濠影匯】﹗在酒店 settle down 之後,我地就出發去【大三巴】啦﹗

第一站是【Hello Kitty Obrigado】﹗小朋友都有少少肚餓,一人買了一塊曲奇 $10@﹗

仲有 Hello Kitty 豬肉乾,不過成 $48/塊,我沒有買﹗

但最後忍不住買了這個聖誕節限定 Macaroon,阿旺吃了一件,話不適宜食用,其實就是太甜﹗阿旺又太誇張﹗

我仲買了一盒什錦 $158 (唔記得?),不過好似曲奇禮物最抵買,$108/ 12塊曲奇﹗

Hello Kitty 公仔是買滿 $400 的禮物﹗

最後沒有去大三巴,因為已經訂好枱吃晚飯,怕遲到會被 cancel booking﹗今次又是 Mandy 一早在香港 whatsapp book定,原來依家訂枱咁方便﹗

卜卜蜆一大鍋才 $158﹗香港一定吃不到﹗

手切牛

美國肥牛

墨魚滑 + 蝦滑

不知道是什麼魚,我見到隔離枱的好似好好味,我又點,不過其實我不吃魚的,其餘吃魚的都話好好味,但不知道是什麼魚,問侍應,侍應話是生魚,但沒有骨的﹗

這兒的烏東 $16/ 2個,平香港一半﹗

這個手撕雞要訂的﹗真是好好味,有少少 wasabi 味,入面有青瓜絲﹑炸芋絲和海蜤﹗

不吃飯的小女孩...


到此一遊﹗

之後行去【媽祖廟】有『澳門光影節』﹗

最後坐車返酒店休息,第一日完﹗
Related Posts Plugin for WordPress, Blogger...