2018年3月16日 星期五

久違了的二人世界 佐敦街角小店【FLANEUR】



哈哈哈﹗一連串的考試後慶祝活動,阿旺話知我同個女溫書辛苦,要帶我去二人世界食好野。哼﹗次次考試佢都無幫手,老實唔搗亂已經當幫忙,當然要慰勞返我﹗

今次去一間佐敦街角小店【FLANEUR】,我覺得環境唔錯,在一條橫街的角落,好有小店的氣氛。我地點了紐西蘭鑽石蜆﹑牛油果睡蟹意大利飯﹑啤酒烤法國野雞﹑烤焦糖菠蘿,食物質素都唔錯,尤其是烤焦糖菠蘿甜品,比較少地方食到。

呵呵呵﹗難得二人世界,當然要來個 SELFIE 先啦﹗


又難得二人世界...當然要點返2杯 MOCTAIL﹗


紐西蘭鑽石蜆 (8oz) $88,鑽石蜆好鮮甜無砂,呢點非常重要,食蜆最怕有砂,SIZE 比一般蜆大,食落啖啖肉。如果小丸子係度實好開心,佢好鍾意食蜆﹗


牛油果睡蟹意大利飯 $198,呢個飯真是十分『邪惡』,竟然有一小樽的蟹膏 (其實都不少,最少都有 3-4湯匙的分量),用來拌飯一起吃,喜歡蟹膏的朋友,真是唔可以錯過,唯一美中不足是食的時候有少少蟹殼碎,不過都是一兩片,可以理解﹗


意大利飯煮得剛剛好,少少硬身,帶少少芝士味,我覺得如果改用忌廉會更加好,可以更加特出蟹肉同蟹膏的味道。


真是超好味,岩晒鍾意蟹膏既我同阿旺呢﹗


一啖飯加一啖蟹膏,真是無得輸,搞到我都想返去自己試下煮﹗


啤酒烤法國野雞 $158,單是賣相已經滿分,味道都不錯,調味是蜜糖芥末子,吃不出啤酒的味道,煮得不會過生/ 過老,不過我同阿旺都覺得雞肉未夠入味 (我地覺得是無醃雞的內部,但我同阿旺都食得比較濃味,可能一般人會覺我岩岩好),有皮的位置就非常美味。


傻人...


要珍惜會為你『拆骨』的男人﹗哈哈﹗今晚就鬧少佢兩句啦﹗


烤焦糖菠蘿 $48,我自己好鍾意食菠蘿,所以我真是覺得好好味呀﹗食的時候真是想大叫好好味呀﹗


最後想講講服務都唔錯,基本吃完一道菜,侍應就馬上換碟﹗我覺得以食物質素和服務來講,價錢都算非常合理﹗


【FLANEUR】
地址: 佐敦官涌街5號地舖
電話: 39569601

2018年3月15日 星期四

年初二@ 金滿庭京川滬菜館

 

每年年初二都同我姑媽拜年,今年唔自己煮啦,落街食去咗金滬庭,唔係第一次去,不過好少去,原來價位都幾高,比北京樓還要貴,😂😂😂 係...我淨係識北京樓,不過份量原來都多,所以又唔係貴。

新年點了個意頭餸「撈起」,哈哈,其實即是高級版雞絲粉皮!不過又幾好玩,傳晒成張枱「撈起」先食!今年轉新工,不求撈起,只求安定!

醉雞,阿旺好滿意!

燻魚,比北京樓貴少少,但原來好大碟既!

呢個饅頭就貴...不過2個女鍾意食就無計。

生煎包


咕嚕肉

鱔糊

沙鍋雲吞雞

上海粗炒

炒飯

整體食物質素真的不錯,雖不至於物超所值,但都物有所值。

金滿庭京川滬菜館
網址: https://s.openrice.com/QrbS0zXe0W0
地址: 鑽石山龍蟠街3號荷里活廣場3樓312A舖
電話: 26973033

2018年3月14日 星期三

考試後的 Happy Friday

考完試既星期五,要出去輕鬆下,本身亦好有信心當「慶功」,點知派咗第一科成績就衰咗,不過都是同自己講,人生有好多考試,一個考試失敗,唔代表永遠失敗,最重要是過得開心健康!時刻提醒自己!😆😆😆

阿旺買了飛睇黑豹,阿妹要跟住我,所以又去睇,家姐唔想自己一個係屋企,所以都一齊去。睇之前本來想去 Spaghetti House食芝士火鍋,點知原來冬天先有,我地仲要等到枱個刻先發現,好彩未坐低。之後去咗 Pizza Hut。

第一次去 Pizza Hut食芝士火鍋,點了 Deluxe 芝士火鍋套餐,我覺得個套餐無Spaghetti House 咁吸引🤔,肉太明顯是現成,蝦就同menu入面既size好有距離...麵包、薯條,炸雞都ok!不過算啦,小朋友要食都冇辦法!


個芝士都好大分別,唔知係咪重Mozzarella,點完一絲絲,好難斷開,食完之後對手仲好攰!😅😅 但大頭妹話佢鍾意呢款多啲。


另外加$15加配長通粉,一陣就比小丸子同大頭妹食晒。


另外加多個麵包比大頭妹,其實佢想食芝士火鍋,就是想食個包!


食食下既時候諗,其實香港依家真是好高消費,一家四口出街食個晚飯,再睇場戲,都要花成千蚊,仲要講梗只是食 Pizza Hut!

2018年3月13日 星期二

考完試了(下) 【和小朋友做小手工】



上次其實唔止買咗一盒玩具既,仲買咗一盒係做『玻璃畫』小手工,都唔係咩新野,我記得我細個都有玩過類似,可以夠我玩一個下午,不過依家當然再靚咗,做到是鎖匙扣咁,我覺得小朋友開 PARTY 時,同其他小朋友玩下都幾好﹗家長同小朋友做下小手工,其實是一個好好的親子時間﹗

一盒 $48,有6支顏色,同 6塊牌仔,有幾個唔同主題,我買咗恐龍同機械人﹗


大頭妹好叻女,可以自己完成,仲整得都幾靚﹗唔記得影小丸子隻恐龍,佢同爸爸一齊整,整到好恐怖,不過都成功咗﹗


整完之後要乾 8小時,所以晚上做完功課做就最好,訓醒第 2日就完成啦﹗乾咗就會半透明咁,大頭妹見到都好開心﹗














2018年3月12日 星期一

考完試了(上)【IQ XOXO遊戲】



放完新年假一個星期就考試,加上新年前又忽然停課,所以今次考試都溫得好急,有啲範圍其實都未教晒,要靠自己,所以新年假期都無得盡情玩下﹗不過唔緊要啦,考試後慢慢玩,大頭妹都知規矩,我次次都好有『信用』,考試後我會盡量滿足佢玩既願望,所以佢都會乖乖溫書 (希望小丸子都會...我知有啲難度)﹗

買咗款小遊戲同佢地玩【IQ XOXO遊戲】,是智力遊戲,訓練小朋友思考,仲可以提升專注力,HAHAHAH...個盒野咁講我咁聽...不過最少可以令佢地忘記 ipad 一陣﹗


買得一盒,兩個又爭,之後比我諗到個好方法,一個『出題』,一個『解題』,成功解決佢地的紛爭﹗忽然明白小朋友乖唔乖,真是睇父母識唔識教,好多事情其實有好多辨法可以解決,湊小朋友真是轉數慢少少都唔得,仍然努力學做一個好媽媽﹗


個遊戲有好多 LEVEL,細既小朋友可以由STARTER開始﹗


大朋友都可以玩架﹗如果比我玩,應該都可以玩好耐﹗


佢最好既地方係細細盒,好岩出街/ 旅行有時坐長途車,比小朋友玩下,好過玩手機吖﹗


大家 LIKE 咗我地 FACEBOOK PAGE 未呀?未就快啲 LIKE 啦﹗


2018年3月6日 星期二

團年飯【潮庭】@20180213



2018年 2月 13日 (星期二)

眨下眼又一年,哈哈,眨下眼就 3月,依家先寫返 2月中的 BLOG,不過...暫時我都唔會放棄個 BLOG,個 BLOG 幫我記低好多開心事﹗今日就講下團年飯,其實又是去返潮庭,唔係北京樓就潮庭,然後每次都係叫個幾樣餸﹗

平時 HSBC 有個套餐,我地成日都點,所以大頭妹話要食龍蝦伊麵,佢係個種去到一間餐廳,就一定要食某一啲野既人 (即是怪人),所以今日無套餐,原價 $388...都要叫...隻龍蝦仲瘦過大頭妹,平時以為是套餐,一分錢一分貨,今日原價食都咁細...真是幾離譜,下次唔係套餐一定唔會叫﹗


其實...食返潮州野未好﹗鵝片好正﹗


蠔餅好味道,今日唔記得叫走青﹗

炸子雞,團年飯又點可以無雞呢?﹗

因為...次次叫菜都中伏,今次叫個煲,諗住菜唔好味,都有魚蛋食下﹗

蠔仔粥好味道,又係唔記得走青﹗

今日廚師失手...超咸,連我平時食得幾咸既人都覺得咸...


Related Posts Plugin for WordPress, Blogger...